« Mau parau a’o nō tō ’oe tere mātāmua i te hiero », Hoa, Novema 2024, 38–39.

Mau parau a’o nō tō ’oe tere mātāmua i te hiero

I roto i te hiero, e nehenehe ’oe ’ia bāpetizohia ’e ’ia ha’amauhia nō te feiā i pohe ma te ’ore i fa’ari’i i te ’evanelia. E fāna’o teie mau ta’ata i te rave i te hō’ē fafaura’a ’e te Atua ’e e fa’ari’i i tāna mau ha’amaita’ira’a, mai tā ’oe i rave i te taime ’a bāpetizohia ai ’oe ’e ’a ha’amauhia ai.

E aha te mea e ’āfa’i atu

Te ’ahu purera’a (’ia ’ō’omo mai te reira nō te haere i te hiero)
Te parau fa’ati’a nō te hiero
Te paehere rouru ’e te tā’amu rouru (mai te mea e hina’arohia)
Te mau i’oa o te mau melo o te ’utuāfare tei nene’ihia nā roto mai i te fa’anahora’a FamilySearch ’aore rā te tahua ’itenati (fa’ahepo-’ore-hia)

E aha te ’ohipa e rave

Mau tamari’i e tomo ra i roto i te hō’ē hiero

1. Tomora’a i roto i te hiero

’A fa’a’ite atu i tā ’oe parau fa’ati’a nō te hiero i te vāhi tomora’a. I muri iho, e nehenehe ’oe e haere atu i te vāhi bāpetizora’a. E hōro’a mai te hō’ē rave ’ohipa o te hiero ia ’oe i te ’ahu roto ’uo’uo, te mau tōtini ’e te hō’ē ’ahu bāpetizora’a.

2. Taui i tō ’oe ’ahu

I roto i te piha fa’a’ahura’a, ’a ’ō’omo i te mau ’ahu i hōro’ahia mai ia ’oe. ’A tu’u atu i tā ’oe mau tao’a i roto i te hō’ē vaira’a vata. I muri iho ’a pōnao atu i tō ’oe vaira’a ’e ’a tāmau te tāviri i ni’a i tō ’oe ’ahu bāpetizora’a. Mai te mea e rouru roa tō ’oe, ’a tā’amu i te reira. ’A tāpe’a noa i tā ’oe mau i’oa ’utuāfare i nene’ihia.

Tamāhine e tai’o ra i te mau pāpa’ira’a mo’a

3. ’A tīa’i ma te fa’atura

’A tīa’i noa ai ’oe i tō ’oe taime ’ia bāpetizohia ’oe, e nehenehe ’oe e tai’o i te mau pāpa’ira’a mo’a, e pure ’aore rā e feruri hōhonu. E nehenehe ato’a ’oe e feruri i te mau ta’ata tā ’oe e bāpetizo atu.

Tamāhine e rave rā i te mau bāpetizora’a o te hiero

4. Te ’āmuira’a mai i roto i te mau bāpetizora’a o te hiero

’Ia tae ana’e i tō ’oe taime, ’a hōro’a i tā ’oe mau i’oa ’utuāfare i te ta’ata pāpa’i parau. Mai te mea ’aita tā ’oe e mau i’oa, e fa’a’ohipa rātou i te mau i’oa a te hiero. ’A ha’apa’o maita’i ’ia tomo ’oe i roto i te ’āpo’o pape, i reira te hō’ē taea’e tei mau i te autahu’ara’a e bāpetizo ai ia ’oe nō te mau ta’ata tāta’itahi. ’A ha’amana’o i te ’ōfati i tō ’oe turi ’āvae ’e ’ia tāpe’a i tō ’oe ihu ’a tāumi ai ’oia ia ’oe i roto i te pape.

Tamāroa i roto i te ’ahu purera’a, tamāhine e ha’amauhia ra.

5. ’A taui fa’ahou i tō ’oe iho ’ahu

’Ia oti ana’e ’oe i te rave i te reira, e hōro’a mai te hō’ē ta’ata ia ’oe te hō’ē tauera. ’A ho’i atu i roto i te piha tauira’a ahu, i reira ’oe e nehenehe ai e hapu i te pape, e ’ō’omo fa’ahou mai i tō ’oe ’ahu maro ’e e pāhere i tō ’oe rouru. ’Ia pāpū maita’i ’ua tu’u ’oe i tō ’oe mau ’ahu rari i roto i te vaira’a ’ahu rari ’e ’ua vaiiho i te tāviri i ni’a i te pōnao o tō ’oe vaira’a ’ahu.

6. ’Āmui mai i roto i te ha’amaura’a

I te pae hope’a, e arata’i te hō’ē ta’ata ia ’oe i te hō’ē piha i reira ’oe e ha’amauhia ai nō te feiā i bāpetizohia.

E nehenehe te tahi mau hiero e rave i te mau ’ohipa e mea ta’a ’ē ri’i. Noa atu ra te reira, tē vai rā iho ā te mau ta’ata nō te tauturu ia ’oe i roto i te tuha’a tāta’itahi o te ’ohipa. ’A ha’amana’o, te hiero ’o te fare ïa o te Fatu ’e tē ’oa’oa nei ’oia ’ia fa’ari’i mai ia ’oe i reira !