E ’āmuira’a ta’a ’ē

« Aminah, nā’u teie ! » ’Ua tuo Indira. ’Ua huti mai ’oia i te tifeirei i te rima o tōna teina.

« Te mau tamāhine, tē haere nei au », ’ua pi’i mai ra māmā. « ’Ia maita’i noa tō ’ōrua huru i ni’a ia pāpā ».

Hi’o a’era Indira i ni’a. « Tē haere nei ’oe i hea ? »

« I te mātete. E ho’o mai i te mā’a nō te tunu i te hō’ē mea ta’a ’ē nō ananahi ». ’Ua nānā mai māmā iāna.

Hō’ē mā’a ta’a ’ē ? Nō te aha rā ? ’Ua haere atu Indira e ’imi ia pāpā. « Nō te aha e mea ta’a ’ē ananahi ? » ’ua ui atu ’oia

’Ata’ata a’era pāpā. « Ananahi, e ti’a ia tātou e māta’ita’i i te ’āmuira’a rahi ! E mea ta’a ’ē nō te mea e fa’aro’o tātou i te peropheta ’e te tahi atu feiā fa’atere o te ’Ēkālesia ’ia paraparau mai. E parau mai rātou ia tātou i te mea tā tō tātou Metua i te ao ra e hina’aro ’ia fa’aro’o tātou ».

I tō māmā ho’ira’a mai te fare, ’ua fa’anaho ’oia i te mā’a. ’Ua porōmu pāpā i te tahua.

Ani atu ra māmā. « Indira, e nehenehe ānei ’oe e tauturu ia Aminah ’ia fa’aineine i tōna ’ahu nō ananahi ? »

Fa’atu’atu’a mai ra Indira i tōna mata. « Nō te aha nā’u e tauturu iāna ? »

« ’A rave noa na i te mea tā’u e ani ra », ’ua parau māmā

’Ū’uru a’era Indira. ’Ua fa’atāere noa ihora ’oia ’e haere atu ra e tauturu ia Aminah.

I te po’ipo’i a’e, ’ua ara mai Indira ’e te hau’a au maita’i. ’Ua ’ōu’a mai ’oia i raro i tōna ro’i ’e ’ua horo atu i te fare tūtu. ’Ua hāmani māmā i te pua’atoro tāre’a ’e te ’īna’i tui tunupa’a nō te tāmā’a i te avatea i muri mai ! ’Auē ïa te au ē.

’Aita i maoro roa, ’ua ha’amata te ’āmuira’a rahi. ’Ua pārahi atu Indira i pīha’i i tōna ’utuāfare nō te māta’ita’i i te ’āfata teata. ’Ua fa’aro’o ’oia i te pupu hīmene e hīmene ra. ’Ua fa’aro’o ’oia i te mau ta’ata tei paraparau nō ni’a i te mau hiero ’e te mau pāpa’ira’a mo’a ’e nō Iesu Mesia.

Te ta’ata a’o hope’a ’o te peropheta ïa, te peresideni Russell M. Nelson. ’Ua paraparau ’oia mea nāhea te ’Ēkālesia e tauturu ai i te ta’ata ’ati a’e te ao nei.

« E tae mai tō tātou ’oa’oa rahi ’a tauturu ai tātou i tō tātou mau taea’e ’e mau tuahine », ’ua parau ’oia

’Ua feruri a’era Indira i te reira. Te tauturura’a iāna ’ia fa’a’oa’oa ānei iāna ? ’Ua tāmau ā ’oia i te fa’aro’o. ’Ua parau te peresideni Nelson ē, te orara’a i te piti o te fa’auera’a rahi e tauturu te reira ia tātou ’ia riro mai ia Iesu Mesia te huru.

I te hopera’a te reira, ’ua tāmā’a rātou i te mā’a tei tunuhia e māmā. ’Ua feruri tāmau noa Indira i te a’ora’a a te peropheta.

« E aha te piti o te fa’auera’a rahi ? », ui a’era ’oia

« E aroha atu ’oe i tō ta’ata tupu mai tō aroha ia ’oe iho », ’ua parau pāpā.

’Ua feruri Indira i te mau ta’ata tā te ’Ēkālesia i tauturu nā te ao nei. « Nāhea vau e nehenehe ai e tauturu mai te peu tē ora nei tō’u mau ta’ata tupu i te vāhi ātea ? »

« Tō ’oe ta’ata tupu ’o te feiā ato’a nā pīha’i iho ia ’oe », ’ua parau māmā. « Mai te mau melo ’o tō ’oe ’utuāfare ».

Hi’o a’era Indira i raro. E ’ere ’oia i te mea maita’i roa i ni’a i tōna ’utuāfare i te tahi taime.

Terā rā penei a’e te tauturura’a ia rātou e nehenehe e fa’a’oa’oa iāna, mai tā te peresideni Nelson i parau. ’O te hō’ē rāve’a teie nōna nō te pe’e ia Iesu. ’Ua hina’aro ’oia e tāmata !

Nō te toe’a o te hepetoma, ’ua tāmata Indira i te riro ’ei mea maita’i a’e i ni’a i tōna ’utuāfare. ’Ua ha’uti ’oia ’e ’o Amirah. ’Ua hōro’a i tāna mau ha’uti. ’Ua rave i te mea tā māmā ’e pāpā i ani ma te amuamu ’ore. ’Ia tauturu ana’e Indira i tōna ’utuāfare, e ’oa’oa rātou. ’E e fa’a’oa’oa ato’a te reira iāna.

’Ua tano roa te peropheta. Te tauturura’a ia vetahi ’ē ’ua hōro’a mai iāna te ’oa’oa !

Fa’ahōho’ara’a nā Judi Abbot