Te purera’a nō Alejandro

’Ua fa’ahe’e atu Gerardo nā ni’a i tōna tīa’a-huira e tae roa i te taupe’e o tōna fare. Tei ni’a te pere’o’o o māmā i te ’ē’a marumaru. Te aura’a ’ua ho’i mai ’oia ’e tōna tua’ana ’o Alejandro, na te taote mai. ’Ua tātara Gerardo i tōna tīa’a-huira ’e horo atu ra i roto i te fare.

« Gerardo ? » Pi’i mai ra māmā. « Tei i’ō nei māua ! »

Tomo mai nei Gerardo i roto i te piha ’utuāfare. Tē tārava rā Alejandro i ni’a i te pārahira’a roroa. Tē pārahi ra māma i pīha’i iho iāna. E hi’ora’a pe’ape’a tōna.

’Ua pe’ape’a ato’a Gerardo. I te hepetoma i ma’iri nei, ’ua ’itehia e ma’i māriri ’aita’ata tō Alejandro. E mea ma’i roa ’oia.

’Ua ti’a pārahi mai rā Alejandro ’e ’ua ’ata’ata mai ia Gerardo i te tomora’a mai ’oia. « ’Ia ora na ! Mea maita’i ’oe teie mahana ? »

« ’Ē, e aha te huru i te taote ? » ’Ua ui atu Gerardo.

« ’Ua parau ’oia e mea ti’a iā’u ’ia tāpūhia », ’ua parau Alejandro.

’Ua tā’iri’iri māmā i tōna upo’o. « Terā rā, te mau taote maita’i roa a’e e nehenehe e tauturu iāna, tei te fare ma’i ïa a te mau tamari’i. Nō te mea e 14 matahiti tō Alejandro, e mea pa’ari roa ’oia ’ia utuutuhia i reira. E mea ti’a ’ia ’itehia mai te tahi atu vāhi ».

Vī a’era te ’ōuma o Gerardo. E mai te mea e’ita e roa’a te tauturu nō Alejandro, e aha te ’ohipa e tupu mai ? E ’ino roa ānei te māriri ’aita’ata o Alejandro ?

’Ua haere atu Gerardo i roto i tōna piha. ’Ua hina’aro ’oia e feruri maita’i.

I te Paraimere, ’ua ha’api’i mai Gerardo ē, e fa’aro’o te Metua i te ao ra iāna i te mau taime ato’a. ’Ua ’ite Gerardo e nehenehe noa ’oia e ani iāna i te tauturu.

Nō reira, ’ua tūturi atu ’oia i pīha’i iho i tōna ro’i ’e ’ua tūfene i tōna nā rima. « E te Metua here i te ao ra, ʼa tauturu mai na ia Alejandro », ’ua pure ’oia. « ’A tauturu mai na ia mātou ’ia ’ite mai i te mau taote e nehenehe e rave i te tāpūra’a ».

’Aita i maoro, ’ua pi’i mai māmā iāna nō te haere e tāmā’a. ’Ua tunu ’oia i te pupusas [faraoa nō Salvador], te mā’a au roa a’e a Gerardo. ’Ua ’amu ’oia i te hō’ē tuha’a rarahi o te faraoa me’ume’u, tei ’ī i te pata pa’ari ’e te pipi. Terā rā, tē ha’ape’ape’a noa ra ’oia nō tōna taea’e.

’Ua ’amu noa Alejandro te tahi ma’a tuha’a ri’i o tāna pupusa. E mata tu’atu’a tōna ’e ’ua ha’uti’uti marū noa.

’Ua ’ite ato’a mai māmā iāna. « E māta’ita’i ana’e tātou i te hō’ē vidéo a te ’Ēkālesia ? », ’ua ui atu ’oia. E ’ohipa au roa nā rātou ’ia māta’ita’i i te mau vidéo nō ni’a ia Iesu Mesia i te mau taime pe’ape’a.

« Nā reira ». ’Ua tāmā Gerardo i te mau ’āu’a, ’a fa’aineine ai māmā i te vidéo. I muri iho, ’ua pārahi atu rātou pā’āto’a nō te māta’ita’i.

I roto i te vidéo, ’ua pure Iesu Mesia i roto i te hō’ē ’ō i pīha’i iho i te hō’ē tumu rā’au. ’Ua mātau maita’i Gerardo i teie ’ā’amu. I te taime ’a mamae ai Iesu hou ’oia ’a pohe ai i ni’a i te tātauro.

I te hopera’a te vidéo, ’ua fa’ari’i Gerardo te hau ’e te māniania ’ore. Terā rā e uira’a tāna. « Nō te aha ’ua ti’a ia Iesu i māuiui rahi atu ā ? », ’ua ui atu ’oia.

’Ua tāpe’a mai māmā iāna ’e ia Alejandro i pīha’i iho mai. « ’Ua mā’iti Iesu ’ia putapū i te mamae nō te mea ’ua here ’oia ia tātou. ’Ua putapū ’oia i te mau māuiui ato’a tā tātou e fa’aruru nei ».

’Ua hi’o atu Gerardo ia Alejandro. « ’Ua ’ite mau ānei Iesu e aha tā te ma’i māriri ’aita’ata e fa’atupu mai ? »

« ’Ē, ’ua ’ite ’oia », ’ua parau māmā. « ’Ua ’ite ’oia i te teimaha o te reira. ’E nō te mea ’ua ’ite ’oia e aha tā te reira e fa’atupu mai, ’ua ’ite ’oia nāhea e tauturu ia tātou ».

’Ua fa’ari’i Gerardo i te māhanahana i roto iāna, mai tē huru ra ’ua pū’ohuhia ’oia i roto i te hō’ē ’ahu ta’oto rarahi. ’Ua ’ite maita’i ’e ’ua here te Metua i te ao ra ’e ’o Iesu Mesia i tōna ’utuāfare. ’Ua ’ite rāua nāhea i te tauturu ia Alejandro.

I te ho’ira’a Gerardo i te fare na te fare ha’api’ira’a mai i te mahana i muri iho, ’ua ’ite atu ’oia ia māmā i te fa’aineinera’a i te hō’ē pūtē ’ahu.

« E parau ’āpī maita’i ! », ’ua parau māmā. « ’Ua paraparau vau i te taote nō te fare mai o te mau tamari’i. E tauturu rātou ia Alejandro. E tāpūhia ’oia ananahi ».

’Ua ’āpā pūai atu Gerardo ia māmā. « Tē tauturu nei te Metua i te ao ra ia tātou ! E nehenehe ānei tātou e pure nō te ha’amāuruuru iāna » ?

« Mana’o maita’i roa », ’ua parau māmā. « E haere ana’e e ti’i mai ia Alejandro ».

’A pure ’āmui ai rātou, ’ua fa’ari’i Gerardo i te hau. ’Ua fa’aro’o mai te Metua i te ao ra i tāna pure. E fa’ari’i Alejandro i te tāpūra’a ’o tei tītauhia nōna i teienei. ’Ua pāpū ia Gerardo ē, ’ua ’ite maita’i Iesu Mesia i te fifi tā rātou e fa’aruru nei. ’E e tauturu noa ’oia ia rātou ’ia fa’aruru i tō rātou mau tāmatara’a.

Fa’ahōho’ara’a nā Ricardo Guerrero