“Tokoni mei he Langí,” Ko e Kaumeʻá, Māʻasi 2025, 20–21.
Tokoni mei he Langí
Toʻo mei he “ʻOkú Ke Fie Fiefia Nai?” Liahona, Nōvema 2023, 46–48.
Naʻe ui au ke u hoko ko ha pīsope ʻi ha taimi faingataʻa ʻi heʻeku moʻuí. Naʻá ku hoko ko ha tamai kei talavou mo ha fāmili, pea naʻa mau faingataʻaʻia fakapaʻanga. Naʻá ku helaʻia. Naʻe faingataʻa foki ki hoku uaifí.
ʻI ha Sāpate ʻe taha, naʻe maʻu ai ʻe hoku uaifi ʻofeiná ʻa e sākalamēnití. Naʻe tokoniʻi ia ʻe he Laumālié ke ne ʻiloʻi ha meʻa. Ko e lahi taha ʻo e ngaahi palopalema naʻá ma fehangahangai mo iá naʻe fakaleleiʻi ia ʻi ha taimi lolotonga hoku uiuiʻí.
ʻOku ʻafioʻi ʻe he ʻEikí ʻetau ngaahi fiemaʻú. ʻI he taimi ʻokú Ne kole mai ai ke tau tokoní, ʻokú Ne ʻafioʻi ʻa e meʻa ʻe tokoni lahi taha kiate kitautolú. ʻOkú Ne finangalo ke tāpuakiʻi kitautolu. Pea te Ne foaki mai ʻa e ngaahi tāpuaki ko ʻení ʻi heʻetau tauhi faivelenga kiate Iá.
ʻOkú ke fie fiefia nai? Nofo ʻi he hala ʻo e fuakavá. ʻOku fakaafeʻi kitautolu ʻe hotau Fakamoʻuí ke tau haʻu kiate Ia. ʻOkú Ne toʻo atu ʻetau ngaahi kavengá. ʻOku ʻai ʻe Sīsū Kalaisi ke faingofua mo fakafiefia ange ʻetau moʻuí. Pea ʻokú Ne fakafonu kitautolu ʻaki ʻa e fiefiá.
Taimi ʻInitaviú!
ʻEke ki ha mēmipa ʻo e fāmilí fekauʻaki mo e founga kuo tāpuekina ai kinautolu ʻe he Tamai Hēvaní. Ko ha ngaahi fehuʻi ʻeni ke ke kamata ʻaki:
-
Te ke lava nai ʻo fakamatala mai kau ki ha taimi naʻe tāpuekina ai ʻe he Tamai Hēvaní hotau fāmilí?
-
Ko e hā ʻa e founga ʻokú ke fie tokoni ai ki he niʻihi kehé? Ko e hā ha ngaahi tāpuaki kuó ke mamata ai ʻi hoʻo tokoniʻi ʻa e niʻihi kehé?
-
Ko e hā ʻokú ke muimui ai ʻia Sīsū Kalaisí? Kuo tokoniʻi fēfē koe ʻe hoʻo muimui kiate Iá ke ke fiefiá?
Ngaahi tā fakatātā ʻa Turine Tran