Ngaahi Fakamatala ʻo e Konifelenisí

Tokoni mei he Langí

Naʻe lea ʻa Palesiteni ʻOakesi fekauʻaki mo e ngaahi meʻa ʻoku foaki mai ʻe he Tamai Hēvaní ke tokoniʻi kitautolu ke tau fili ki he totonú. Ko ʻetau tokoni mālohi tahá ʻa hotau Fakamoʻui ko Sīsū Kalaisí. Koeʻuhí ko Ia, ʻe lava ke fakamolemoleʻi kitautolu pea te tau toe moʻui kotoa hili ʻetau maté. ʻOku ʻomi foki ʻe he Tamai Hēvaní ʻa e ngaahi fekaú, ngaahi ouaú mo e ngaahi fuakavá, pea mo e Laumālie Māʻoniʻoní ke tokoniʻi mo tataki kitautolu.

Tā ha founga ʻe taha ʻoku tokoniʻi ai koe ʻe he Tamai Hēvaní!

Ofi ki he Fakamoʻuí

Naʻe pehē ʻe Palesiteni ʻAealingi ʻi heʻene kei siʻí, naʻe fakahoko ʻa e houalotu sākalamēnití ʻi he efiafí. ʻI ha pō fakapoʻuli mo momoko ʻe taha, naʻá ne ongoʻi ha maama mo ha māfana ʻi he falelotú ʻi heʻene maʻu ʻa e sākalamēnití. ʻI he taimi naʻa nau hivaʻi ai ʻa e ngaahi lea “ʻE Fakamoʻui, nofo mo au ʻi he pō ko ʻení,” naʻá ne ongoʻi ʻa e ʻofa mo e vāofi ʻa e Fakamoʻuí ʻo fakafou ʻi he Laumālie Māʻoniʻoní.

Tā ha founga ʻe taha te ke lava ai ʻo ofi ange kia Sīsū Kalaisi.

Tui, Kau, Hoko

Naʻe vahevahe ʻe Sisitā Laiti ʻa e founga te tau lava ai ʻo hoko ko ha kau muimui tuʻuloa ʻo Sīsū Kalaisí. Te tau lava ʻo tui kiate Ia ʻaki ʻetau ako fekauʻaki mo Ia mo ongoʻi ʻa e Laumālie Māʻoniʻoní. Te tau lava ʻo kau kia Sīsū Kalaisi mo Hono Siasí ʻaki hono fakahoko mo tauhi e ngaahi fuakavá. Pea te tau lava ʻo hoko ʻo hangē ko Sīsuú ʻi heʻetau muimui ki Heʻene sīpingá.

Ko Ha Meʻaʻofa Makehe

Naʻe lea ʻa ʻEletā Kealoni fekauʻaki mo e tukufakaholo fakamāmani lahi ʻo hono foaki ʻo e ngaahi meʻaʻofá. ʻOku tau foaki ha ngaahi meʻaʻofa ʻoku tau foaki mo maʻu. Naʻa mo e fanga penikuiní ʻoku nau fefoakiʻaki ha ngaahi foʻi maka ngingila ko ha ngaahi meʻaʻofa! Ko e meʻaʻofa mahuʻinga ʻe taha mei he Tamai Hēvaní ko hono ʻiloʻi ko Hono ngaahi ʻofefine ʻofeina moʻoni kitautolu mo Hono ngaahi foha mahuʻingá. ʻI he taimi ʻoku tau maʻu moʻoni ai ʻa e meʻaʻofa ko ʻení, te tau lava ʻo ʻiloʻi ko hai kitautolu pea mo e founga ʻoku ʻofaʻi kakato ai kitautolú.

Ko ha Langi Fetuʻuʻia

Naʻe kemi tuʻo taha ʻa ʻEletā Tai mo hono fāmilí ʻi he malumalu ʻo e ngaahi fetuʻú. Naʻe fehuʻi ange ʻe heʻene fānaú pe ko e hā naʻe ʻikai ke nau lava ai ʻo sio ki he ngaahi fetuʻú ʻi honau ʻapí. Naʻá ne fakamatalaʻi naʻe ʻai ʻe he ʻuli ʻi he ʻātakaí ke faingataʻa ʻa e sio ki he ngaahi fetuʻú. ʻE lava ke hanga ʻe he ngaahi meʻa ʻokú ne tohoakiʻi ʻetau tokangá mo e ngaahi ʻahiʻahí ʻo fakapuliki ʻa ʻetau tataki fakalaumālié. Ka ʻi he tuí, te tau lava ʻo ʻiloʻi ʻoku ʻi ai maʻu pē ʻa e Tamai Hēvaní mo Sīsū Kalaisi.