Rahi roa nō te Paraimere ?

« Mānava i te ’āmuira’a mai i te Paraimere ! » Tē ti’a ra te tuahine Agbor, te ta’ata fa’atere nō te Paraimere a Gift, i mua i te piha. « I teie mahana e ha’api’i mai tātou i te hīmene ‘’A here ’outou’ ».

’Ua ha’amata te pehe, ’e ’ua ineine te mau tamari’i ’āpī a’e nō te hīmene. ’Ua ’ite a’ena rā Gift i teie hīmene. ’Ua hīmene ’oia i te reira e hānere taime ! ’Aita roa ’oia e ’ana’anatae ra e hīmene i te reira i teie mahana.

’Ua fiu roa Gift i te Paraimere. E mea pa’ari roa ’oia, e mea roa a’e ’e te rahi a’e i te tahi atu mau tamari’i. Tei roto tōna mau hoa o te fare purera’a i te Feiā ’Āpī Tamāhine i teienei. Tē toe fa’ahou ra iāna hō’ē matahiti tā’āto’a hou ’oia e nehenehe ai, e ’āmui atu ia rātou i te piha ha’api’ira’a ’e te mau ’ātivite a te Feiā ’Āpī Tamāhine.

’A hīmene noa ai te tā’āto’ara’a, ’ua vai mū noa Gift. ’Ua muhumuhu noa ’oia i te tahi mau parau o te mau hīmene, tei roto rā ’oia i te ferurira’a.

I muri iho, ’ua tae mai te hō’ē mana’o iāna. Penei a’e mai te peu e paraparau ’oia i te ’episekōpo, e vaiiho paha ïa te ’episekōpo iāna ’ia haere ’oi’oi atu i te Feiā ’Āpī Tamāhine ’ia ’āmui atu ’e tōna mau hoa.

’Ua fārerei atu Gift i te ’episekōpo Achombi i te fa’aotira’a te purera’a. « ’Ia ora na Bishop », ’ua parau ’oia « Tē mana’o nei au ē ’aita vau e tano fa’ahou ’ia fa’aea i te Paraimere. Mea rahi a’e au ’e e mea pa’ari roa i te tahi atu mau tamari’i. E nehenehe ānei au e ha’amata i te haere i te piha a te Feiā ’Āpī Tamāhine ? »

’Ata’ata a’era te ’episekōpo Achombi. « ’Ua ’ite au ē, e mea ’ana’anatae roa ’ia haere atu i te Feiā ’Āpī Tamāhine », ’ua parau te ’episekōpo. « Terā rā, e nehenehe noa ’oe e ha’amata i te haere i te matahiti e ti’ahia ai tō ’oe e 12 matahiti. ’Eiaha e ’ino’ino mai ».

Pi’o a’era te upo’o o Gift i raro i tōna nā tīa’a. « Nā reira ïa ».

« E fāna’o te Paraimere ’ia fa’aea mai ’oe », ’ua parau te ’episekōpo. « Tē mana’o nei au, tē fa’ahiahia nei te mau tamari’i ’āpī a’e ia ’oe. E nehenehe ’oe e fa’atupu i te hō’ē ta’a-’ē-ra’a rahi nō rātou ».

I te roara’a o te toe’a o te mahana, ’ua vai rumaruma noa Gift. E mea roa mau hō’ē matahiti nō te fa’aea ’ōtahi noa i te Paraimere.

I muri iho rā, ’ua feruri fa’ahou Gift i te mea tā te ’episekōpo Achombi i parau. Tē ha’afa’ahiahia mau ānei te tahi atu mau tamari’i iāna ? ’Aita roa atu ’oia i ’ite na i te reira nā mua a’e.

I te hepetoma i muri mai, ’ua aroha atu Gift i tōna mau hoa ’a haere ai rātou i te piha a te Feiā ’Āpī Tamāhine. ’Ua huti ’oia i te aho ’e ’ua haere atu i te piha o te Paraimere.

« Gift », ’ua parau mai te tuahine Agbor, « e hina’aro ānei ’oe e tauturu iā’u ’ia ha’api’i i te hīmene o teie hepetoma ? »

« Um, nā reira ïa », ’ua parau atu Gift. « E aha te hīmene tā tātou e ha’api’i mai ? »

« ‘Nā te Atua vau’ », ’ua parau te tuahine Agbor. « Māuruuru nō tā ’oe tauturu ! Tē mana’o nei au e ’ana’anatae te mau tamari’i ’ia ha’api’i mai nā roto mai ia ’oe ».

I te ha’amatara’a te taime hīmenera’a, tē ti’a ra Gift i mua i te piha. « I teie mahana e ha’api’i atu vau ia ’outou i te hō’ē o tā’u mau hīmene au roa a’e », ’ua parau ’oia. ’Ua tauturu ’oia i te mau tamari’i ’ia ha’api’i mai i te mau parau. I muri iho, ’ua hīmene ’oia i te hīmene ’e ’o rātou. ’A hīmene ai rātou, ’ua putapū Gift i te māhanahana ’e te ’oa’oa i roto iāna. ’Ua ’ite ’oia tē putapū nei ’oia i te Vārua Maita’i.

’Aita i maoro roa, ’ua fātata te piha o te Paraimere e fa’aoti ! I muri a’e i te pure hope’a, ’ua ha’amata Gift i te haere i rāpae. ’Ua hina’aro ’oia e fārerei atu i tōna mau hoa i muri a’e i tā rātou piha a te Feiā ’Āpī Tamāhine, nō te aroha ia rātou.

’Ua tāpe’ahia rā ’oia e te hō’ē o te mau tamāhine na’ina’i. « Māuruuru i te hīmenera’a nā muri ia mātou ! » ’Āpā iho ra ’oia ia Gift. « E hina’aro vau ’ia riro mai ia ’oe te huru ’ia rahi ana’e au ».

’Ata’ata a’era Gift. E hina’aro rahi noa ā tōna ’ia haere atu i te Feiā ’Āpī Tamāhine, ’e tē ti’aturi nei ’oia e vitiviti te matahiti i te tere. ’Ua ’ite rā ’oia ē, e nehenehe fa’ahou ’oia e ha’api’i mai ’e e rave i te mau ’ohipa maita’i i te Paraimere.

’E penei a’e ’ua tano iho ā te ’episekōpo Achombi. E nehenehe ’oia e fa’atupu i te hō’ē ta’a-’ē-ra’a.

Fa’ahōho’ara’a nā Simini Blocker