Mga Pioneer sa Matag Yuta
Morag Sama sa Langit
“Ganahan ba ka nga motambong sa simbahan?” Nangutana si Tiyo Reza.
Usa ka tinuod nga istorya gikan sa India ug Canada.
Gipilo ni Tahira ang kataposang kamisin ug gibutang kini sa iyang malita. Nag-impake siya alang sa biyahe nga igahin sa ting-init kuban ang iyang tiya ug tiyo sa Canada. Naghinam-hinam siya apan gikulbaan usab og gamay. Ang Canada layo gikan sa iyang panimalay sa India.
“Naana ba nimo ang tanan?” Nangutana si Mama.
“Basin.” Gisirado ni Tahira ang iyang malita.
“Makabaton ka og maayong higayon. Seguroa nga imong gakson og maayo si Tiyo Reza ug Tiya Misu alang nako,” miingon si Mama.
Sa dihang minaog na si Tahira sa eroplano sa Canada, iyang gigakos og maayo si Tiyo Reza ug Tiya Misu. “Gikan ni sa akong mama,” miingon siya.
Gigahin nila ang sunod nga pipila ka adlaw sa pagsuhid sa siyudad ug duol nga mga dapit. Kinahanglan niyang mobisita sa iyang unang kalingawan nga parke ug makita ang Niagara Falls. Makalingaw kaayo kini!
Sa Sabado sa hapon, si Tahira mitabang sa pagluto og chicken makhani alang sa panihapon. Human sila mokaon, si Tiyo Reza nangutana kaniya.
“Gusto ka bang mouban namo ugma sa simbahan?” nangutana siya. “Moadto mi sa usa ka Kristiyano nga simbahan. Magkat-on mi mahitungod ni Jesukristo ug sa Iyang ebanghelyo didto.”
“Sige,” miingon si Tahira. Si Mama ug Papa mituo og lahi nga relihiyon, apan si Tahira mieskwela sa usa ka Kristiyano nga boarding school sa India. Ang pag-adto sa usa ka bag-o nga simbahan dili na bag-o.
Pagkasunod adlaw, gisul-ob ni Tahira ang sinina nga gihatag sa iyang tiya aron sul-obon. Sa dihang miabot na sila sa chapel ug misulod, ang tanan nanganta. Mihunong si Tahira ug gitutokan ang tanang tawo. Dihay mga mama ug mga papa naglingkod tupad sa ilang mga anak. Ang tanan malipayong tan-awon. Ang pagkanta nindot kaayo.
Mora kinig langit, hunahuna ni Tahira.
Milingkod si Tahira sa usa sa mga bangko uban ni Tiya Misu ug Tiyo Reza. Nagtan-aw siya samtang ang mga tray sa pan ug tubig gipasa. Naminaw siya sa mga mamumulong nga naghisgot mahitungod ni Jesukristo. Ug nakadungog pa siya og dugang pa nga kanta. Ang kataposang kanta mahitungod sa mga pamilya nga mahimong magkauban sa kahangtoran. Ganahan siya sa unsay iyang gibati sa mga pulong.
Human sa kataposang pag-ampo, giatubang ni Tahira si Tiyo Reza. “Unsay buot pasabot sa mahimong magkauban sa kahangtoran?”
Mipahiyom si Tiyo Reza. “Nagtuo mi nga kon mosunod kita ni Jesukristo ug mohimo ug motuman sa mga saad sa Dios, makapuyo kita sa langit uban ang atong mga pamilya sa umaabot—tanan nga magkauban.”
Si Tahira mibati og kainit sa sulod gikan sa iyang ulo ngadto sa mga tudlo sa iyang tiil. Ganahan siya sa ideya nga makauban ang iyang pamilya sa kahangtoran.
Human sa pagsimba, si Tahira kanunayng naghunahuna mahitungod sa nindot nga musika. Gusto siyang magkat-on og dugang mahitungod ni Jesukristo ug sa mahangtorong mga pamilya. Nakahukom siya nga makigkita sa mga misyonaryo. Sa dihang milabay ang mga semana, si Tahira mas nasayod pa nga ang ebanghelyo tinuod.
Gitawagan ni Tahira ang iyang mga ginikanan aron sultihan sila mahitungod sa unsay iyang nakat-onan. Dayon nangutana siya nila og importante nga pangutana. “Pwede ba kong magpabunyag?” Miingon sila oo!
Sa adlaw sa iyang bunyag, si Tahira, Tiyo Reza ug Tiya Misu nanganta og “Ako Anak sa Dios.” Si Tiyo Reza mihubad niini aron makakanta sila niini sa Hindi. Ang Hindi mao ang pinulongan nga iyang sinultian sa balay didto sa India.
Samtang nagkanta si Tahira, gibati niya ang kainit nga pagbati sa iyang kasingkasing. Mura kinig anaa sa langit. Ug si Tahira nasayod nga tungod ni Jesukristo, kon siya motuman sa iyang mga saad ngadto sa Langitnong Amahan, siya makapuyo pag-usab uban Kanila usa niana ka adlaw.
Mga paghulagway pinaagi ni Ekata Mandal