“Muimui ʻi he Ngaahi Lea Fiefiá,” Ko e Kaumeʻá, Mē 2025, 44–45.
Laukonga Faingofua
Muimui ʻi he Ngaahi Lea Fiefiá
Ko ha talanoa moʻoni mei USA.
Naʻe ʻeke ange ʻe Kuini kia Mami. “ʻE lava ke tau ō ʻo tā fakatātā ʻaki ʻa e sioka?”
Naʻe pehē ange ʻe Mami. “ʻIo. Tau ō!”
Naʻe lele ʻa Kuini mo hono kiʻi tehiná mo hono tuofefiné ki tuʻa.
Naʻe kaila ʻa Kuini, “ʻOku ou fiemaʻu ʻa e lanu puluú!”
Naʻe toʻo mai foki ʻe Keti mo Kolouī ʻa ʻena foʻi sioka. Naʻa nau tangutu hifo ʻo kamata tā fakatātā ʻi he saitiuoká. Naʻe toʻo hake ʻe Mami ha foʻi sioka lanu kulokula ʻo kamata tohi.
Naʻe ʻeke ange ʻe Kuini, “Ko e hā ho meʻa ʻoku faí?”
Naʻe pehē ange ʻe Mami, “ʻOku ou tohi ha ngaahi lea fakafiefia maʻá e fānau akó ʻi he taimi te nau lue ai ki ʻapi ʻi he ʻaho ní.”
Naʻe lava ke sio ʻa Kuini ki he ʻapiakó mei hono matapā sioʻata ʻi muʻá. Naʻá ne saiʻia ke taʻataʻalo ki he fānaú ʻi heʻenau lue haké.
Naʻe ʻeke ange ʻe Mami, “Ko e hā ha ngaahi pōpoaki te tau lava ʻo tohi ke nau malimali ai?”
Naʻe lau ʻe Kuini ʻi heʻene sio fakalaka atu ʻi he uma ʻo Mamí. “ʻOkú ke …”
“Tōatu!” Naʻe fakaʻosi ange ʻe Mami.
Naʻe malimali ʻa Kuini pea hoko atu ʻene laukongá. “ʻOkú ke loto-toʻa. Te ke lava ʻo fai ia!”
Fakafokifā kuo maʻu ʻe Kuini ha foʻi fakakaukau. Naʻe kamata ke ne tā ha laine lōloa ʻi ha taha ʻo e ngaahi pōpoaki ʻa Mamí. Naʻá ne tā ha laine ki he pōpoaki hokó. Naʻá ne tā hake leva ki ha pōpoaki ʻe taha.
Naʻe ʻeke ange ʻe Mami. “Ko e hā hoʻo meʻa ʻoku faí?”
Naʻe pehē ange ʻe Kuini, “ʻOku ou tā ha laine ke lue ai e fānaú.” Naʻe kamata ke ne lele ʻi he lainé. “Sio? ʻOku ou fakaʻaliʻali ange kiate kinautolu ʻa e feituʻu ke nau maʻu ai ʻa e ngaahi lea fakafiefia kotoa pē.”
Naʻe pehē ange ʻe Mami, “ʻOku ou pehē ko ha founga lelei ia ke malimali ai e taha kotoa.” Pea naʻe toe malimali lahi ange ai ʻa Kuini.
Ngaahi tā fakatātā ʻa Asya Aizenstein