Tohi ʻe Koe
Lotu Mālohi Ange
Ko e lelei tahá ʻa e pongipongi Sāpaté koeʻuhí ʻoku ʻuhinga ia ko e fakapaku mā sinamoni (French toast)! ʻOku tuku ʻe heʻeku faʻeé ke u heu ʻa e fuaʻimoá mo tuku ʻa e maá ki he fakapakú. Ko e meʻatokoni pongipongi pē ia ʻe taha ʻoku fakafiefia taha kiate aú.
ʻI ha Sāpate ʻe taha, naʻá ku fakatokangaʻi naʻe lōngonoa ʻa e peitó. Naʻe ʻikai ke u lava ʻo nāmuʻi ʻa e sinamoni ʻokú ne kāpui ʻa e falé ʻi he ngaahi ʻaho Sāpate kehé. Ko e taimi ia naʻá ku sio ai ki aí: ko e kiʻi tohi lanu pingikī fakamamahi ʻi he ʻaisí. Naʻe pehē ai, “Sāpate ʻAukai.”
Naʻe hū mai ʻeku faʻeé ki tuʻa ke fakamanatu mai ko e Sāpate ʻaukai. Naʻá ku loto-mamahi ʻaupito. Naʻá ku kei fie kai mā fakapaku pē!
Naʻe fakatangutu au ʻe heʻeku faʻeé ʻi he seá pea fāʻofua mai kiate au. Naʻá ne talamai ʻoku tokoni ʻa e ʻaukaí ki hotau vā fetuʻutaki mo e ʻOtuá pea ʻokú ne ʻomi ke tau ofi ange kia Sīsū Kalaisi. Naʻá ku toe ako foki ko e ʻaukaí ko ha founga ia ke fakamālohia ai ʻetau ngaahi lotú. ʻOku hangē ia hano tānaki ha mālohi ki heʻetau lotú.
Naʻe ʻikai ke u fakakaukau naʻe makehe pehē ʻa e ʻaukaí. Naʻe fakafokifā ʻeku toe ongoʻi fiefiá. Ka ko e taimi ko ʻení naʻe ʻikai ko e ʻuhingá ko e mā fakapakú. Ka ko e ʻuhingá ko e ʻaukaí! Naʻá ku fakamālō ki heʻeku faʻeé peá u lele ki hoku lokí. Naʻá ku tangutu ʻo fakakaukau pe ko hai ha taha naʻá ne fiemaʻu ke u ʻaukai maʻana ʻi he ʻaho ko iá. Naʻe pau ke u ʻai ke ʻaonga ia koeʻuhí he ko ha lotu makehe ʻeni. Ko ha lotu ia ʻoku mālohi ange, ko ha lotu ʻoku toe tānaki atu ki ai ha mālohi koeʻuhí naʻá ku ʻaukai.
Naʻá ku tūʻulutui ʻo fakamaʻu ʻeku ʻaukaí. Hili hono fai ʻeku lotú, naʻá ku ongoʻi fiefia, pea ʻikai ke u toe fiekaia. Naʻá ku fāʻofua ki heʻeku faʻeé, peá u fakamālō ange ʻi heʻene akoʻi au fekauʻaki mo e ʻaukaí. Naʻá ku ongoʻi nonga ʻi he toenga ʻo e ʻahó. ʻI he ʻosi ʻa e ʻahó, naʻá ku vete ʻeku ʻaukaí ʻaki ha lotu. Kuo teʻeki ai ke ifo pehē ʻa e meʻakaí!
ʻŪ tā fakatātā ʻa Xavi Ramiro