Ko ʻEku Ngaahi Lea ʻi he Ongoongoleleí

Ko e fekaú ko ha meʻa ia ʻoku kole mai ʻe he Tamai Hēvaní ke tau fai koeʻuhí he ʻokú Ne ʻofa ʻiate kitautolu. Ko e ngaahi fekaú ko ha ngaahi fakahinohino ia ʻokú Ne ʻomi kiate kitautolu koeʻuhí ke tau lava ʻo fiefia mo foki kiate Ia ʻi ha ʻaho. ʻOku tāpuekina kitautolu ʻi heʻetau muimui ki Heʻene ngaahi fekaú.

ʻOku foaki mai ʻe he Tamai Hēvaní kiate kitautolu takitaha ʻo fakafou ʻi he Laumālie Māʻoniʻoní ha ngaahi meʻafoaki fakalaumālie ke faitāpuekina ai ʻa e niʻihi kehé. ʻOku ʻikai maʻu ʻe he tokotaha kotoa pē ʻa e ngaahi meʻafoaki tatau, ka ʻoku maʻu ʻe he tokotaha kotoa pē ha meʻafoaki fakalaumālie mei he ʻOtuá. Te ke lava ʻo lau fekauʻaki mo ha niʻihi ʻo e ngaahi meʻafoaki ko ʻení ʻi he Tokāteline mo e Ngaahi Fuakava 46:11–26.

Ko e fakamoʻoní ko e meʻa ia ʻokú ke tui pe ʻiloʻi ʻoku moʻoni fekauʻaki mo e Tamai Hēvaní, Sīsū Kalaisi, mo ʻEna ongoongoleleí.

Fakamālō ki he Fakalelei mo e Toetuʻu ʻa Sīsū Kalaisí, te tau lava ai ʻo maʻu ʻa e moʻui taʻengatá, ʻa ia ko hono ʻuhingá te tau moʻui ʻo taʻengata mo e Tamai Hēvaní, Sīsū, pea mo hotau ngaahi fāmilí.