Ngaahi ʻEkitivitī ʻo e Haʻu, ʻo Muimui ʻIate Aú

“ʻOku mahuʻinga lahi ʻa e ngaahi laumālié ʻi he ʻao ʻo e ʻOtuá” (Tokāteline mo e Ngaahi Fuakava 18:10). ʻOku ʻuhinga ia ʻoku mahuʻinga ʻa e tokotaha kotoa pē ki he Tamai Hēvaní, kau ai koe! Tā ha fakatātā pē ʻoʻou. ʻAhiʻahi teuteuʻi ia ʻaki ha ngaahi naunau ʻaati kehekehe! Tohiʻi ʻi ʻolunga ʻa e “ʻOku ʻOfa ʻa e ʻOtuá ʻIate Au.”

ʻOku kole mai ʻa Sīsū Kalaisi ke tau fakafanongo kiate Ia (vakai, Tokāteline mo e Ngaahi Fuakava 19:23). ʻOku manatuʻi ʻe he kau fakafanongo leleí ʻa e meʻa kuo nau fanongo ki aí. Tangutu takai ʻi ha foʻi siakale. ʻE fanafana ʻe ha taha ha foʻi lea ʻo e ongoongoleleí. ʻE toe puʻaki ia ʻe he tokotaha hokó pea tānaki atu ha foʻi lea foʻou. ʻAlu takai ʻi he siakalé kae ʻoua kuo tānaki atu ʻe he tokotaha kotoa pē ha foʻi lea ke manatuʻi!

Naʻe fakafoki mai ʻe Sīsū Kalaisi Hono Siasí ʻi he ʻahó ni ki he founga naʻe ʻi ai ʻi he taimi naʻá Ne ʻi māmani aí (vakai, Tokāteline mo e Ngaahi Fuakava 20). Tohi ʻi he ngaahi ipu pelesitikí ʻa e ngaahi tāpuaki ʻoku tau maʻu ʻi heʻetau hoko ko e konga ʻo e Siasi ʻo Sīsū Kalaisí, hangē ko e lakanga fakataulaʻeikí, papitaisó, kau palōfitá. Hili iá pea fokotuʻutuʻu ho ʻū ipú ʻi ha taua māʻolunga!

ʻOku ʻofeina ʻe he Tamai Hēvaní ʻetau hiva ʻaki hotau lotó (vakai, Tokāteline mo e Ngaahi Fuakava 25:12). Fili ha ngaahi hiva Palaimeli ʻe niʻihi ke hivaʻi fakataha. Faʻu ha ngaahi fakatātaaʻi ʻaki ʻa e nimá ke ʻalu fakataha mo e fakaleá.

ʻOku maʻu ʻe he palōfitá ha fakahā mei he Tamai Hēvaní mo Sīsū Kalaisi maʻá e Siasí (vakai, Tokāteline mo e Ngaahi Fuakava 28:7). Paaki pe tā ha fakatātā ʻo e palōfitá. Tohiʻi ʻi ʻolunga ʻa e “ʻOku pehē ʻe he palofita…” Hiki pe tā ha ngaahi meʻa kuo akoʻi mai ʻe hotau palōfitá.