Ko e Muimui kia Sīsū ʻi Malēsiá

ʻOku muimui ʻa Luke ʻia Sīsū Kalaisi ʻaki ʻene lotu mo fakafiemālieʻi ʻa e niʻihi kehé. ʻOkú ne saiʻia ke lotu mo hono fāmilí. ʻI ha taimi ʻe taha, naʻá ne faingataʻaʻia ʻi heʻene sivi sipela ʻi he lea faka-Siainá. ʻI he taimi naʻá ne akoako mo lotua ai ha tokoní, naʻá ne lava ʻo fakaʻosi ia.

ʻOkú ne saiʻia foki ke ʻalu ki he Palaimelí pea ako fekauʻaki mo e meʻa naʻe akoʻi ʻe Sīsū Kalaisí. ʻOkú ne pehē, “ʻOku ou fiefia ʻaupito ʻi he muimui kia Sīsuú.” ʻOkú ne saiʻia ke tokoni ki heʻene faʻeé ʻaki ʻene tokoni ʻi he ngaahi ngāue fakaʻapí pea mo hono tokangaʻi hono kiʻi tehiná ʻi he taimi ʻokú na vaʻinga ai ʻi tuʻá. ʻOkú ne pehē, “ʻI he taimi ʻoku ou tokoni ai ki he niʻihi kehé, ʻoku ou ongoʻi māfana ʻi hoku lotó.”

Taʻu: 7

Mei: Kuala Lamipā, Malēsia

Ngaahi Lea Fakafonuá: Faka-Pilitānia, Faka-Siaina, mo e Faka-Malēsia

Ngaahi Taumuʻá: 1) Maʻu ha ako fakaʻatamai. 2) Nofo mo hono fāmilí ʻo taʻengata.

Ngaahi Meʻa ʻOku Manako Aí: Ko hono akoʻi mo tokoniʻi e niʻihi kehé, heka sikutá, mo e laukongá

Fāmilí: Mami, Teti, tehina ʻe taha, mo ha tuofefine siʻisiʻi ʻe toko taha

Talanoa Mei he Folofolá: ʻI he taimi naʻe ʻaloʻi ai ʻa Sīsū ʻi ha fale ʻo e fanga monumanú (vakai, Luke 2:7)

Fuaʻiʻakau mo e vesitapoló: Moli manitalini mo e kāloti

Meʻakaí: Nasi lemak (laise huʻakau-niu)

ʻAho Mālōloó: Kilisimasi

Lanú: Kulokula

Hiva Palaimelí: “Ko e Hiva ʻAloʻí” (Tohi Hiva ʻa e Fānaú, 32)