Laukonga Faingofua
Ko e Kūkisi Fakaʻilonga Tohí
Ko ha talanoa moʻoni mei he USA.
“ʻE lava ke u kai ʻa e kūkisi fakaʻosí?” Ko e fehuʻi ange ia ʻa Siakí.
Naʻe pehē ange ʻe Mami, “Tuku ia ki ʻapongipongi. Kuo taimi ʻa e mohé.”
Naʻe fakatoupīkoi ʻa Siaki. Naʻá ne fufulu hono nifó. Tui hono vala mohé. Pea naʻá ne kei fakakaukau pē ki he kūkisí.
Naʻá ne ʻalu ki peito ke inu ha meʻi vai. Naʻe faʻo ʻa e kūkisí ʻi ha milemila ʻi he veʻe singí. Naʻe ʻikai ke sio mai ha taha.
Naʻe toʻo ia ʻe Siaki pea lele fakavave ki hono lokí. Naʻá ne toʻo hake ʻa e kūkisí mei he milemilá peá ne uʻu. Ifo.
Naʻá ne fanongo leva ki ha taha ʻoku lue mai. Ko hono tokouá! Naʻe pūlou ʻa Siaki hono kafú.
“Ko e hā hoʻo meʻa ʻoku faí?” Ko e fehuʻi ange ia ‘a Talevá.
Naʻe maʻu ʻe Siaki ha tohi ʻi he loto kafú. “ʻOi … laukonga.”
Naʻe fusiʻi ʻe Taleva ʻa e kafú meia Siaki. “Mo e kūkisi?”
Naʻe talaange ʻe Siaki, “ʻOku ou fakaʻaongaʻi ia ʻe au ke fakaʻilongaʻi ʻaki ʻa e tohí.”
Naʻe hū mai foki mo Mami. “Kūkisi ke fakaʻilonga ʻaki ʻa e tohí?”
Naʻe fusi hake ʻe Siaki ʻa e kafú. Naʻá ne fakaʻamu ʻe ʻalu ʻa Mami mo Taleva. Naʻe ʻikai.
Naʻe kula mumū ʻa e mata ʻo Siakí. Naʻá ne fakasiosio hake mei he kafú. “Naʻá ku toʻo ʻa e kūkisí ke u kai.”
Naʻe pehē ange ʻe Mami, “Mālo ʻaupito hoʻo lea totonú.”
Naʻe fakafulofula ʻa Siaki. “Ka ʻoku ʻikai ke u ongoʻi fiemālie.”
Naʻe tangutu hifo ʻa Mami ʻi he mohengá. “ʻE lava ke tokoni hono lotua ha fakamolemolé. ʻE lava ʻa Sīsū Kalaisi ʻo tokoni atu ke ke toe ongoʻi nonga.”
Naʻe tūʻulutui ʻa Mami mo Taleva ʻo lotu mo Siaki. Naʻá ne kole fakamolemole ʻi heʻene toʻo ʻa e kūkisí pea loí.
ʻI heʻene ʻosí, naʻe malimali ʻa Siaki. “Ei, ʻoku ou ongoʻi fiemālie ange!” Naʻá ne ʻoange ʻa e kūkisí kia Mami. “Pea ʻoku ou tui ʻe toe ifo ange ia ʻapongipongi!”
ʻŪ tā fakatātā ʻa Samya Zitouni