“Ko e Fekumi ki he Fanga Ngelí,” Ko e Kaumeʻá, Māʻasi 2025, 4–5.
Ko e Fekumi ki he Fanga Ngelí
“ʻOku hangē pē ia ko e founga te u lava ai ʻo fanongo ki he Laumālie Māʻoniʻoní ʻi he taimi ʻoku ou fakafanongo aí.”
Ko ha talanoa moʻoni mei Kositā Lika.
“Mani!” Ko ʻĒtani atu ia. “Naʻa mou sio ki ai?”
Naʻe pehē ange ʻe Lili, “ʻIo, sio ki hono kiʻi hiku fakaʻofoʻofá!”
Naʻe sio hake ʻa Positoni, ka naʻá ne sio pē ki ha ngaahi ʻata.
“Kuo tau ʻosi sio ki ha fanga ngeli ʻe tolu ʻi he ʻahó ni!” Ko ʻĒtani atu ia.
Ka naʻe teʻeki sio ʻa Positoni ia ki ha meʻa! Naʻe ʻaʻahi hono fāmilí ki ha vaotā ke mamata ki he fanga ngeli nofo vaó. Ka naʻe fuʻu mamaʻo ʻa e fanga ngelí ke sio ki ai ʻa Positoni.
Naʻe kui ʻa Positoni. Naʻá ne lava pē ʻo sio ki ha ngaahi meʻa ʻoku ofi ʻaupito kiate iá. Ko e angamahení, naʻe ʻikai hohaʻa ia ki heʻene kuí. Naʻá ne kei lava pē ʻo fai ha ngaahi ngāue lelei lahi. Naʻá ne lava ʻo lau ʻa e tohi maʻá e kakai kuí ʻaki hono louhiʻi nimá pea lue mo hono tokotokó ʻi he fakapoʻulí. Pea naʻá ne lava ʻo ʻilo ha kakai ʻaki ʻene fakafanongo ki honau leʻó.
Ka ʻi he taimi ʻe niʻihi, naʻe ʻikai saiʻia ʻa Positoni ʻi heʻene kuí. Hangē ko e ʻaho ní.
Naʻe tangutu ʻa Positoni ʻi he kelekelé ʻo māpuhoi. Naʻá ne fakakaukau ʻoku ʻikai totonu ia!
Hili ha ngaahi miniti siʻi mei ai naʻá ne maʻu ha fakakaukau. Naʻe lotu ʻa Positoni ʻi hono ʻatamaí, Tamai Hēvani, kātaki ʻo tokoniʻi ha ngeli ke ofi mai ke u sio ki ai.
Naʻe teʻeki ke lava ʻa Positoni ʻo sio ki ha fanga ngeli. Naʻá ne fanongo leva ki ha longoaʻa mei ha feituʻu mamaʻo.
“Naʻa mou fanongo ki hē?” Ko e fehuʻi ange ia ʻa Positoní. “ʻOku ou tui ko ha ngeli!”
Naʻe pehē ange ʻe ʻĒtani, “Naʻe ʻikai ke u fanongo au ki ha meʻa.”
Naʻe talaange ʻe Teti, “Naʻe ʻikai ke u fanongo mo au ki ai. ʻOkú ke maʻu ha telinga fanongo lelei!”
Naʻe fanongo ʻa Positoni ki ha ngeli ʻoku lele ʻi he vao ʻakaú ʻi he foʻi hala naʻa nau ʻalu aí. Naʻá ne tuhu ki he feituʻu naʻe ongo mei ai ʻa e ngelí. “Ko ʻena!”
Naʻá ne fanongo ki ha ngeli ʻe taha, mo ha toe ngeli ʻe taha. Naʻe lava hono fāmilí ʻi he taimi ʻe niʻihi ʻo sio ki he fanga ngelí ʻi hono tuhuʻi ange ʻe Positoni kiate kinautolú. Ka naʻe ʻikai ofi feʻunga mai ha taha ʻo e fanga ngelí ke ne lava ʻo sio ki ai.
Naʻe vave pē taimi ke nau foki ai ki ʻapí.
Naʻe pehē ange ʻe Mami ʻi heʻenau lue ki he kaá, “Kovi pē ko e ʻikai ke ke sio ki ha ngelí.”
Naʻe fakamāhiki ʻe Positoni hono ongo umá. “ʻOku sai pē ia. Naʻa ku fie sio ki ha [ngeli] ʻe taha, ka naʻe lahi ʻa e fanga ngeli naʻá ku lava ʻo fanongo ki aí.” Naʻá ne fakakaukau leva ki heʻene lotú. “ʻOkú ne kiʻi fakamanatu mai kiate au ʻa e Laumālie Māʻoniʻoní.”
“Ko e hā ho ʻuhingá?” Ko e fehuʻi ange ia ʻa Mamí.
“ʻI heʻeku tuʻu ʻo fakafanongó, naʻá ku fakatokangaʻi naʻa nau ʻātakaiʻi au. Naʻe lava ke u fanongo kiate kinautolu neongo naʻe ʻikai ke u lava ʻo sio kiate kinautolu. ʻOku hangē pē ia ko e founga te u lava ai ʻo fanongo ki he Laumālie Māʻoniʻoní ʻi he taimi ʻoku ou fakafanongo aí.”
Naʻe pehē ange ʻe Mami, “Ko ha lēsoni lelei ʻaupito ia.”
Naʻe fanongo ʻa Positoni ki ha meʻa ʻi he vao ʻakau ʻi hono tafaʻakí. Naʻe lele mai leva ha meʻa ki he foʻi halá—ʻi muʻa tonu pē ʻiate ia! Naʻe ʻi ai hono fulufulu meimei lanu kulokula mo hano hiku lōloa. Naʻá ne tuʻu pea sio fakahangatonu atu kia Positoni. Naʻe toe lele leva ia ki he ʻuluʻakaú.
Ko ha ngeli! Naʻá ne lava ʻo sio ki ha taha!
Naʻe malimali ʻa Positoni. Naʻe faʻa faingataʻa ʻi he taimi ʻe niʻihi ʻa e hoko koha taha kuí. Ka ʻi he ʻaho ní, naʻe tokoni ia ke ne ako fekauʻaki mo e Laumālie Māʻoniʻoní. Pea naʻe fakafiefia ia.
Ngaahi tā fakatātā ʻa Alyssa Gonzalez