Ko e Palopalema ʻi he Uasí
“ʻOku ʻikai ke ke toe vaʻinga koe mo kimautolu!” Ko Liami ange ia.
Ko ha talanoa moʻoni mei he USA.
Naʻe fakaava ʻe Viliami ʻa e kofukofú pea puke hake hono uasi ngingila foʻoú. Naʻe faifai pea maʻu mai! Naʻá ne fuʻu fiefia ʻaupito. Naʻá ne ngāue mālohi ke maʻu ʻa e paʻanga ke fakatau mai ʻakí, pea naʻe ʻaonga ia.
Naʻá ne fakamaʻu ʻa e uasí ki hono fasiʻanimá pea kamata ke ne lomi ʻa e mataʻiuasí. Naʻe lahi ʻaupito ha ʻū keimi fakalata ai! Naʻá ne lomiʻi ʻi ha keimi tainasoa pea kamata ke ne vaʻinga.
ʻI he ʻaho hono hokó ʻi he mālōlō siʻí, naʻe fakaʻaliʻali ange ʻe Viliami hono uasí ki hono kaungāmeʻa ko Liamí. “Tāmani, tika moʻoni!” Ko Liami ange ia. Naʻá ne sio ki he keimi ai ʻa Viliamí. Naʻá ne ʻeke ange leva, “Ke fie vaʻinga ʻaka pulu ʻi he taimí ni?”
Naʻe pehē ange ʻe Viliami, “Mahalo pē ʻanai ange.” Naʻe lele ʻa Liami ʻo vaʻinga, pea tangutu ʻa Viliami ʻi ha lalo ʻakau ke vaʻinga ʻi he keimi tainasoá.
ʻI he mālōlō siʻi ʻi he ʻaho hono hokó, naʻe toe vaʻinga pē ʻa Viliami ʻi hono uasí. Naʻe lele atu ʻa Liami ki ai. “Te ke haʻu ʻo vaʻinga?”
Na‘e sio hake ʻa Viliami mei hono uasí. “ʻIkai, ʻoku ou fie vaʻinga au ʻi he foʻi keimi ko ʻení. Mahalo pē ʻanai.”
Naʻe fakafulofula ʻa Liami. “Ka ʻoku tau vaʻinga ʻaka pulu maʻu pē ʻi he mālōlō siʻí!”
Naʻe pehē ange ʻe Viliami, “ʻOku ou fie fakaʻosi au ʻa e foʻi keimi ko ʻení.”
Naʻe tafoki ʻa Liami ʻo ʻalu.
Naʻe hoko ʻa e meʻa tatau ʻi he ʻaho hono hokó. Mo e ʻaho hono hokó. ʻI heʻenau heka pasi foki ki ʻapí, naʻe tangutu ʻa Liami ʻi he tafaʻaki ʻo Viliami. “Ko e hā naʻe ʻikai te ke haʻu ai ke tau vaʻinga ʻi he ʻaho ní?”
Naʻe pehē ange ʻe Viliami, “Naʻá ku vaʻinga vave pē ʻi he foʻi keimi heʻeku uasí. ʻOku ofi ʻaupito ke u hiki ki he lēvolo hokó.”
Naʻe kūnima ʻa Liami. “ʻOkú ke vaʻinga maʻu pē ʻi ho uasí. ʻOku ʻikai pē ke ke toe vaʻinga koe mo kimautolu!”
Naʻe ongoʻi ʻe Viliami ʻoku vevela hono matá. Naʻá ne talaange, “Ko e mālōlō siʻí pē ʻa e taimi ʻi he akó ʻoku ou lava ʻo keimi aí.” Naʻe fakaʻau ke leʻolahi ange hono leʻó. “ʻOku ou faʻiteliha pē au heʻeku meʻa ʻoku fai ʻi he mālōlō siʻí!”
Naʻe mata mamahi ʻa Liami. “Tā ʻoku ʻikai ke ta toe kaungāmeʻa kitaua!”
Hili iá naʻe ʻikai ke toe lea ʻa Viliami. Naʻá ne tafoki ki he matapā sioʻatá ke ʻoua ʻe lava ʻa Liami ʻo sio ange ki hono fofongá. Naʻá ne loʻimataʻia.
ʻI he tuʻu ʻa e pasí ʻi he feituʻu ke hifo ai ʻa Viliamí, naʻá ne lele ki ʻapi ʻi he vave taha naʻá ne lavá. Naʻá ne tō tangutu hifo ki he seá pea kamata ke ne tangi. Naʻá ne fakaʻamu naʻe ʻikai ke ne fakatau hono uasí.
“Ko e hā ʻa e meʻa ʻoku hokó?” Ko e fehuʻi ange ia ʻa e Fineʻeikí.
Naʻe mihimihi pē ʻa Viliami. “Naʻe talamai ʻe Liami ia he ʻikai ke ma toe kaungāmeʻa koeʻuhí ʻoku ou vaʻinga maʻu pē au ʻi hoku uasí.”
Naʻe tangutu hifo ʻa Mami ʻi hono tafaʻakí. “ʻOku hangē ʻokú ne fakakaukau ʻoku lahi ange ho tokanga ʻa koe ki ho uasí ʻi hoʻo tokanga ange ki aí.”
“ʻOku ʻikai ke moʻoni ia!”
“ʻOku ou ʻilo ʻokú ke tokanga kia Liami.” Naʻe fāʻofua ange ʻa Mami kiate ia. “Ka ʻe lava ʻi he founga ʻoku tau fakaʻaongaʻi ki ai hotau taimí ʻo fakahaaʻi ʻa e meʻa ʻoku tau pehē ʻoku mahuʻinga tahá.”
Naʻe fakakaukau ʻa Viliami ʻi ha kiʻi taimi siʻi. “ʻOku mahuʻinga ange ʻa e kakaí. Kae meʻa ní he ʻikai ke u lava au ʻo vaʻinga foki ʻi hoku uasí?”
“Te ke lava nai ʻo fakakaukau ki ha founga ke fakahoko ai iá?” Ko e fehuʻi atu ia ʻa Mamí.
Naʻe kamokamo ʻa Viliami. “Mahalo te u lava ʻo vaʻinga ʻaka pulu mo Liami ʻi he mālōlō siʻí, pea vaʻinga taimi siʻi pē ʻi hoku uasí heʻeku foki mai mei he akó.”
“Ko ha fakakaukau lelei ia.”
ʻI he ʻaho hono hokó, naʻe maʻu ʻe Viliami ʻa Liami ʻi he mālōlō siʻí. Naʻá ne talaange, “Fakamolemole ʻi he fuʻu lahi ʻeku vaʻinga ʻi hoku uasí. ʻE lava ke ta toe vaʻinga ʻaka pulu mo koe?”
Naʻe malimali ʻa Liami. “ʻIo!”
ʻI he hokosia ʻa e taimi ʻa Viliamí, naʻá ne ʻakahi ʻa e pulú pea lele ʻi he vave taha naʻá ne lavá. Naʻá ne lava ʻo fanongo ki he kaikaila ʻa Liamí.
ʻE lava pē ke tatali hono uasí. Naʻe fakafiefia ke feohi mo hono kaungāmeʻá.
ʻŪ tā fakatātā ʻa Melissa Manwill Kashiwagi