Fakamoʻoni ʻi he Taimi Mālōlō Siʻí

Fai ʻe Kate Anderson

Naʻe haʻu ha fakakaukau kia Souī: Taukaveʻi ʻa e meʻa ʻokú ke tui ki aí.

Ko ha talanoa moʻoni mei ʻAositelēlia.

Ko ha kiʻi taʻahine ʻokú ne toʻotoʻo ha sanuisi ʻo lue fakalaka atu ʻi ha ongo tamaiki fefine ʻokú na tangutu ʻi ha tēpile kai hoʻatā

Ko e taimi mālōlō siʻi ʻeni ʻi he akó. Naʻe toʻo ʻe Souī ʻene sanuisí pea lue atu ki he tēpilé. Naʻe ulo mai ʻa e huelo ʻo e laʻaá ʻi he matapā sioʻatá ʻo malama hifo ʻiate ia. Ko ha ʻaho māfana ia, pea naʻe ongoʻi fiefia ʻa Souī.

Naʻe talanoa ʻa e tokotaha kotoa pē, pea naʻe longoaʻa ʻa e loki akó ʻi he leʻo ʻo e fānau fiefiá. Naʻe tangutu hifo ʻi he tafaʻakí ha kiʻi taʻahine ko Luna mo hono kaungāmeʻa ko Sesi.

“Ko ha Kalisitiane koe?” Naʻe fanongo atu ʻa Souī ki he fehuʻi ʻa Luna kia Sesí.

Naʻe ongoʻi ʻe Souī ʻoku kiʻi hohaʻa hono lotó. Naʻe faʻa lea taʻeʻofa maʻu pē ʻa Luna! Ko e hā nai ʻene lea hoko ʻe faí? Naʻe lōngonoa kotoa ʻa e lokí ʻi heʻenau fakafanongó.

Naʻe pehē ange ʻe Luna, “ʻOku ʻikai ke u tui kia Sīsū.”

Naʻe lea taha taha ʻaki ʻe he tamaiki tokolahi ʻi he kalasi ʻa Souií ʻa e meʻa tatau.

Kiʻi taʻahine ʻoku mataʻi ilifia, ʻoku tangutu ʻi ha tēpile mo pukepuke ha sanuisi

Naʻe tā vave ʻa e mafu ʻo Souií ʻi he taimí ni. Naʻá ne fie loto-toʻa mo pehē naʻá ne tui kia Sīsū Kalaisi, ka naʻá ne manavasiʻi ki he meʻa ʻe hokó. Ko e hā ʻa e fakakaukau ʻa e tokotaha kotoa pē? ʻE mole nai hono ngaahi kaungāmeʻá?

Fakafokifā pē naʻá ne maʻu ha ongo fakamāfana mo nonga. Naʻe haʻu ha fakakaukau ki hono ʻatamaí: Taukaveʻi ʻa e meʻa ʻokú ke tui ki aí. Te u maluʻi koe. Naʻe ʻiloʻi ʻe Souī naʻe haʻu ia mei he Laumālie Māʻoniʻoní.

Taʻahine ʻoku tangutu ʻi he loki kai hoʻataá ʻo talanoa ki ha ongo tamaiki fefine

Naʻá ne mānava lōloa. Naʻá ne pehē, “ʻOku ou tui kia Sīsū Kalaisi. Pea ʻoku ou ʻilo ʻokú Ne ʻofa mai kiate au. ʻOkú Ne ʻofa foki ʻiate koe, neongo kapau ʻoku ʻikai ke ke tui kiate Ia.”

Naʻe fakaʻau ke mālohi ange ʻa e ongoʻi māfaná. Naʻe ongoʻi fiefia ʻa Souī ʻi hono lotó.

Naʻe ʻikai fuoloa kuo ʻosi ʻa e taimi mālōlō siʻí, pea kuo taimi ʻa e vaʻinga ʻi tuʻá. Naʻe punopuna atu ʻa Souī ki he malaʻe vaʻingá. Naʻe muimui atu ha niʻihi ʻo e fānau ʻi heʻene kalasí ʻiate ia.

Naʻe pehē ange ʻe ha taʻahine ʻe taha, “Naʻá ku saiʻia hoʻo meʻa naʻe talaange kia Luná.”

Naʻe pehē ange ʻe ha tamasiʻi ʻe taha, “Mo au pē. Te u lava fēfē mo au ʻo tui kia Sīsuú?”

Naʻe malimali ʻa Souī. “Te ke lava ʻo ʻalu ki he lotú pea lau ʻa e folofolá ke ako lahi ange ʻo kau kiate Ia! Pea te ke lava ʻo feinga mālohi ke muimui ki he meʻa naʻá Ne akoʻí.”

Naʻe fiefia ʻa Souī ʻi heʻene maʻu ʻa e loto-toʻa ke vahevahe ʻa e meʻa naʻá ne tui ki aí. Naʻá ne ʻiloʻi ʻe ʻi ai maʻu pē ʻa Sīsū Kalaisi ke tokoniʻi ia ke ne loto-toʻa.