Ang Akong mga Pulong sa Ebanghelyo

Ang pagkapari mao ang pagtugot ug gahom sa Dios nga Iyang gihatag kanato sa pagtabang sa Iyang buhat dinhi sa yuta.

Ang pakigsaad usa ka saad nga atong gihimo uban sa Langitnong Amahan sa pagsunod sa Iyang mga sugo. Kon mohimo kita ug motuman sa atong mga pakigsaad, ang Langitnong Amahan mopanalangin kanato.

Sa dihang gibunyagan ka, ikaw naghimo og usa ka pakigsaad ngadto sa Dios. Mosaad ka nga andam ka nga modala sa ngalan ni Jesukristo diha kanimo, motuman sa mga sugo sa Dios, ug moalagad Kaniya kanunay. Ang usa ka naghupot sa pagkapari mosulti og usa ka espesyal nga pag-ampo, ituslob ka nga hingpit sa tubig, ug ihaw-as ka. Nagrepresentar kini sa pagbiya sa imong mga sala ug sa pagkatawo pag-usab isip usa ka sumusunod ni Jesukristo.

Human ikaw mabunyagan, ang usa ka naghupot sa pagkapari mokompirma kanimo nga usa ka miyembro sa Ang Simbahan ni Jesukristo sa mga Santos sa Ulahing mga Adlaw. Ikaw usab makadawat sa gasa sa Espiritu Santo, nga nagpasabot nga ang Espiritu Santo magauban kanimo sa kanunay.

Ang Pag-ula ni Jesukristo mao ang sakripisyo nga Iyang gihimo alang kanato. Didto sa Tanaman sa Getsemani, nag-antos Siya alang sa atong mga sala ug mibati sa tanan natong kasakit. Namatay siya didto sa krus. Dayon mibangon Siya gikan sa pagkamatay. Tungod ni Jesukristo, kita makahinulsol ug mapasaylo sa atong mga sala.