Ang Bunyag ni Mama

Ang tubig nagtuyok sa mga tiil ni Scott samtang mitunob siya sa bunyaganan. Ang iyang magulang nga lalaki nga si Sandy nagbarog na sa tubig. Mipahiyom siya ug gikuha ang kamot ni Scott.

Mibalos og pahiyom si Scott ug mihangad sa mga tawo nga nagtan-aw. Anaa si Papa. Malipayon kaayo siya nga tan-awon! Ug anaa si Mama. Miwarawara si Mama kaniya. Nagsul-ob usab siya og puti nga sinina nga pangbunyag. Ang usa ka igsoon ni Scott nga si Gerrie ang mobunyag kaniya.

Sa dihang gisultihan ni Mama si Scott nga siya mabunyagan sa sama nga adlaw niya, mahinamon na kaayo siya. Si Mama wala magtubo nga moadto sa simbahan sama ni Scott. Nagsugod ra siya sa pag-adto sa simbahan human niya makaila si Papa.

Si Scott kanunay nga nakahibalo nga si Mama nahigugma ni Jesukristo, ug siya mokuyog nila og adto sa simbahan hapit kada semana. Ang mga misyonaryo moadto usab kanunay sa ilang balay. Apan naabtan pa og mga tuig una pa mobati si Mama nga andam na nga magpabunyag. Malipayon kaayo siya nga sila magkasalo niining espesyal nga adlaw!

Si Mama ang nagtudlo kaniya mahitungod sa bunyag ug pagkompirma sa dihang siya nag-otso anyos.

“Maghimo ka og importante kaayo nga saad ngadto sa Langitnong Amahan nga kanunay nga mosunod Kaniya ug ni Jesukristo,” miingon siya. “Isip ganti, kanunay nga maanaa kanimo ang Espiritu Santo.”

Ug karon oras na aron mabunyagan! Dayon gipislit ni Scott ang iyang ilong sa dihang si Sandy mituslob kaniya pailawom sa tubig. Sa dihang si Scott mikawas, gikipat-kipat niya ang mga tubig gikan sa iyang mga mata ug mingisi. Limpyo kaayo ang iyang pamati! Adunay init nga pagbati sa iyang kasingkasing samtang milakang siya pagawas sa bunyaganan.

Human siya makailis og uga nga sinina, si Scott milingkod ug mitan-aw ni Gerrie nga nagbunyag ni Mama. Malipayon kaayo siyang tan-awon samtang miadto siya sa tubig ug mikawas. Mitan-aw dayon siya ni Scott ug mipahiyom og dako kaayo ngadto kaniya.

Pagkasunod adlaw didto sa simbahan, silang duha gikompirmahan isip mga miyembro sa Ang Simbahan ni Jesukristo sa mga Santos sa Ulahing mga Adlaw. Gipiyong ni Scott ang iyang mga mata samtang si Papa ug ang ubang mga naghupot sa pagkapari mipatong sa ilang mga kamot sa iyang ulo. Sila mipanalangin kaniya sa gasa sa Espiritu Santo. Dayon hilom siya nga naminaw samtang si Mama gikompirmahan. Mibati siya og kainit, kamalipayon, ug kasegurohan. Nasayod si Scott nga gibati niya ang Espiritu Santo.

Human niana milingkod sila og balik aron maminaw sa mga mamumulong. Dayon nakadungog si Scott ug bakho. Mitan-aw siya ug nahingangha nga makakita og luha nga midagayday sa aping ni Mama.

Ningkusmod si Scott. “Ok ka lang ba, Mama? mihunghong siya. “Nganong naguol man ka?”

Gipahiran ni Mama ang iyang aping ug mipahiyom. “Wala ko maguol,” mibalos siya og hunghong. Iyang giagbayan si Scott ug gigakos siya og hugot sa usa ka kamot. “Usahay ang mga tawo mohilak kon malipay sila. Ug malipayon kaayo ko karon.”

Mibalos og gakos og hugot si Scott. “Ako sab.”

Mga paghulagway pinaagi ni Raquel Martin