Si Joseph Smith Nakadawat sa Bulawang mga Palid

Tulo ka tuig human sa Unang Panan-awon, mibati og dili maayo si Joseph Smith mahitungod sa pipila ka sayop nga iyang nahimo. Nag-ampo siya sa Langitnong Amahan mahitungod niini.

Samtang nag-ampo si Joseph, ang kahayag mipuno sa lawak. Nakakita siya og anghel nga nagbarog sa hangin. Ang ngalan sa anghel si Moroni.

Si Moroni miingon nga adunay basahon nga hinimo sa bulawang mga pahina, o mga palid. Gilubong kini didto sa usa ka bungtod duol sa balay ni Joseph. Ang basahon mahitungod sa katawhan nga nagpuyo sa Amerika sa dugay nang panahon ang milabay. Si Moroni miingon nga ang Dios motabang ni Joseph sa paghubad sa basahon.

Si Joseph miadto sa bungtod ug nakita ang mga palid ilawom sa bug-at nga bato. Si Moroni miabot ug miingon nga si Joseph dili pa andam sa pagkuha niini.

Sa dihang mas edaran na si Joseph, si Moroni nakigkita niya sa bungtod ug mihatag kaniya sa mga palid. Si Moroni misulti ni Joseph nga ipabilin niya kini nga luwas.

Si Joseph nagsugod sa paghubad sa mga palid ngadto sa Iningles. Migamit siya og espesyal nga mga himan gikan sa Dios aron motabang kaniya. Ang basahon gimantala niadtong 1830 isip ang Basahon ni Mormon. Nagtudlo kini mahitungod ni Jesukristo ug sa Iyang ebanghelyo.