Tā’u buka hōho’a nō te hiero

’Ia ora na !

’O Brayden tō’u i’oa, ’e tē ora nei au i Utaha, Marite.

E paraparau atu vau ia ’outou nō te hō’ē fā ’o tā’u i rave i te 10ra’a o tō’u matahiti.

’Ua ha’amata te reira nā roto i te hō’ē tere fārerei i tō’u nā metua pa’ari. E mau buka nō te hiero tā tō’u nā metua pa’ari i roto i tō rātou piha fa’afa’aeara’a, ’e e mea au nā’u ’ia māta’ita’i i te mau hōho’a. ’Ua fa’aoti a’era vau ē, e hina’aro vau e hāmani i tā’u iho buka nō te hiero. ’Ua ha’amau vau i te hō’ē fā tau roa nō te pāpa’i hōho’a i te mau hiero ato’a.

’Ua fa’aoti au e pāpa’i hōho’a i tā’u hiero mātāmua. ’Ua rave mai au i te hō’ē pēnitara, ’ua ’imi i te hō’ē hōho’a nā ni’a i te natirara, ’e ’ua pāpa’i hōho’a i te hiero nō St. George Utaha. I muri iho ’ua pāpa’i hōho’a vau i te hiero nō Logan Utaha ’e te hiero nō Manti Utaha. ’Ua parau mai tō’u māmā iā’u, ’ia fa’a’ohipa i te hō’ē buka hōho’a rahi nō tā’u mau hiero. I teienei, hō’ē matahiti ’e te ’āfa i muri mai, tei te hiero nūmera 81 vau, te hiero nō Reno Nevada. Tē toe ra iā’u e 105 hiero nō te rave !

Tē vai ra te mau taime e hina’aro vau e fa’aru’e i te hiero ’o tā’u e pāpa’i nei. ’Ia tupu ana’e mai te reira, e mea au nā’u ’ia pure ’e e ani i te Metua i te ao ra ’ia tauturu mai iā’u ’ia fa’aruru atu i te mau taime fifi.

Te mea fa’ahiahia roa i roto i teie fā, ’ua tauturu te reira i tō’u nā teina e toru ’ia here rahi atu ā i te hiero. Tē pāpa’i hōho’a nei tō’u teina ’o Kade i te mau hiero ’o tāna e hina’aro e haere atu e māta’ita’i i te hō’ē mahana, ’e te tahi atu mau taea’e tō’u te pāpa’i hōho’a nei i te mau hiero nō tā rātou mau ’orometua ’e mau hoa.

’Ua tauturu ato’a tā’u fā iā’u ’ia ’ite mai i te tahi o tā’u mau ’ana’anataera’a ’ē atu. Mea au roa nā’u ’ia hāmani. ’Ua ha’amata vau i te hāmani i te mau hōho’a o te hiero 3D i te tau māhanahana i ma’iri a’e nei, ’e tē ti’aturi nei au ’ia riro ’ei tahu’a nīno’afare ’ia pa’ari au.

’Ua tauturu teie fā iā’u ’ia ha’afātata atu ā vau i te Metua i te ao ra ’e ia Iesu. I te mau taime ato’a e pāpa’i hōho’a vau i te hō’ē hiero, e putapū vai i te Vārua. ’Ua ’ite au ē e mau fare nō te Atua te mau hiero. ’Aita i maoro a’enei, ’ua nehenehe iā’u e māta’ita’i i te hiero nō Payson Utaha ’e te tahi atu. E putapū pūai au i te Vārua ’ia rave ana’e au i te mau bāpetizora’a o te hiero.

I te mau taime ato’a ’ia ’ite au i te hō’ē hiero, e tauturu te reira iā’u ’ia pūai atu ā i roto i te mā’itira’a i te maita’i.

Mau hōho’a pāpa’i nā Brayden B.