Sayon sa Magbabasa
Tam-is ug Yano nga mga Pulong
Usa ka tinuod nga istorya gikan sa USA.
Mipahiyom si Kaci sa dihang milingkod siya sa Primary. Karon mao ang pagpasundayag sa mga bata diha sa miting sa sakramento. Makahadlok ang pagsulti sa iyang parte, apan nahimo niya kini!
Si Sister Dench, ang presidente sa Primary, mibarog sa atubangan. “Maayo ang inyong gibuhat sa miting sa sakramento karon!” miingon siya. “Kahibalo ko nga ang matag usa naningkamot og maayo aron makat-on sa inyong parte.”
“Gawas lang ni Kaci,” usa sa mas magulang nga mga batang lalaki ang misulti. “Walay bisan usa nga nakasabot kon unsa ang iyang gisulti.”
Si Sister Dench mikusmod sa batang lalaki, dayon milingi aron mopahiyom ni Kaci. “Maayo ang imong gibuhat.”
Naningkamot si Kaci nga dili makahilak. Gibuhat niya ang labing maayo aron makat-on sa iyang parte. Apan usahay ang iyang mga pulong dili sakto ang pagkasulti.
Sa ilang pagpauli, si Kaci dili na makapugong sa iyang mga luha.
“Unsay problema?” Nangutana si Mama.
“Usa sa mga batang lalaki ang nagbugal-bugal nako. Miingon siya nga wala nako matarong og sulti ang akong parte.” Nagsugod siya sa paghilak og maayo.
“Maayo ang imong nahimo. Si Papa ug ako mapagarbohon kaayo nimo,” miingon si Mama. “Nakahibalo ka ba kon si kinsa pa ang mapagarbohon nimo?”
Milingo-lingo si Kaci.
“Ang Langitnong Amahan,” miingon si Mama. “Nakahibalo Siya nga imong gibuhat ang imong labing maayo.”
Mas naarang-arang na ang gibati ni Kaci. Gusto niyang gamiton ang iyang mga pulong aron magmalipayon usab ang ubang tawo.
Sa eskwelahan, gisultihan ni Kaci ang iyang magtutudlo nga maayo kaayo ang iyang gibuhat sa pagtudlo.
Sa panimalay, si Papa nag-ayo sa estante. Gisultihan siya ni Kaci nga maayo kaayo ang iyang gibuhat sa pagpanindot sa ilang balay.
Sa gawas, si Kaci ug ang iyang igsoong lalaki nagdula og bola. Si Kaci miingon kaniya nga maayo kaayo ang iyang gibuhat sa paglabay.
Ang pagsulti sa mga tawo nga maayo kaayo ang ilang gibuhat nakapahimo ni Kaci nga mobati og nindot sa sulod. Kon makakita siya sa uban nga magpahiyom, siya nakahibalo nga ang iyang yano nga mga pulong nakahimo og dako nga kalainan!
Mga paghulagway pinaagi ni Greg Paprocki