Ang Landong maoy Solusyon
“Unsa kaha kon magtanom tag pipila ka kahoy?” Nangutana si Cristal.
Usa ka tinuod nga istorya gikan sa Argentina.
“Pwede ba tang moadto sa plasa?” Nangutana ang igsoong babaye ni Ivan nga si Cristal.
Mitan-aw si Ivan sa gawas. “Gusto ko,” miingon siya. “Pero basin kinahanglan natong maghulat hangtod mosalop ang adlaw. Init kaayo.”
Ang plasa usa ka dako nga luna sa kasagbotan duol sa ilang balay. Ganahan silang magdula og dakpanay o tagoanay didto uban ang ilang mga higala. Pero ang plasa walay bisan unsang landong nga ilang kapahulayan gikan sa init. Ug kining ting-init, usa ka dakong problema.
Nahilom og kadiyot si Cristal. Dayon miingon siya, “Unsa kaha kon magtanom tag pipila ka kahoy? Niana nga paagi ang plasa aduna nay landong. Dayon makadula ta bisan kon init!”
Mipahiyom si Ivan. “Ganahan ko niana nga ideya!”
Gisultian ni Ivan ug Cristal si Papá tanan mahitungod sa ilang plano. “Mangutana ko sa siyudad alang sa permiso,” miingon siya.
Paglabay sa pipila ka semana, aduna na silay permiso nga ilang gikinahanglan ug andam na nga magsugod! Gidala ni Papá sila si Ivan ug Cristal ngadto sa dakong punoan sa kahoy nga mitubo sa likod sa ilang balay. Ilalom sa kahoy, ang usa ka pundok sa gagmayng mga kahoy nga nagtubo.
“Kon mamulak na ang dakong kahoy, mangahulog ang mga liso niini sa yuta,” mipasabot si Papá. “Motubo dayon ang gagmayng kahoy gikan niini. Mora kinig gagmayng mga milagro sa kinaiyahan!”
Gipakita sila ni Papá kon unsaon sa pagkalot sa gagmayng mga kahoy nga mainampingon. Hinay kining gitanom ni Ivan ug Cristal diha sa mga kaang.
Dayon, usa ka hapon sa Sabado dihang gisalipdan sa mga panganod ang adlaw, gikarga ni Ivan ug Cristal ang gagmayng mga kahoy ngadto sa usa ka kariton. Hinay, ilang gitulod kini paingon sa plasa. Ang manghod ni Ivan nga mga lalaki ug mga babaye mitabang sa pagdala og mga balde nga dunay tubig. Si Mamá ug Papá nagdala og pipila ka pala.
Magkauban silang mipili og dapit alang sa matag kahoy. Nagkalot sila og mga lungag ug gitanom ang matag kahoy uban ang gugma. Si Mamá mipakita nila kon unsaon pagkalot og mga kanal sa palibot sa mga kahoy aron mabisbisan kini. “Ang mga kahoy nagkinahanglan og init sa adlaw, tubig, ug daghang sustansiya aron motubo nga lig-on,” miingon siya. “Sama sa mga bata!”
Naghunahuna si Ivan sa kahoy nga naa sa likod sa ilang balay ug naghunahuna kon unsay hitsura sa kahoy sa umaabot. “Makatuo ka ba niini?” miingon siya. “Sa umaabot kini nga mga kahoy mas motaas pa kay nato!”
Sa tingpamulak, ang mga kahoy makapadani sa tanan sa matahom, hayag nga rosas [pink] niini nga mga bulak. Sa ting-init, ang landong niini moabot hangtod sa plasa. Ug sa tinglarag, ang mga dahon motabon sa yuta nga mora og yellow carpet.
Kada adlaw, si Ivan ug Cristal mobisita sa plasa aron susihon ang mga kahoy. Ilang seguradohon nga ang matag kahoy dunay igong tubig. Ug sa matag higayon nga dunay bag-o nga dahon o sanga nga mogitib, mobati sila nga malipayon kaayo. Nagbunga ra ang ilang paghago!
Malipayon ang gibati ni Ivan nga naghunahuna sa tanang tawo nga malingaw sa landong diha sa plasa sa umaabot nga adlaw. Siya mitabang sa paghimo sa yuta nga mas nindot nga dapit alang sa tanang anak sa Langitnong Amahan.
Mga paghulagway pinaagi ni Colleen McKeown