“Founga ʻe 5 ke Matuʻuaki ʻAki ʻa e Ngaahi Ongo Fakaeloto Faingataʻá,” Ko e Kaumeʻá, Māʻasi 2025, 38–39.
Founga ʻe 5 ke Matuʻuaki ʻAki ʻa e Ngaahi Ongo Fakaeloto Faingataʻá
Ko e moʻuí ʻe lava ke faingataʻa ʻi he taimi ʻe niʻihi! Ko e ongoʻi ʻo e ngaahi ongo fakaeloto faingataʻá, hangē ko e loto-mamahí mo e loto-hohaʻá, ko ha konga ia ʻo ʻetau aʻusia ʻi he māmaní.
ʻOku tau ako ʻi he folofolá naʻa mo e Fakamoʻuí naʻá Ne ongoʻi loto-mamahi foki mo Ia (vakai, Sione 11:32–36). Naʻe fuesia ʻe Sīsū Kalaisi ʻa e faʻahinga mamahi kotoa pē. Koeʻuhí ko e meʻá ni, ʻokú Ne ʻafioʻi lelei ʻa e meʻa ʻokú ke ongoʻí. ʻOkú Ne ʻafioʻi foki ʻa e founga pau ke tokoniʻi ai koé. (Vakai, ʻAlamā 7:11–12.)
Ko ha ngaahi meʻa ʻeni ʻe nima ke tokoni ʻi he taimi ʻokú ke ongoʻi loto-mamahi aí.
1
Lotua ha tokoni mei he Tamai Hēvaní.
ʻI he taimi ʻokú ke lotua ai ha tokoní, ʻe lava ke tataki koe ʻe he Tamai Hēvaní mo Sīsū Kalaisi (vakai, ʻAlamā 37:36–37). ʻOkú Na ʻofa ʻiate koe mo finangalo ke tokoniʻi koe!
2
Manatuʻi ʻoku ʻofaʻi koe.
ʻOku akoʻi mai ʻe he folofolá “ʻoku mahuʻinga lahi ʻa e ngaahi laumālié ʻi he ʻao ʻo e ʻOtuá” (vakai, Tokāteline mo e Ngaahi Fuakava 18:10). ʻOku ʻuhinga ia ʻoku ʻofaʻi koe pea ʻokú ke mahuʻinga ki he Tamai Hēvaní!
3
Hū ki tuʻa!
Naʻe faʻu ʻe he Tamai Hēvaní mo Sīsū Kalaisi ʻa e māmani faka‘ofoʻofa ko ʻení maʻatautolu. ʻOku tokoni ʻa e vaʻinga ʻi tuʻá ke ke tupulaki ai ʻo moʻui lelei mo mālohi, pea ʻe lava foki ke ne tokoniʻi koe ke ke ongoʻi fiefia mo fiemālie ange.
4
Hiki hifo ʻa e ongo ʻokú ke maʻú.
ʻE lava ke tokoni hono tauhi ha tohinoá ke ke manatuʻi ai ʻa e ngaahi lēsoni ʻokú ke ako ʻi he moʻuí. ʻE lava foki ke tokoni ia ke mahino lelei ange kiate koe ʻa e meʻa ʻokú ke ongoʻí.
5
Talanoa ki ha tokotaha lahi falalaʻanga.
ʻI he taimi ʻokú ke talanoa ai ki ha taha fekauʻaki mo e ongo ʻokú ke maʻú, te nau lava ʻo tokoni ke fakamanatu atu kiate koe ʻokú ke makehe. Te nau lava foki ʻo tokoni atu ke ke ʻiloʻi ʻa e founga ke maʻu ai ʻa e poupou ʻokú ke fiemaʻú.
Taimi ʻe niʻihi, naʻa mo e hili hono fai ʻo e ngaahi meʻa ko ʻení, mahalo te ke kei ongoʻi loto-mamahi pē. Mahalo naʻa fiemaʻu ke ke talanoa ki ha toketā ke tokoni atu ke ke ongoʻi fiemālie ange. Pea te ke lava foki ʻo kole ha tāpuaki lakanga fakataulaʻeiki. Tatau ai pē pe ko e hā, ʻoku ʻikai ke ke tuenoa! ʻOku ʻofa ʻa e Tamai Hēvaní mo Sīsū Kalaisi ʻiate koe. ʻOkú Na finangalo ke tāpuakiʻi mo tokoniʻi koe.
ʻŪ tā fakatātā ‘a Stephanie Mackay