Ko Hono Langa ʻo e Temipale Ketilaní

Ko Siosefa Sāmita mo ha niʻihi kehe ʻoku nau tuʻu ʻo sio ki ha konga kelekele ʻataʻatā

Naʻe fakahā ʻe he ʻEikí kia Siosefa Sāmita kuo taimi ke langa ha temipale ʻi Ketilani, ʻOhaiō, USA. ʻE hoko ia ko ha feituʻu makehe ʻe ʻaʻahi ai ʻa e ʻEikí ki Hono kakaí pea fakahoko ha ngaahi palōmesi mo kinautolu.

Ko e kamata ke langa ʻe he kakaí ʻa e Temipale Ketilaní

Naʻe kamata ke langa ʻe he Kāingalotú ʻa e temipalé. Naʻe lahi ʻaupito ʻa e fakamole fakapaʻanga mo e ngāue ki aí. Ka naʻa nau fiefia ke maʻu ʻa e ngaahi tāpuaki ʻa e ʻEikí.

Ko ha tangata ʻoku lotu mo ha kau ngāue ofi mai

ʻI he ngāue ʻa e Kāingalotú ʻi he temipalé, naʻe kamata ke ʻosi ʻenau paʻangá. Naʻa nau lotu ki he ʻOtuá ki ha tokoni.

Ko ha fefine ʻi ha saliote ʻoku sio ki he Temipale Ketilani ʻoku teʻeki ʻosí

Naʻe fakahaofi ʻe ha fefine ko Kalolaine Tīpeti mo hono fāmilí ha paʻanga lahi ʻaupito. Naʻa nau fakaʻatā ke nō ʻe he Siasí ha paʻanga ke tokoni ke langa ʻa e temipalé.

Ko e fānau ʻoku nau tānaki ipu sioʻata ʻi ha ʻū kato ʻi muʻa ʻi he Temipale Ketilani kuo ʻosi kamata langá

Naʻe ngāue mālohi ʻa e Kāingalotú. Naʻe fakaʻuli ha niʻihi ʻi ha ʻū saliote fonu ʻi he maká. Naʻe ngaohi ʻe ha niʻihi ha vala mo e meʻakai maʻá e kau ngāué.

Naʻe tānaki ʻe he fānaú ʻa e ʻū kongokonga sioʻata kuo mafahifahí ke momosi pea fakapipiki ki he holisi ʻo e temipalé ke fetapaki ʻi he ulo ʻa e laʻaá.

Kakai ʻoku nau sio ki he Temipale Ketilani kuo ʻosí

Naʻe ʻikai fuoloa kuo ʻosi ʻa e temipalé! Naʻe fiefia ʻa e Kāingalotú ke nau ō ki he fale ʻo e ʻEikí ke maʻu ʻa e ngaahi tāpuaki naʻá Ne talaʻofa kiate kinautolú.