Ang Tubag ni Cole

“Ako anak sa Dios, gipadala dinhi, panimalay, ginikanan, ako gihatagan. …”

Napuno sa luha ang mga mata ni Cole, ug mihunong siya sa pagkanta. Mihangyo siya sa iyang titser sa Primary kon pwede siya nga moadto sa kaligoanan.

Sa kaligoanan, mitutok si Cole sa samin. Nagbarog siya dinhi gayod kauban sa iyang papa sa miaging tuig, sa wala pa ang bunyag ni Cole. Silang duha nagsul-ob og puti.

“Ikaw padulong sa paghimo og usa ka importante kayo nga pakigsaad,” miingon si Papa. “Karon ikaw mosaad nga kanunay nga mosunod ni Jesukristo ug maningkamot nga maparehas Kaniya.”

Si Cole gibati og tumang kalipay ug kainit sa dihang mikawas siya sa tubig. Nakahibalo siya nga nahimo niya ang sakto nga pagpili nga magpabunyag.

Apan karon, lahi na. Si Papa dili niya kauban karon. Wala na gayod siya magsimba.

Mihingos si Cole ug gipahiran ang iyang mga mata. Sa sinugdanan, dihang wala makasimba si Papa, nagtuo si Cole nga nasakit ra siya. O tingali kinahanglan niya nga moadto sa trabaho. Dayon si Papa panagsa na lang moadto. Sa wala madugay, wala na gayod siya mokuyog nila.

Nakahinumdom si Cole sa adlaw nga siya sa kataposan gibati og igo nga kaisog aron mangutana ni mama mahitungod ni Papa. Si Mama nanghupaw ug miingon, “Si Papa dili na segurado kon tinuod ba ang Simbahan. Misulay siya sa pagdesisyon kon unsa ang iyang gituohan.” Magul-anon siyang tan-awon, ug nakahibalo si Cole nga lisod usab kini alang kaniya.

Ang makahahadlok nga mga pangutana mipuno sa hunahuna ni Cole. Giunsa man sa usa ka tawo nga mawala ang ilang pagpamatuod? Mawala ba kaha ang kang Cole? Unsa ang kahulogan niini alang sa ilang pamilya?

Gigakos ni Cole si Mama. “Unsa may atong mahimo? Unsaon nato pagtabang si Papa nga makaplagan ang iyang pagpamatuod?”

“Ang Langitnong Amahan lamang ang makatabang ni Papa nga makaplagan pag-usab ang iyang pagpamatuod,” miingon si Mama. “Apan mahimo kitang mag-ampo alang kaniya.”

Sukad niana, si Cole nag-ampo alang ni Papa kada adlaw. Apan pila ka bulan na siyang nag-ampo, ug walay nahimong kausaban. Gibati si Cole og kahadlok. Nabalaka siya sa tanang higayon. Lisod ang pag-adto sa simbahan nga wala si Papa. Lisod tuohan nga ang iyang pamilya mahimong magkauban sa kahangtoran.

Gipahiran ni Cole ang nahabilin niyang mga luha ug militok og laing hilom nga pag-ampo. Dayon mibalik siya sa Primary. Sa dihang misulod siya, si Sister Snow nagpahinumdom sa tanan mahitungod sa kinatibuk-ang komperensiya sa sunod nga tapos sa semana.

Pagkasunod Dominggo, si Cole milingkod tupad ni Mama ug mitan-aw sa komperensiya. Si Papa anaa sa taas nagtan-aw og basketbol. Si Cole naminaw sa propeta nga namulong mahitungod sa iyang kinabuhi isip batang lalaki. Nahingangha siya pagkahibalo nga ang mga ginikanan ni Presidente Nelson wala usab magsimba sa dihang bata pa siya.

Dayon namulong si Presidente Nelson sa kadako sa iyang pagpangandoy nga maselyo sa iyang mga ginikanan sa templo. Wala makalihok si Cole, naminaw og maayo. Si Presidente Nelson kinahanglan nga maghulat og daghang tuig, gani hangtod nga ang iyang mga ginikanan nahimong 80! Apan sila sa kataposan naselyo isip mahangtorong pamilya.

Gibati ni Cole nga ang Espiritu Santo mihunghong kaniya nga ang mga butang kabahin ni Papa ma-OK ra usab. Si Cole kinahanglan lang nga magmapailobon. Apan ang Langitnong Amahan motabang sa iyang pamilya, sama sa Iyang pagtabang sa pamilya ni Presidente Nelson.

Bisan tuod kon ang tubag dili mao kon unsay gusto ni Cole, siya nakahibalo nga ang Langitnong Amahan nakadungog ug mitubag sa iyang pag-ampo. Ang Langitnong Amahan nahigugma sa iyang papa, ug gihigugma usab Niya si Cole.

Mga paghulagway pinaagi ni Brenna Vaughan