Ko Hono Fakahaofi ʻe Mele mo Kalolaine ʻa e Folofolá

Naʻe taʻu 12 ʻa Mele Lōlini ʻi he taimi naʻá ne fuofua ako ai fekauʻaki mo e Tohi ʻa Molomoná. Naʻá ne kole ha tatau pea naʻá ne ʻā ʻi he konga lahi ʻo e poó kakato ʻo laukonga.

Naʻe fiefia foki ʻa Mele ʻi ha tohi foʻou naʻe ui ko e Tohi ʻo e Ngaahi Fekaú. ʻE maʻu ai ha konga lahi ʻo e ngaahi akonaki kuo fai ʻe Sīsū Kalaisi kia Siosefa Sāmitá.

Ka naʻe ʻi ai ha kakai ʻe niʻihi naʻe ʻikai ke nau saiʻia ʻi he Siasí. ʻI ha ʻaho ʻe taha, naʻe hū ai ha kau tangata ki he fale naʻe paaki ai ʻa e Tohi ʻo e Ngaahi Fekaú. Naʻa nau lī ʻa e mīsini pākí ki tuʻa ʻi he matapā sioʻatá pea fakamoveteveteʻi ʻa e ʻū pēsí ki he loto halá.

Naʻe toitoi ʻa Mele mo hono tehina ko Kalolainé, peá na sio ki he meʻa naʻe hokó. Naʻe loto ʻa Mele ke fakahaofi ʻa e ʻū lauʻi pēsí kimuʻa pea fakaʻauha kinautolú. Naʻe manavasiʻi ʻa Kalolaine, ka naʻá na ʻiloʻi naʻe ʻi ai e folofola ʻa e ʻOtuá ʻi he ngaahi pēsí.

Naʻe lele ʻa e ongo tautehiná ki he loto halá ʻo toʻo fakavave mai ʻa e lahi taha ʻo e ʻū peesi naʻá na lavá. Naʻe sio ha kau tangata ʻe niʻihi kiate kinaua pea nau kaila atu ke na tuʻu. Naʻe puke maʻu ange ʻe Mele mo Kalolaine ʻa e ʻū pēsí peá na lele ki ha ngoue koane ofi mai pē.

Naʻe tuli kinaua ʻe ha ongo tangata. Naʻe tō hifo ʻa Mele mo Kalolaine ki he kelekelé ʻo fufuuʻi ʻa e ʻū lauʻi pēsí ʻi lalo ʻi hona sinó. Naʻá na fakafanongo fakalongolongo pē ʻi he fekumi ʻa e ongo tangatá kiate kinauá.

Naʻe ʻikai fuoloa kuo foʻi ʻa e ongo tangatá. Naʻe hao ʻa Mele mo Kalolaine! Kuó na fakahaofi ‘a e ngaahi lauʻi pēsí. ʻOku maʻu ʻi he ʻahó ni ʻa e ngaahi akonaki ko iá ʻi he Tokāteline mo e Ngaahi Fuakavá.