Ko Ho Sinó Ko ha Meʻaʻofa!

ʻOku maʻu e ngaahi sino fakamatelié ʻi he lalahi, fōtunga, meʻa ʻoku malava, mo e lanu kehekehe. Ko e sino kotoa pē ko ha meʻaʻofa fakaofo ia mei he ʻOtuá pea ko ha konga mahuʻinga ia ʻo ʻEne palaní!

ʻOku taau ke fakaʻapaʻapaʻi ʻa e sino kotoa pē. Lea ʻofa fekauʻaki mo ho sino ʻoʻoú mo e niʻihi kehé. Mahalo ʻe lea taʻeʻofa ʻa e kakaí fekauʻaki mo koe, ka ʻoku ʻikai fiemaʻu ia ke ke tui kiate kinautolu pe tokanga taha ki heʻenau ngaahi leá.

Ko ho sino fakamatelié ko e temipale ia ki ho laumālié. ʻOku mahuʻinga e meʻa ʻokú ke faʻo ki ho sinó mo ho ʻutó! Te tau lava ʻo tokangaʻi hotau sinó ʻaki ʻetau kai ʻa e meʻakai fakatupu moʻui leleí, fakamālohisinó, mo e maʻu ha mohe feʻungá.

Te tau lava ʻo tokangaʻi hotau laumālié ʻaki ʻetau fakafanongo ki he Laumālie Māʻoniʻoní, lotu, mo fili ʻa e totonú.

Ko e tokolahi taha ʻo e kakaí ʻoku nau maʻu ha ngaahi hui ʻe 200 tupu. ʻOku poupouʻi mo maluʻi ho sinó ʻe hoʻo ngaahi huí. ʻOku tokoni ho ngaahi uouá ke ke ngāue, lue, mo lele.

ʻOku fakaava mo tāpuni tuʻo 100,000 ʻa e ngaahi vaolo (valve) ʻi ho mafú ʻi he ʻaho. ʻOku tokoni ʻeni ke pamu ʻa e totó ʻi ho sinó kotoa.

ʻOku ngāue mālohi ho ʻutó ke mahino ʻa e meʻa kotoa pē ʻokú ke sio, fanongo, mo ongoʻí. ʻOku mālohi mo vave ange ia ʻi ha toe faʻahinga komipiuta.

ʻI hoʻo matuʻotuʻa angé, ʻe tupulaki ho sinó. Naʻe fokotuʻutuʻu ʻe he Tamai Hēvaní ho sinó ke liliu ia ʻi he kotoa hoʻo moʻuí!

ʻOku mahuʻinga ange e meʻa ʻokú ke fai ʻaki ho sinó ʻi hono fōtungá. ʻOkú ke fakaʻaongaʻi nai ia ke angaʻofa ki he niʻihi kehé pea mo muimui kia Sīsū Kalaisi?

ʻOua naʻá ke fakafehoanaki ho sinó ki ha toe taha kehe. Manatuʻi ko ho sinó ko ha meʻaʻofa ia mei he Tamai Hēvaní!

Ngaahi tā fakatātā ʻa Jeff Harvey