Ang Awit ni Sundae

Ni Abby Larkins

Si Sundae adunay ideya! “Ganahan ka ba nga motambong sa akong bunyag?”

Usa ka tinuod nga istorya gikan sa Pilipinas.

Duha ka batang babaye nga nagdula og dulaan nga mga hayop

Tibuok adlaw nga nagdula si Sundae ug iyang higala nga si Amy. Nagpraktis sila og mga balitok-balitok [cartwheels] sa gawas ug nagdula sa mga dulaan nga mga hayop. Lingaw kaayo kini, apan si Sundae nagkinahanglan na nga mopauli.

“Makadula ka ba og usab ugma?” Nangutana si Amy.

Si Sundae wala kahibalo unsay isulti. Ugma na siya bunyagan! Si Amy dili miyembro sa Simbahan. Unsaon ni Sundae sa pagsulti niya mahitungod sa iyang bunyag?

Apan si Amy higala ni Sundae. Tingali OK ra.

“Dili ko makadula ugma tungod kay bunyagan ko,” si Sundae miingon.

“Unsay buot ipasabot niana?” Nangutana si Amy.

“Usa kini ka butang nga buhaton namo sa among simbahan,” misulti si Sundae. “Si Jesukristo gibunyagan, ug gusto ko nga magpabunyag aron makasunod ako Kaniya.”

Duha ka batang babaye nga nagbarog ug nag-istoryahanay

Dayon si Sundae nakahunahuna og ideya! “Gusto ka ba nga moadto? Mokanta usab ako og usa ka awit.”

Mipahiyom si Amy. “Sige, ganahan kaayo ko!”

Pagkasunod adlaw, nagtan-aw si Sundae sa mga tawo nga nangabot alang sa iyang bunyag. Dayon nakita niya si Amy! Miwara-wara si Amy kaniya. Mipahiyom si Sundae ug mibawos og wara-wara.

Sa wala madugay oras na nga magsugod. Si Mama mihatag og mubo nga pakigpulong. Miingon siya nga kon mabunyagan si Sundae, mosaad siya nga mosunod ni Jesukristo ug mosunod sa mga sugo. Dayon makompirmahan siya. Kana nagpasabot nga mapanalanginan siya sa gasa sa Espiritu Santo.

“Kitang tanan makabati sa Espiritu Santo,” misulti si Mama. “Apan kon makompirmahan kita, ang Espiritu Santo makauban kanato sa kanunay.”

Dayon panahon na alang sa awit ni Sundae. Milakaw siya sa atubangan sa lawak ug miginhawag lawom. Dayon nagsugod siya sa pagkanta sa “Kon Ako Bunyagan.”

Sama sa kalibotan limpyo human sa ulan.

Ako gayod maninguhang Niya makig-uban.

Usa ka batang babaye nagsul-ob og puti ug nagkanta

Dihang nahuman siya, gibati ni Sundae ang tumang kalipay. Nasayod siya kini nga pagbati mao ang Espiritu Santo. Nakita niya si Amy nga dunay mga luha sa iyang mga mata.

Gibati usab ni Amy ang Espiritu Santo, naghunahuna siya.

Human si Sundae nabunyagan ug nakompirmahan, nakita niya si Amy.

“Salamat sa pagdapit kanako,” miingon si Amy. “Nindot kaayo ang akong gibati. Nalipay ako alang kanimo.”

Mipahiyom si Sundae kaniya. “Salamat nga higala ko ikaw,” miingon siya. Malipayon kaayo siya nga karon aduna siyay duha ka maayo kaayo nga mga higala—si Amy ug ang Espiritu Santo.

Usa ka batang babaye nga gibunyagan samtang laing batang babaye nagtan-aw sa gawas sa bunyaganan