Ko e Hiva ke Holoki Hifo ʻa e Ilifiá

Naʻe malimali ʻa Mama mo pehē ange, “Taimi ke ke mohe.”

Naʻe hū atu ʻa Lōkani ki hono lokí. Naʻá ne fai ʻene lotú peá ne tokoto atu ʻi he mohengá. Pea lau ange leva ʻe Mama ha talanoa. Naʻá ne tulemohe. Naʻe taimi siʻi pē mei ai kuó ne mohe leva.

Ka naʻe ʻi ai ha misi fakailifia ʻa Lōkani. Naʻá ne toko taha pē ʻi ha feituʻu fakapoʻuli. Naʻá ne sio ki ha fuʻu manu fakamanavahē lahi mo hano fuʻu nifo. Naʻe ngungulu ange ia kiate ia. Pea naʻe kamata leva ke ne lele atu kiate ia!

Naʻe feinga ʻa Lōkani ke hola. Ka naʻá ne hekea ʻo tō! Naʻe fakaʻau ke ofi mo lahi ange ʻa e fuʻu manu fakamanavaheé kae ʻoua—

Naʻe ʻā hake ʻa Lōkani ʻo tangutu hake ʻi hono mohengá. Naʻá ne holoholoʻi ʻa e loʻimatá mei hono matá peá ne sio atu ʻoku kei fakapoʻuli pē ʻa tuʻa.

Naʻá ne fie talanoa ki heʻene ongomātuʻá fekauʻaki mo e misí. Ka naʻe ʻikai ke ne fie mavahe mei hono mohengá. Naʻe ʻai ʻe he fakapoʻulí ke ne ongoʻi hangē naʻe toitoi ha fuʻu manu fakamanavahē ʻi ha feituʻu ʻi hono lokí. Naʻe hā fakailifia ʻa e ʻata kotoa pē. Naʻe hangē ʻa e kālou ʻa e kulī ʻi tuʻá ha ngungulu ha fuʻu manu fakamanavaheé.

Naʻe fusi hake ʻe Lōkani ʻa e kafú ke aʻu ki hono ihú. Naʻá ne fuʻu ilifia ke toe ngaue.

Naʻá ne fie tokoto ʻo toe mohe. Ka ʻi he taimi kotoa pē naʻá ne kuikui ai hono matá, naʻá ne sio ki he fofonga ʻita mo e nifo māsila ʻo e fuʻu manu fakamanavaheé. Naʻe ʻikai lava ke tuku ʻene sio ki he ngaahi ʻata fakailifiá.

Naʻá ne sio leva ki ha fakatātā ʻi he funga tēpile ʻi hono veʻe mohengá. Ko ha tā ʻo ia, ko hono ongo tehiná, Papa, mo Mama ʻi tuʻa ʻi he temipale ʻi Monitelei, Mekisikoú. Naʻa nau fōtunga fiefia ʻaupito.

Fakafokifā pē kuo haʻu ki heʻene fakakaukaú ʻa e hiva Palaimeli naʻá ne saiʻia taha aí. Naʻe kamata ke hiva leʻosiʻi ʻa Lōkani, “Fie siofia ha temipale. Te u ʻi ai ha ʻaho. Ongoʻi e Laumālié, fanongo mo lotu.”*

Lolotonga ʻene hivá, naʻe fakakaukau ʻa Lōkani ki he ʻaho ko iá ʻi he temipalé mo hono fāmilí. Naʻá ne ongoʻi nonga moʻoni. Koeʻuhí ko e temipalé, e lava ke ne fakataha mo hono fāmilí ʻo taʻengata.

Naʻe ʻikai lava ʻa Lōkani ʻo fanongo ki he kālou ʻa e kulií ʻi he ongo ʻo hono leʻó. Naʻá ne kuikui hono matá mo kei hiva pē. “ʻIloʻi ʻi hoku tuʻungá: Taʻengata ʻa e fāmilí.” Naʻá ne ongoʻi ha nonga ʻi hono lotó peá ne malimali. Naʻá ne ʻiloʻi naʻe ʻikai ha fuʻu manu fakamanavahē.

Naʻe fakapoʻuli mo fakailifia ʻa e lokí. Ka ko ʻeni ko ha feituʻu nonga mo malu ia. Naʻe falala atu ʻa Lōkani ki hono piló peá ne tō ʻo mohe fiemālie.

ʻI heʻene ʻā haké, naʻe laʻā ʻa tuʻa. Naʻá ne tuʻu hake ʻo sio ki he huelo ʻo e laʻaá ʻoku ulo mai mei hono laʻitā ʻi he temipalé. Naʻá ne ngūngū ʻa e foʻi hiva naʻá ne saiʻia taha aí ʻi heʻene teuteu ki he lotú.

ʻI heʻene fononga ki he lotú, naʻá ne fakamatala ki hono fāmilí fekauʻaki mo ʻene misi fakailifiá mo e foʻi hiva naʻá ne hivaʻí. Naʻá ne fanongo ki he ngaahi malangá mo hivaʻi ha ngaahi himi ʻi he falelotú. Naʻe taimi leva ke ne ʻalu ki he Palaimelí.

Naʻe manako ʻa Lōkani ke fanongo ki he pianó. Pea ko ʻeni naʻá ne ʻiloʻi ʻoku ʻi ai ha ngaahi hiva ʻe niʻihi ʻoku mālohi feʻunga ke ne tuli ʻa e ngaahi fuʻu manu fakamanavaheé ke mavahe.

Naʻe pehē ange ʻe he taki ʻo e Palaimelí, “ʻOku talitali lelei kimoutolu ki he taimi hivá. Ko e hā ʻa e hiva te tau ʻuluaki hivaʻí?”

Naʻe pehē ange ʻe Lōkani, ʻi heʻene hiki hono nimá ki ʻolunga ki he ʻataá, “ʻOku ou ʻilo! Tau hiva ʻa e ʻFie Siofia ha Temipalé.ʼ”

Ngaahi tā fakatātā ʻa Carolina Farías