Usa ka Bag-ong Simbahan alang kang Jamesi
Si Jamesi mibati og lahi dinhi kaysa iyang gibati sa ilang lain nga simbahan.
Usa ka tinuod nga istorya gikan sa Fiji.
Si Jamesi mibiya sa gamay nga gikoral nga dapit diin gibutang sa iyang pamilya ang mga baboy. “Dia ra, mga baboy!” Giitsahan niya kini og pipila ka pagkaon, ug ang mga baboy malipayong miagumod.
Dayon si Jamesi nagdala og limpyo nga mga botelyang sudlanan sa tubig ngadto sa gripo sa gawas. Bugnaw nga tubig ang mibugwak ngadto sa botelya sa dihang giablihan niya ang gripo. Ang pagpakaon sa mga baboy ug pagsag-ob og tubig alang sa iyang pamilya mao ang paagi nga siya motabang kada adlaw.
“Jamesi!” Mitawag si Mama. “Andam ka nang mosimba?”
Gipalong ni Jamesi ang gripo ug gidala ang kataposang bug-at nga botelya ngadto sa sulod. “Andam na ko!”
Matag Dominggo ang pamilya ni Jamesi moadto sa usa ka Kristiyano nga simbahan sa ilang lungsod. Ganahan siya nga magkat-on mahitungod ni Jesukristo.
Wala madugay si Jamesi ug ang iyang mga manghod nga babaye, si Unaisi ug Marama, nanglakaw kauban sa ubang sakop sa pamilya padulong sa simbahan. Pipila ka saag nga manok ang nagkurok-kurok sa dalan.
Apan pag-abot nila didto, sirado ang mga pultahan. “Nakalimot ko nga ang simbahan sirado karong semanaha ug sunod semana kay wala ang pastor,” miingon si Papa.
“Aduna bay laing simbahan nga atong maadtoan?” nangutana si Jamesi. Maguol siya nga dili makasimba karong semanaha.
Naghunahuna si Papa sa makadiyot. “Oo,” miingon siya. “Murag duna koy nahibaloan.”
Si Jamesi ug ang iyang pamilya misunod ni Papa pabalik sa ilang balay. Silang tanan misakay sa ilang gamay nga kahoy nga sakayan diha sa daplin sa suba. Milingkod si Papa sa likod aron mopaandar sa makina.
Ang sakayan miandar diha sa suba. Si Jamesi nangita sa mga langgam nga nakatago sa tag-as nga berdeng mga kahoy. Human sa mga 15 minutos, nakakita sila og gamay nga bilding sa simbahan. Kini adunay karatula nga nag-ingon, “Ang Simbahan ni Jesukristo sa mga Santos sa Ulahing mga Adlaw.”
“Mao kini ang simbahan nga akong gihunahuna,” miingon si Papa. Iyang gimaneho ang sakayan padulong sa daplin ug mikawas ang tanan. Makadungog sila og musika nga naggikan sa chapel.
Sa sulod, si Jamesi milingkod kauban sa iyang mga ginikanan ug mga igsoon. Naminaw sila sa mga mamumulong ug sa mga awit. Mibati og mainiton, malipayon nga pagbati si Jamesi.
Sa dihang nahuman na ang panagtigom, usa ka maabi-abihon nga babaye ang miduol ug nakig-istorya nila. “Aduna kami espesyal nga klase alang sa mga bata,” miingon siya. “Gitawag kini og Primary. Gusto ba ninyong motambong?”
Mitan-aw si Jamesi sa iyang igsoong mga babaye. Gikulbaan siya og gamay nga moadto sa klase nga wala siyay nailhan bisan usa! Maayo na lang makaadto usab ang iyang mga igsoong babaye. Tingali makalingaw kini.
“Sige,” miingon si Jamesi.
“Tana!” Mahinamon nga tan-awon si Marama.
Si Jamesi ug ang iyang mga igsoong babaye misunod sa babaye ngadto sa usa ka klasrom. Adunay daghang bata nga nanglingkod sa gagmay nga mga lingkoranan, nag-istoryahanay ug nangatawa. Sa dihang milingkod si Jamesi, sila mipahiyom niya. Ang tanan maayo kaayo!
Nanganta sila og mga awit, ug ang ubang mga bata mitabang ni Jamesi ug sa iyang mga igsoong babaye nga makat-on sa mga pulong. Dayon aduna silay leksiyon mahitungod ni Jesukristo. Si Jamesi mibati og lahi dinhi kaysa iyang gibati sa ilang lain nga simbahan. Nindot kadto nga kalainan.
Sa dihang nahuman na ang pagsimba, ang pamilya ni Jamesi mibalik og sakay sa sakayan aron mopauli. Si Jamesi mitan-aw og usab sa karatula sa gawas sa bilding sa simbahan. Kini adunay ngalan ni Jesukristo. Busa kini tingali mao gayod ang Simbahan ni Jesukristo! Gusto ni Jamesi nga mosunod ni Jesus.
“Mahimo ba nga mobalik kita diri pag-usab sunod semana?” Nangutana si Jamesi.
Mipahiyom si Mama ug Papa. “Naghunahuna kami sa samang butang,” miingon si Mama.
“Yey!” Misinggit si Unaisi.
Mingisi si Jamesi. Siya nakahibalo nga nakakaplag sila og usa ka espesyal nga butang. Ug dili na siya makahulat pa nga makat-on pa og dugang.
Paghulagway ni Bethany Stancliffe