Loto-Falala ʻi he ʻAo ʻo e ʻOtuá

Fai ʻe Palesiteni Russell M. Nelson

Toʻo mei he “Loto-Falala ʻi he ʻAo ʻo e ʻOtuá,” Liahona, Mē 2025, 127–29.

ʻI he taimi ʻoku tau fakahoko mo tauhi ai ʻa e ngaahi fuakavá, te tau lava ʻo maʻu ha loto-falala mei he Laumālie Māʻoniʻoní. Te tau lava ʻo maʻu ha loto-falala ʻoku fanongo mo ʻofa ʻa e Tamai Hēvaní ʻiate kitautolu ʻo lahi ange ʻi he meʻa ʻoku lava ke mahino kiate kitautolú. Te tau lava ʻo maʻu ha loto-falala ʻokú Ne finangalo ke tokoniʻi kitautolu ke tau aʻusia ʻa e tuʻunga māʻolunga taha te tau malavá. ʻOku fakaava ʻe he manavaʻofá mo e angamaʻá ʻa e hala ke maʻu ai ʻa e loto-falala ʻi he ʻao ʻo e ʻOtuá!

Ko e manavaʻofa ki he kakai kotoa peé ko e fakaʻilonga ia ʻo e kau faʻa fakaleleí! Tau lotu muʻa ki he Tamai Hēvaní ke fakafonu hotau lotó ʻaki ʻa e ʻofa faka-Kalaisí.

ʻOku ngaohi ʻe he angamaʻá ʻa e meʻa kotoa ke lelei mo fakafiefia ange! Kapau ʻoku ʻi ai haʻo fakakaukau kovi, fakakaukau taʻeʻofa, pe ko ha fakakaukau fakamamahi, ʻe tuli ʻe he angamaʻá ʻa e ngaahi fakakaukau ko iá.

ʻOku fiemaʻu ʻetau fakakaukaú, leá, mo e ngāué ke fakafonu ʻaki ʻa e angamaʻa mo e ʻofa haohaoa ʻa Kalaisí ki he kakai fulipē. ʻOku ou fakaafeʻi kimoutolu ke mou tupulaki ʻi hoʻomou loto-falala ʻi he ʻao ʻo e ʻEikí.

Ako Ia

Tā pe hiki hoʻo ngaahi tali ki he ngaahi fehuʻi ko ʻení fekauʻaki mo e pōpoaki ʻa Palesiteni Nalesoní.

Te ke fakahaaʻi fēfē nai ʻa e manavaʻofá ki he niʻihi kehé?
Ko e hā ha meʻa lelei te ke lava ʻo fakakaukau ki ai kapau ʻoku haʻu ki ho ʻatamaí ha fakakaukau kovi, taʻeʻofa, pe fakamamahi?

Ko e potufolofola fē naʻe fakaʻaongaʻi ʻe Palesiteni Nalesoni ke akoʻi ʻaki ʻa e manavaʻofá mo e angamaʻá? (Tokoni: Te ke lava ʻo fakaʻaongaʻi hoʻo folofolá ke kumi kinautolu!)