“ʻOua ʻe Muimui ʻi he Kulī Ko Iá!” Ko e Kaumeʻá, Mē 2025, 8–9.
ʻOua ʻe Muimui ʻi he Kulī Ko Iá!
Ko ha ongo nai ʻeni mei he Laumālie Māʻoniʻoní?
Ko ha talanoa moʻoni mei USA.
Naʻe kaila ʻa Loleini ʻi heʻene fakalaka atu he tauʻanga meʻalelé, “Ta ō!”
Naʻe tui ʻe Māsī hono tataá. “ʻOku ou ʻalu atu!”
Naʻe ʻaka pasikala atu ʻa Māsī ʻi he saitiuoká ki hono ongo kaungāmeʻá. Naʻá ne saiʻia ke vaʻinga ʻi he faʻahinga vaʻinga kotoa pē mo Loleini mo Kesitī. Ka ko e meʻa fakafiefia tahá, naʻá ne saiʻia ʻi he heka pasikala mo kinauá.
ʻI he ʻaka pasikala hake ʻa e tamaiki fefiné ʻi he saitiuoká, naʻe kamata ke muimui atu ʻa e kulī ʻa e kaungāʻapí, ʻa Lōketi.
Naʻe pehē ange ʻe Kesitī, “ʻOiauē. ʻOku fiemaʻu ke tau fakafoki ia ki ʻapi!”
Ka naʻe ʻikai fie foki ʻa e kulií ia ki ʻapi. Naʻa nau ui ia ke tuʻu, ka naʻe kei lele atu pē ʻa Lōketi ia. Neongo pe ko e hā e meʻa naʻa nau faí, naʻá ne lele takai holo ʻo tāvilivili hono hikú. Naʻá ne fiefia!
ʻI he muimui ʻa e tamaiki fefiné ʻia Lōketí, naʻe fakatokangaʻi ʻe Māsī naʻe fakaʻau ke foʻou ange ʻa e fōtunga ʻo e ngaahi falé kiate ia. Naʻe fakaʻau ke ne mamaʻo ange mei he hala naʻá ne nofo aí. Naʻe ʻikai ke ʻiloʻi ʻe Māsī ha taha naʻe nofo ʻi he ngaahi fale ko ʻení!
Ko ʻetau ʻalú ki fē? Ko e fakakaukau ia ʻa Māsií. Te u lava nai ʻo ʻilo hoku hala ke u foki ai ki ʻapí?
Naʻe feinga ʻa Māsī ke ʻoua ʻe hohaʻa mo kei heka pasikala pē. Ka naʻe toe foki mai ʻa e ongo ko iá. Naʻe ʻi ai ha meʻa naʻá ne talaange ʻoku totonu ke ne foki ki ʻapi.
Naʻe taʻofi ʻe Māsī ʻene pasikalá ʻi he saitiuoká. Naʻá ne lea leʻo lahi atu, “Mahalo ʻoku totonu ke tau foki he taimí ni!”
Naʻe pehē ange ʻe Kesitī, “ʻOku fiemaʻu ke tau fakafoki ʻa Lōketi ki ʻapi!” Naʻá ne kei ʻaka pē mo Loleini ʻena pasikalá ʻo muimui ʻi he kulií.
Naʻe kei ongoʻi faikehe pē ʻa Māsī. Ko e hā naʻá ne fuʻu ongoʻi hohaʻa pehē aí? Naʻe ongoʻi nai foki ia ʻe hono ongo kaungāmeʻá?
Naʻe fakakaukau ʻa Māsī, Mahalo ko e ongo ko ʻení kiate au pē. Ko ha ongo nai ʻeni mei he Laumālie Māʻoniʻoní? Naʻe papitaiso mo hilifakinima ia ʻi he ngaahi māhina siʻi kuohilí, pea naʻe akoʻi ia ʻe Mami mo Teti fekauʻaki mo e fakafanongo ki he Laumālie Māʻoniʻoní. Naʻá na talaange te Ne folofola kiate ia ʻaki ha ngaahi ongo ʻi hono lotó pe ngaahi fakakaukau ʻi hono ʻatamaí. Naʻá ne ʻiloʻi te Ne tataki ia kapau te ne fakafanongo.
Naʻá ne toe ongoʻi ʻa e ongó. Ko e taimi ko ʻení naʻe toe ongo mālohi ange ia. ʻOua ʻe muimui ʻi he kulī ko iá.
Naʻe ui atu ʻa Māsī ki hono ongo kaungāmeʻá, “Te u foki au.”
“ʻIo!” Ko Loleini atu ia.
Naʻe tafoki hake ʻa Māsī ʻo fononga atu ʻi he hala naʻá ne haʻu aí. ʻI heʻene aʻu ki ʻapí, naʻá ne tuku ʻene pasikalá ʻi he loto ʻataʻatā musié peá ne hū ki loto. Naʻe femoʻuekina ʻa Mami ʻi peito.
Naʻe pehē ange ʻe Māsī, “Hei, Mami. Naʻá ku foki mai au. Na‘á ku ongoʻi hohaʻa ʻi hoku lotó.”
Naʻe taʻofi ʻe Mami ʻene meʻa naʻe faí. “Ko e hā ʻa e meʻa naʻe hokó?”
Naʻe pehē ange ʻe Māsī, “Naʻá ku ongoʻi ha fakatokanga lolotonga ʻeku heka pasikala mo hoku ongo kaungāmeʻá. Ko ia ne u foki mai leva ki ʻapí ni.” “ʻOku ou tui ko e Laumālie Māʻoniʻoní ia.”
Naʻe fāʻofua ange ʻa Mami kiate ia. “ʻOku ou fiefia ʻi hoʻo fakafanongo ki he ongo ko iá.”
Naʻe ongoʻi loto-fiefia ʻa Māsī. “Mo au pē.”
ʻŪ tā fakatātā ʻa Simini Blocker