Te pāpa’ira’a mo’a ’ana’ana a Maja

’Ua pārahi atu Maja i ni’a i te ’ē’a tahua o tōna fare ’e ’ua tu’u i tōna ta’a i roto i tōna rima. Tē hiti ra te mahana i tōna mau hihi ’ana’ana, te ve’ave’a nā roto i te mau tumu rā’au rarahi. ’Ua ’ī te reva i te hau’a paina ’āpī.

’Ua haere mai Mami i rāpae ’e ’ua pārahi i pīha’i iho ia Maja. « E aha tā ’oe e feruri nei ? »

« ’Ua tītauhia iā’u ’ia fa’a’ite i tā’u pāpa’ira’a mo’a au roa a’e i roto i te Paraimere », ’ua parau atu Maja. « Terā rā ’aita tā’u e mea au roa a’e. ’E ’aita vau i ’ite e aha tē mā’iti ».

Tā’iri’iri a’era Mami i tōna upo’o. « Te mā’itira’a i te hō’ē pāpa’ira’a mo’a au roa a’e e mea fifi ». ’Ua hi’o atu ’oia i te mau tumu rā’au, ti’a a’era i muri iho. « E mana’o tō’u ».

’Ua ho’i atu Mami i roto i te fare. I tōna ho’ira’a mai, tei tōna rima tāna mau pāpa’ira’a mo’a. « E ha’amata ana’e nā roto i te hō’ē ’ā’amu. E aha tā ’oe ’ā’amu au roa a’e i roto i te pāpa’ira’a mo’a ? »

’Ua feruri Maja i te reira. « Mea au nā’u i tō Iesu fārereira’a i te mau ’āti Nephi ».

Fefeu a’e ra Mami i te mau ’api o te Buka a Moromona. « E ha’amata terā ’ā’amu i roto i te 3 Nephi ». Fa’atoro a’era ’oia i te ’api. « E tai’o tāua te tahi i muri mai i te tahi ’e e mā’iti tāua i te mau ’īrava tā tāua e au ».

Fa’ari’i iho ra Maja ma tōna upo’o ’e ’ua fa’aro’o ’a tai’o ai Mami. ’Ua tai’o ’oia nō ni’a ia Iesu Mesia i te pi’ira’a i tāna mau pipi. ’Ua tai’o ’oia nō ni’a i te feiā fa’atupu hau ’e te pure.

I muri iho ’o te taime ïa nō Maja. I te fa’aotira’a ’oia i te hō’ē o te mau ’īrava, ’ua fa’aea ri’i ’oia. E au ra iāna ē ’ua ’ana’ana maita’i te mahana nō te fa’a’ī i tōna ’ā’au.

Hi’o atu ra ’oia ia Mami. « Mea au roa nā’u teie »

« Vau ato’a. « E aha te mea tā ’oe i au nō ni’a i te reira ? » Ui a’era Mami.

Pei a’era Maja i tōna pa’ufi ma te mata ’ata’ata. « Nō ni’a ïa ia Iesu. ’E e fa’a’oa’oa te reira iā’u ».

E mata ʼata’ata tō Mami. « E rāve’a maita’i roa te reira nō te ’ite ē, ’ua ’itehia mai ia ’oe te hō’ē pāpa’ira’a mo’a au roa a’e. E hina’aro ānei ’oe e fa’a’ite i te reira i te Paraimere ? »

Tā’iri’iri a’era Maja te upo’o ma te ’oa’oa. « E hina’aro ānei ’oe e tauturu iā’u ’ia tāmau i te reira ? »

« ’Ē ! » ’Ua parau Mami

’Ua tāmau Mami ’e ’o Maja hō’ē ta’o i te taime hō’ē. ’A ’ohipa ai rāua, tē ta’ita’i ra te mau manu i roto i te mau tumu rā’au, mai te huru ra tē ha’api’i ato’a mai ra rātou.

I te hepetoma tā’āto’a, ’ua tāmau noa Maja i tāna pāpa’ira’a mo’a ’āpī au roa a’e. I te po’ipo’i sābati, ’ua taiā ri’i tōna ’ā’au. ’Ua tāmau noa ’oia i te fa’ahiti i tāna pāpa’ira’a mo’a nā ni’a i te purūmu e tāpae roa i te fare purera’a.

E mea iti roa te tamari’i i roto te Paraimere a Maja. I tōna rā tomora’a i roto i te piha, e au ra ia Maja tē rere ra te mau pūrēhua nā roto i tōna ’ōuma.

I te taera’a tōna taime, ’ua ti’a atu Maja i ni’a ma te huti i tōna aho. E fa’ahiti ihora, « Inaha, ’o vau te ture ’e te māramarama. Hi’o mai iā’u nei, ’e ’a tāmau ā ē tae noa atu i te hope’a, ’e e roa’a ia ’outou te ora ; ’e ’o ’oia ’o tē tāmau ā ē tae noa atu i te hope’a ra, ’o tā’u ïa e hōro’a atu i te ora mure ’ore ».

I te otira’a, pārahi iho ra Maja ma te mata ’ata’ata. ’Ua rave ’oia ! ’Ua mo’e roa te mau pūrēhua taiā, ’e ’ua ho’i mai te nino’a mana’o māhanahana ’e te ’ana’ana. ’Ua ’ite ’oia e hōpoi mai tāna pāpa’ira’a mo’a au roa a’e i teie huru nino’a mana’o i te mau taime ato’a e hina’aro ai ’oia i te reira.

Fa’ahōho’ara’a nā Chloe Dominique