Mau ’ohipa ri’i o te Mai, pe’e mai

Nō te Moromona 1–6

’Ua here Moromona i te mau ’āti Nephi (hi’o Moromona 3:12). ’Ua ani mai te Metua i te ao ra ’e ’o Iesu Mesia ia tātou ’ia here ato’a ia vetahi ’ē. ’A ti’a ha’amenemene ’e ’a tāpiri i tō ’outou mata. ’A tai’o ē tae roa i te toru, i muri iho ’a ’ara’ara tō ’outou mata ’e ’a hi’o atu i te hō’ē ta’ata. Mai te peu e hi’o mata mai tera ta’ata ia ’outou, ’a parau i te hō’ē mea tā ’outou i au nō ni’a i te tahi ’e te tahi, ’e ’a haere i rāpae i te ha’amenemenera’a. ’A nā reira noa ē tae roa i te taime e toe mai hō’ē ana’e ta’ata ! I muri iho e parau te tā’āto’ara’a i te hō’ē mea tā rātou i au nō teie ta’ata.

Nō te Moromona 7–9

’Ia pe’e ana’e tātou ia Iesu Mesia, e nehenehe te Metua i te ao ra e ha’amaita’i ia tātou nā roto i te mau temeio. ’A tai’o te Moromona 8:24 ’e ’a pāpa’i hōho’a i te hō’ē o te mau temeio tei fa’a’itehia i roto i te ’īrava. ’A pāpa’i hōho’a ai ’outou, ’a paraparau nō ni’a i te mau temeio tā te Metua i te ao ra i rave nō tō ’outou ’utuāfare.

Nō te Etera 1–5

’Ua ani te taea’e o Iareda i te Fatu ’ia tāpe’a i te mau ’ōfa’i ’ia māramarama tōna mau pahī (hi’o Etera 3). ’A ’ohi mai i te mau ’ōfa’i nā rāpae ’aore rā ’a tāpūpū i te mau menemene i roto i te mau pāpie pa’ari. I ni’a i tā ’outou mau ’ōfa’i ’aore rā mau pāpie, ’a pāpa’i, ’a pāpa’i hōho’a ’aore rā ’a pēni i te mau mea ’o tā ’outou e nehenehe e rave nō te ’āfa’i i te māramarama ’e te here ia vetahi ’ē.

Nō te Etera 6–11

’A rātere ai rātou nā ni’a i te moana, ’ua hīmene te taea’e o Iareda ’e tōna ’utuāfare i te mau hīmene nō te ’ārue i te Fatu, nō te ha’amāuruuru iāna nō te tauturura’a ia rātou (hi’o Etera 6:9). E nehenehe ato’a ’outou e hīmene nō te ha’amāuruuru i te Fatu ! ’A mā’iti i te hō’ē hīmene au-roa-hia i roto te Buka Hīmene nā te mau tamari’i ’aore rā te Tahua natirara a te ’Ēkālesia ’e ’a hīmene ’āmui i te reira. Nāhea ’outou ’ia fa’a’ite i te Metua i te ao ra ē, tē māuruuru nei ’outou ?