Loto-toʻa ko ʻAniká

“ʻOkú ke mateuteu?” Ko e fehuʻi ange ia ʻa Mamí.

Naʻe kamokamo pē ʻa ʻAnika mo fāʻofua ki heʻene kiʻi tamapua peá. Naʻá ne ʻomi ia ki he lotú. Naʻá ne fakaʻamu te ne tokoniʻi ia ke ne ongoʻi loto-toʻa.

Naʻe ʻi ai ha konga ʻa ʻAnika ke lea ai ʻi he polokalama Palaimeli ʻi he ʻaho ní. Ka naʻá ne foʻou ki he fonuá ni. Naʻe ʻikai ke ne fuʻu lava ʻo lea faka-Pilitānia. Naʻe ʻai ke ne lau ia ʻi he lea faka-Sipeiní. ʻE mahino nai ia ki he tokotaha kotoa pē?

Naʻe fāʻofua ʻa Mami kiate ia. “ʻOku ou ʻiloʻi pē ʻokú ke ilifia. Ka ke manatu‘i, ʻe ʻiate koe ʻa e Laumālie Māʻoniʻoní! ʻOku ʻikai ke ke tuenoa.”

Naʻe hoko ʻeni ke kiʻi ongoʻi fiemālie ange ai ʻa ʻAnika. Naʻá ne malimali ki heʻene tamapua peá. Naʻá ne fakakaukau, te tau toko tolu leva. Ko au, ko ʻeku peá, pea mo e Laumālie Māʻoniʻoní!

ʻI he polokalama Palaimelí, naʻe talanoa ʻa e kalasi ʻa ʻAnikaá ʻo kau ki he meʻa naʻa nau ako ʻi he taʻu ko iá. Naʻa nau ō taha taha ki he tuʻunga malangá. Naʻe ʻikai fuoloa kuo hokosia ʻa e taimi ʻo ʻAniká.

Naʻá ne fāʻofua ki heʻene peá. Te ne lava ʻo loto-toʻa!

Naʻe pehē ʻe ʻAnika ʻi he lea faka-Sipeiní “ʻOku ako ʻe hoku fāmilí ʻa e folofolá mo e Haʻu, ʻo Muimui ʻIate Aú ʻi he pō kotoa pē.” Naʻá ne mānava lōloa. “Naʻa mau ako ki he founga naʻe fakamolemoleʻi ai ʻe Siosefa Sāmita ʻa kinautolu naʻa nau fakamamahiʻi iá. ʻOku ou lava ʻo fakamolemoleʻi ʻa e niʻihi kehé foki. ʻI he huafa ʻo Sīsū Kalaisí, ʻēmeni.”

Naʻe foki ʻa ʻAnika ki hono seá. Naʻe malimali ange ʻene faiakó kiate ia mo ʻene peá. Naʻá ne fanafana ange, “Sai ʻaupito. Naʻá mo fakatou loto-toʻa ʻaupito!”

Na‘e ongoʻi loto-māfana ʻa ʻAnika. Naʻá ne loto-toʻa! Pea naʻá ne ʻiloʻi naʻe ʻiate ia ʻa e Laumālie Māʻoniʻoní.

Ngaahi tā fakatātā ʻa Katie Rewse