Atong Maanindot nga Kalibotan

Ang akong asawa ug ako midala sa pipila sa among mga apo ngadto sa usa ka talagsaon kaayo nga tanaman sa France. Among gidayeg ang nindot nga mga tamnanan sa mga bulak, mga liryo sa tubig, ug mga lim-aw.

Ang tanaman gipanag-iya kaniadto sa usa ka tawo nga ginganlan og Claude Monet. Siya usa ka bantogan nga pintor. Siya mainampingon nga nagtrabaho sa iyang tanaman sulod sa 40 ka tuig. Nadasig sa iyang tanaman siya nakamugna og gatosan ka painting.

Ang mga katahom sa kinaiyahan makatabang nato nga makabaton og pasalamat alang sa atong Langitnong Amahan ug sa Iyang Anak, si Jesukristo. Sila milalang niining maanindot nga kalibotan nga adunay mga bukid, mga sapa, mga tanom, ug mga hayop.

Kining maanindot nga mga nilalang nagpakita kon unsa kadako ang gugma sa Dios kanato. Apan, kini usab adunay kauban nga mga katungdanan ug mga responsibilidad. Kini gitawag og pagkatinugyanan. Kinahanglan natong atimanon ang mga butang nga gilalang sa Dios alang kanato.

Ang atong Langitnong Amahan nagdapit usab kanato nga moapil sa Iyang mamugnaon nga buhat. Kita makamugna og art, musika, ug uban pang butang nga makadan-ag sa atong mga kinabuhi ug makapanalangin sa uban.

Ang Dios nagsaad og dakong mga panalangin kon kita mohigugma ug moamuma sa kalibotan ug sa usag usa. Samtang inyong buhaton, kamo mobati og dugang sa Iyang gugma diha sa inyong kinabuhi.

Gigisigisi nga Papel nga Art

Si Bishop Caussé nagtudlo nga kita pwede usab nga mahimong mga tigmugna! Ania ang craft nga pwede ninyong himoon aron mopahinumdom ninyo sa maanindot nga mga nilalang sa Langitnong Amahan.

1. Pangita og litrato o usa ka butang sa kinaiyahan nga nakapadasig ninyo.

2. Sa usa ka piraso nga papel, paggamit og lapis aron magdrowing og lain-lain nga mga parte sa litrato.

3. Gisia ang dunay kolor nga papel nga gamiton sa imong litrato.

4. Ipapilit ang adunay kolor nga mga piraso sa papel sulod sa inyong gidrowing nga pormag tawo.

Ablihan ang PDF

Paghulagway pinaagi ni Maddie Baker