“Kuo Fakafoki Mai ʻa e Lakanga Fakataulaʻeikí,” Ko e Kaumeʻá, Māʻasi 2025, 26–28.

Ngaahi Talanoa mei he Folofolá

Kuo Fakafoki Mai ʻa e Lakanga Fakataulaʻeikí

Te ke lava ʻo lau ʻa e talanoa ko ʻení ʻi he Siosefa Sāmita—Hisitōlia 1:66–73 mo e Tokāteline mo e Ngaahi Fuakava 27:12.

Ko Siosefa Sāmita ʻi heʻene lea kia ʻŌliva Kautelé mo ha ʻata ʻo ʻene fakakaukaú ʻoku ʻasi ai ʻa e ʻaʻahi ʻa Kalaisi ki he kakai Nīfaí

Hili hono maʻu ʻe Siosefa Sāmita ʻa e ʻū lauʻi peleti koulá, naʻá ne kamata liliu ia. Naʻe hiki ʻe ʻŌliva Kautele ʻa e meʻa naʻá ne lea ʻakí. ʻI heʻena ngāué, naʻá na ako ai naʻe finangalo ʻa Sīsū Kalaisi ke papitaiso ʻa e tokotaha kotoa pē.

Ko Siosefa Sāmita mo ʻŌliva Kautele ʻokú na lotu ʻi he vao ʻakaú

Naʻe fifili ʻa Siosefa mo ʻŌliva pe ko hai naʻá ne maʻu ʻa e mālohi ʻo e ʻOtuá ke papitaiso ʻa e kakaí. Naʻá na ō ki he vao ʻakaú ke lotu ʻo fehuʻi ki he ʻOtuá.

Ko e ʻāngelo mo hono ongo nimá ʻi he ʻulu ʻo Siosefa Sāmitá

ʻI heʻena lotú, naʻe hā mai ha ʻāngelo. Naʻá ne pehē ko Sione Papitaiso ia, ʻa ia naʻá ne papitaiso fuoloa ʻa Sīsū Kalaisí. Naʻá Ne foaki kia Siosefa mo ʻŌliva ʻa e Lakanga Taulaʻeiki Faka-ʻĒloné ke na lava ʻo papitaiso ʻa e niʻihi kehé. Ko e lakanga fakataulaʻeikí ko e mālohi ia ʻo e ʻOtuá. ʻOku ngāue ʻaki ia ke tāpuekina ʻaki ʻa e fānau ʻa e ʻOtuá.

Ko hono papitaiso ʻe Siosefa Sāmita ʻa ʻŌliva Kautelé

Naʻe fakahā ʻe Sione Papitaiso kia Siosefa mo ʻŌliva ke na papitaiso. Naʻá na ō ki ha vaitafe ʻo na fepapitaisoʻaki. ʻI heʻena ʻalu hake mei he vaí, naʻe fakafonu kinaua ʻaki ʻa e Laumālie Māʻoniʻoní. Naʻá na fiefia ʻaupito!

Ko ha kau ʻāngelo ʻe toko tolu ʻoku tuku honau nimá ki he ʻulu ʻo Siosefa Sāmitá

Naʻe haʻu kimui ange mo ha kau ʻāngelo kehe. Naʻe foaki ʻe ha toko tolu ʻo e kau ʻAposetolo ʻa Sīsū Kalaisí—ʻa Pita, Sēmisi, mo Sione—kia Siosefa mo ʻŌliva ʻa e Lakanga Taulaʻeiki Faka-Melekisētekí. Kuo lava ʻeni ʻe Siosefa mo ʻŌliva ʻo foaki ʻa e meʻafoaki ʻo e Laumālie Māʻoniʻoní ki he niʻihi kehé.