Kwarta diha sa Merkado

Ni Bradley Salmond III

Niining higayona, akong buhaton og eksakto ang gisugo ni Mama, naghunahuna si Anane.

Usa ka tinuod nga istorya gikan sa Ghana.

Batang lalaki naggunit og kwarta ug nagtan-aw sa mga tinda sa usa ka tindahan sa merkado

Nagngisi si Anane samtang naglakaw siya sa dalan. Ang baho sa piniritong isda ug ang nagkapuliki nga panag-istoryahanay sa mga tawo mipuno sa merkado. Paingon siya sa balay sa iyang Tiyo. Gihatagan si Anane og kwarta ni Mama aron ihatag ngadto ni Tiyo.

Gitan-aw niya ang palibot sa tanang tindahan nga nagbaligya og produkto, mga pagkaon, ug ubang mga aytem. Dayon duna siyay nakit-an.

Dihay tindahan sa pagkaon nga aduna sa duha sa iyang paborito kaayo nga pagkaon, toffee ug mga biskwit. Gitan-aw niya ang kwarta nga gihatag ni Mama niya. Ang usa ka gatos ka cedis dako na kaayo, hunahuna niya. Ang iyang paborito nga pagkaon tag 10 ka cedis lang. Tingali dili mabantayan ni Tiyo kon kuhaan og gamay.

Gipalit ni Anane ang mga pagkaon. Gibutang niya ang toffee sa iyang baba ug padayong naglakaw padulong sa balay ni Tiyo.

Si Tiyo nagtindog sa gawas sa iyang balay samtang nagpadulong si Anane.

“Ang gamay nga Anane kini! Dali diri,” miingon si Tiyo. “Unsay akong ikaalagad nimo?”

“Nagdala kog kwarta alang nimo gikan kang Mama.” Gitunol ni Anane ngadto niya ang kwarta, dayon gisuksok balik ang iyang mga kamot sa iyang mga bulsa. Makabantay kaha si Tiyo nga ang pipila nga kwarta nawala? Nagtan-aw siya samtang giihap kini ni Tiyo.

“Salamat sa pagdala niini dinhi,” miingon si Tiyo.

Nalipay si Anane nga wala makabantay si Tiyo nga kulang ang kwarta. Nanamilit siya ug misugod sa paglakaw paingon sa balay. Diha sa dalan, iyang nahuman og kaon ang iyang toffee ug mga biskwit.

“Kumusta man ang pag-adto kang Tiyo?” Nangutana si Mama dihang naabot sa balay si Anane.

Mikibo si Anane. “Maayo man.”

“Salamat sa pagdala niadto nga kwarta ngadto kaniya para nako,” miingon si Mama.

Miduko si Anane nga nagtan-aw sa salog. Misugod siya sa pagkakonsensya. Unsa kaha kon ang iyang mga ginikanan makahibalo nga iyang gigasto ang pipila sa kwarta? Dili siya gusto nga mawala ang ilang pagsalig.

Pagkasunod buntag, gisugo ni Mama si Anane nga mopalit og pipila ka butang sa duol nga tindahan. “Pauli dayon human nimog palit sa tindahan, OK?”

“OK.” Milakaw si Anane padulong sa merkado, apan wala siya mohunong aron mopalit og bisan unsa. Gikunot niya iyang kilay ug naghunahuna, Niining higayona akong buhaton og eksakto ang gisugo ni Mama.

Sa dihang nahuman na siya, mipauli dayon siya. Gihatag niya kang Mama ang tanang sukli sa kwarta.

Nianang Dominggo, mitambong si Anane sa iyang klase sa Primary. “Maayong buntag!” miingon ang iyang titser. “Karon maghisgot kita mahitungod sa pagkamasulondon. Importante kanato nga maminaw sa atong mga ginikanan ug mohimo og maayo nga mga pagpili.”

Naghunahuna si Anane mahitungod sa kwarta nga iyang gipalit og toffee ug mga biskwit. Kalit lang gibati niya ang kakulba o kabalaka. Nasayod siya nga nakahimo siya og sayop nga pagpili.

Pagkahuman og simba, gusto ni Anane nga makig-istorya sa iyang mga ginikanan. Paspas kaayo ang pitik sa iyang kasingkasing.

“Ma, Pa? Kahibalo ba mo sa kwarta nga gihatag ninyo nako aron dad-on kang Tiyo?” Nangutana si Anane. “Kanang, mipalit kog pipila ka pagkaon gamit ang pipila niini.” Nagduko siya nga nagtan-aw sa salog. “Pasayloa ko.”

“Salamat sa imong pagkamatinuoron,” miingon si Papa. “Mapasigarbohon ako kanimo.”

Mipahiyom si Anane. Malipayon kaayo siya nga misulti siya sa tinuod. Ug maayo ang iyang gibati sa sulod human gisultihan ang iyang mga ginikanan. Naghimo na siya og mas maayong pagpili.