“Ko Hono Vahevahe ʻo e Fiefiá,” Ko e Kaumeʻá, Mē 2025, 30–31.
Kau Paionia ʻi he Fonua Kotoa Pē
Ko Hono Vahevahe ʻo e Fiefiá
Naʻe pehē ange ʻe ʻEniselo, “Ko ha foʻi hiva ia mei hoku Siasí.”
Ko ha talanoa moʻoni mei ʻĀsenitina.
Naʻe kaka hake ʻa ʻEniselo ʻi he salioté ki he tafaʻaki ʻo Papá. Naʻe patō leʻosiʻi ʻa e ngaahi hina huʻakau ʻi muí ʻi he lele ki muʻa ʻena hōsí. Naʻe ulo ʻa e laʻaá, pea naʻá ne fakamanatu ange ʻa e foʻi hiva naʻá ne saiʻia taha aí.
Naʻe hiva ʻa ʻEniselo ʻo pehē, “Fiemaʻu ʻe Sīsū ke u ulo hangē ha hueló.”
ʻI he ngaahi māhina siʻi kuohilí, naʻe papitaiso ai ʻa ʻEniselo. Naʻe papitaiso foki mo Mama mo hono kiʻi tehina ko ʻOsikaá. Naʻe ʻikai ke kau ʻa Papa ki he Siasí, ka naʻá ne fiefia maʻanautolu. Naʻe kei manatuʻi pē ʻe ʻEniselo ʻa e ongo naʻá ne maʻu ʻi heʻene ʻalu hake mei he vaí. Naʻe hangē ia ko e ongo māfana ʻa e laʻaá ʻi hono tuʻá, ka naʻá ne ongoʻi ia ʻi hono lotó.
Naʻe kei hiva pē ʻa ʻEniselo kiate ia ʻi hono taʻofi ʻe Papa ʻa e salioté ʻi tuʻa ʻi he fale ʻo Señora Perez (Seniola Pelesi). Naʻe hopo hifo ʻa ʻEniselo ʻo toʻo mai ha foʻi hina huʻakau mei mui. Naʻe kau ʻa Seniola Pelesi ʻi he kau kasitomā hono fāmilí.
Naʻá ne pehē ange, “Tiliva!”
Naʻe ngāue ʻa Seniola Pelesi ʻi heʻene ngoué. Naʻá ne toʻo ʻa e foʻi hiná mo pehē ange, “Mālō.” Naʻá ne ʻoange ki ai ha silini maka. “Ko e hā ʻa e foʻi hiva naʻá ke hivaʻí?”
Naʻe ongoʻi ʻe ʻEniselo ʻoku māfana hono kouʻahé. Naʻe ʻikai ke ne fakatokangaʻi ne fanongo ange ʻa Seniola Pelesi kiate ia!
Naʻe pehē ange ʻe ʻEniselo, “Ko ha foʻi hiva ia mei hoku Siasí. Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.”
Naʻe malimali ʻa Seniola Pelesi. “Oku hā kapau te ke fakamatalaʻi mai ai ha meʻa fekauʻaki mo ho siasí?”
ʻI ha kiʻi taimi siʻi, naʻe ʻikai fakapapauʻi ʻe ʻEniselo ʻa e meʻa ke lea ʻakí. Peá ne pehē ange leva, “ʻOku mau tui ko e siasi tatau pē naʻe fokotuʻu ʻe Sīsū Kalaisi ʻi Heʻene kei moʻui ʻi he māmaní kuo toe ʻi heni ia.”
Naʻe pehē ange ʻe Seniola Pelesi, “Mālie. Kuo teʻeki ke u fanongo au ʻi ha siasi ʻoku tui ki he meʻa ko iá.”
Naʻe pehē ange ʻe ʻEniselo, “Mahalo pē te ke lava ʻo haʻu ʻi ha taimi. ʻOfa ke ke maʻu ha ʻaho lelei!” Naʻá ne lele leva kia Papa ke tokoni ʻi hono ʻave e toenga ʻo e huʻakaú.
ʻI he hengihengi Sāpaté, naʻe ʻā hake ʻa ʻEniselo. Naʻá ne lava ʻo fanongo ki he ngaohi meʻatokoni kai pongipongi ʻa Mama ʻi peitó.
Naʻe pehē ange ʻe ʻEniselo, “ʻOsikā, kuo taimi ke teuteu ki he lotú!”
Naʻe tui ʻe ʻEniselo mo ʻOsikā hona vala lotú peá na teuteu ke na mavahe. Naʻe meimei maile ʻe ua hono mamaʻo ʻo e falelotú. Ko ha lue lōloa ia, pea naʻe pau ai ke nau mavahe vave.
Naʻe pehē ange ʻe Papa ʻi heʻenau mavahé, “ʻOfa ke mou maʻu ha taimi fiefia.”
ʻI heʻenau lué, naʻe toe ngūngū pē ʻe ʻEniselo ʻa e foʻi hiva naʻá ne saiʻia taha aí. Naʻá ne ngūngū ʻi heʻenau fakalaka atu ʻi he ngaahi fale naʻá ne tufa ai ʻa e huʻakaú. Naʻá ne ngūngū ʻi heʻenau fakalaka atu ʻi he palepale fakatau fuaʻiʻakaú ʻi he māketí. Pea naʻá ne ngūngū pē ʻi heʻenau afe atu ki he hala naʻe tuʻu ai ʻa e falelotú.
ʻI heʻenau hū ki lotó, naʻe ʻohovale ʻa ʻEniselo. Naʻe ʻi ai ʻa Seniola Pelesi! Naʻá ne haʻu mo hono fāmilí kotoa.
“Naʻá ke haʻu ki he lotú!” Ko ʻEniselo ange ia.
Naʻe kamokamo pē ʻa Seniola Pelesi. Naʻá ne pehē ange, “Naʻe ueʻi fakalaumālie au ʻe hoʻo hivá. Naʻá ku tā telefoni ki hoʻo faʻeé ke maʻu ʻa e tuʻasilá. Naʻá ku fie haʻu ʻo ako fekauʻaki mo e siasí ni ʻiate au pē.”
Naʻe malimali ʻa ʻEniselo. Kuó ne vahevahe ʻa e ongoongoleleí ʻaki ʻene hivaʻi pē ha foʻi hiva. Naʻá ne fakaʻamu ʻe lava ke ongoʻi ʻe Seniola Pelesi ha fiefia ʻi hono lotó ʻi he ʻahó ni foki.
Ngaahi tā fakatātā ʻa Jomike Tejido