Ngaahi ʻEkitivitī ʻo e Haʻu, ʻo Muimui ʻIate Aú

26 Mē–1 Sune: Tokāteline mo e Ngaahi Fuakava 51–57

Taimi Talanoá

Taʻahine mo ha kiʻi tamasiʻi ʻokú na lau fakataha ha tohi ʻi he musié ʻi ha ʻaho laʻā

Naʻe kole ʻe he Fakamoʻuí kia Siosefa Sāmita ke tuku ha ʻū tohi lelei ʻi he ngaahi ʻapiako ʻa e Siasí ke lava ʻa e fānaú ʻo ako ʻa e meʻa ʻokú Ne finangalo ke nau akó (vakai, Tokāteline mo e Ngaahi Fuakava 55:4). Fili ha tohi pe talanoa ʻokú ke saiʻia taha ai. Taufetongi ʻi hono lau mo vahevahe ʻa e meʻa naʻá ke akó.

2–8 Sune: Tokāteline mo e Ngaahi Fuakava 58–59

Ngaahi Tāpuaki ʻo e Sāpaté

Lau ʻa e Tokāteline mo e Ngaahi Fuakava 59:9–19 pea talanoa ki he founga ʻoku tāpuekina ai kitautolu ʻi heʻetau tauhi ʻa e ʻaho Sāpaté ke māʻoniʻoní. Hili iá pea vakai ki he peesi 13 ʻo fili ha ʻekitivitī ke fakahoko.

9–15 Sune: Tokāteline mo e Ngaahi Fuakava 60–63

Kumi pea Lea

Taʻahine ʻoku tuʻu ʻo kuikui mo pukepuke ʻa e folofolá, pea tuhu ki he fānau ʻoku tangutu takai ʻiate ia

ʻOku finangalo ʻa e ʻOtuá ke tau lea tokanga fekauʻaki mo e ngaahi meʻa toputapú (vakai, Tokāteline mo e Ngaahi Fuakava 63:64). Tuʻu fuopotopoto ‘i ha kulupu, pea tuʻu ha tokotaha ʻi loto mālie, ʻo pukepuke ha folofola. ʻE kuikui ʻa e tokotaha ko iá, vilo, pea tuhu ki ha taha. ʻE vahevahe ʻe he tokotaha ʻokú ne filí ha potufolofola mo e toengá.

16–22 Sune: Tokāteline mo e Ngaahi Fuakava 64–66

Ko ha ʻAtamai Fie [Ngāue]

Ko ha kiʻi taʻahine mo ha tamasiʻi ʻokú na faʻo ha makasini Ko e Kaumeʻá mo ha tamapua sipi meʻavaʻinga ʻi ha kato

ʻOku finangalo ʻa e ʻEikí ke tau maʻu ha loto mo e ʻatamai fie [ngāue] (vakai, Tokāteline mo e Ngaahi Fuakava 64:34). Te tau lava ʻo fakaʻaongaʻi ha taimi ke fakakaukau ai kia Sīsū Kalaisi ke haʻu ʻo ofi ange kiate Ia! ʻOmi ha kato ke ne fakafofongaʻi ho ʻatamaí. Faʻo ha ʻū meʻa ʻi loto ʻi he kató ʻe tokoni atu ke ke fakakaukau ki he Fakamoʻuí.

23–29 Sune: Tokāteline mo e Ngaahi Fuakava 67–70

ʻŪ Meʻaʻofa maʻá e Ngaahi Kaungāmeʻá

Taʻahine ʻokú ne pukepuke ha peleti kūkisi mo ha kaati naʻe tohinima

ʻOku tau ako ʻi he folofolá ʻa e founga ʻoku mahuʻinga ai ke maʻu ha ngaahi kaungāmeʻa “angatonu mo falalaʻanga” ke nau tokoniʻi kitautolu ke tau muimui kia Sīsū Kalaisi (vakai, Tokāteline mo e Ngaahi Fuakava 69:1–2). Ngaohi ha meʻaʻofa ke foaki ki ha kaungāmeʻa! Te ke lava ʻo tā valivali ha fakatātā, ngaohi ha vesa, pe taʻo ha kiʻi fakaneifua. Fai ha kiʻi tohi mo hoʻo meʻaʻofá ke talaange ki ho kaungāmeʻá ʻokú ke ʻofa ʻiate ia.