“Paglakaw padulong sa Simbahan,” Higala, Pebrero 2025, 16–18.

Paglakaw padulong sa Simbahan

Ni LaNae H. Poulter

Si Kupa ganahan og Dominggo.

Usa ka tinuod nga istorya gikan sa Zimbabwe.

Duha ka gagmayng batang babaye ug usa ka babaye nga adunay masuso nga gihigot sa iyang likod

“Mama, bangon na,” mihunghong si Kupa.

“Wala pa mosidlak ang adlaw.” Nanghuy-ab si Mama. “Dili ba pwede nga matulog usa ka og balik?”

“Mahinamon na kaayo ko,” miingon si Kupa. “Dominggo na ug makaadto na kita sa simbahan!”

“OK. Daog na ka,” miingon si Mama. “Apan nagkinahanglan ko sa imong tabang aron maandam ang imong mga manghod nga babaye.”

Ganahan si Kupa nga motabang ni Mama. Nagsugod siya pinaagi sa pagpabukal og pagkaon nga mais aron makahimo og sadza alang sa iyang mga manghod nga babaye, si Agnes ug Sheila. Pagkahuman nila og kaon, si Kupa mitabang og panghipos.

Gisul-ob ni Kupa ang iyang paborito nga sinina ug nagpili og mga sinina alang sa iyang mga igsuong babaye. Ang mga batang babaye nag-agik-ikay samtang iyang gitabangan og ilis. Naghinam-hinam kaayo siya!

“Maayo kaayo ka nga katabang, Kupa,” miingon si Mama.

“Salamat!” miingon si Kupa.

Samtang padulong na sila og gawas sa pultahan, gihigot ni Mama si Sheila sa iyang likod gamit ang panapton nga putos. “Nalipay ko nga kamong duha dako na aron makalakaw,” miingon siya ni Kupa ug Agnes.

Gikuha ni Mama ang kamot ni Kupa, ug nagsugod sila og lakaw sa dili sementado nga kalsada. Sa layo, makita ni Kupa ang templo nga gitukod sa Harare. “Ganahan ko nga makakita sa templo,” miingon si Kupa.

“Ako usab,” miingon si Mama. “Bulahan kita nga nagpuyo diin ato kining makita nga gitukod.”

Anino sa usa ka babaye ug mga anak nga naglakaw duol sa gitukoran og templo

Anino sa usa ka babaye ug mga anak nga nagpahulay ilawom sa kahoy duol sa kamaisan

Nangagi sila sa laktoranan latas sa kamaisan. Usahay, mohunong sila aron mopahulay ug aron si Sheila makalihok-lihok ug makainat. Nag-istoryahanay sila, nanganta og mga awit, ug naminaw sa mga langgam. Human makalakaw og usa ka oras ug tunga, nalipay si Kupa nga makita na ang simbahan.

Gibasa ni Kupa ang karatula: “Ang Simbahan ni Jesukristo sa mga Santos sa Ulahing mga Adlaw.”

“Nahimo gayod nato,” miingon si Mama. Iyang gitangtang ang giputos ni Sheila.

“Ug sayo na usab kita!” miingon si Kupa nga mahinamon.

Babaye ug mga anak nga nangabot sa simbahan

Sa wala madugay si Kupa ug Mama malipayong mitimbaya sa uban nga misulod sa bilding. Ganahan si Kupa nga makauban ang mga tawo sa simbahan. Gibati niya nga gihigugma didto.

Si Kupa ug ang iyang pamilya nakakita og dapit nga malingkoran. Nindot ang pamati nga makapahulay ang iyang mga tiil. Sa dihang miambit siya sa sakramento, naghunahuna siya ni Jesukristo. Dayon naminaw siya og maayo samtang gipasabot sa Bishop nga kadto Dominggo sa puasa ug gidapit ang mga tawo sa pagpaambit sa ilang mga pagpamatuod.

Si Kupa mitan-aw ug naminaw samtang ang uban miadto sa atubangan sa chapel aron ipaambit kon unsa ang ilang gituohan. Gusto niya nga silang tanan makahibalo nga aduna usab siyay pagpamatuod. Milakaw si Kupa paingon sa atubangan sa lawak. Mibati siya og gamay nga kakulba, apan nakahibalo siya kon unsa ang gusto niyang isulti.

Miginhawa siya og lawom, mitul-id og barog, ug miingon, “Ganahan ko nga makakita sa templo. Nakahibalo ko nga kini usa ka espesyal nga dapit sa pagkat-on mahitungod sa plano sa Langitnong Amahan. Ang atong kinabuhi usa ka bililhong gasa gikan Kaniya. Nasayod ako nga ang mga kasulatan tinuod. Nasayod ako nga ang Langitnong Amahan ug si Jesus nahigugma kanako. Naningkamot ako nga magmabination ug matinabangon sama ni Jesus. Nasayod ako nga ang Simbahan tinuod. Sa ngalan ni Jesukristo, amen.”

Batang babaye nga naghatag sa iyang pagpamatuod sa simbahan

Gitan-aw ni Kupa ang mga tawo sulod sa lawak. Nagpahiyom sila kaniya. Mipahiyom og dako si Kupa ug milakaw pabalik sa iyang lingkoranan. Gigakos siya ni Mama sa dihang milingkod siya. Nalipay si Kupa nga nakabaton siya og kaisog sa pagpaambit sa iyang pagpamatuod. Si Kupa ganahan og Dominggo.