Mula sa Lingguhang YA

Mga Young Adult, Lumang Tipan: Pagsisimula sa Sinaunang Aklat na Ito

Ni Eric D. Snider

Mga Magasin ng Simbahan

Ano ang mayroon sa sinaunang aklat na ito na para sa atin?

lalaking nagbabasa at nag-aaral ng mga banal na kasulatan

Ang Lumang Tipan ay napakatanda na. Nag-umpisa ito sa pagsisimula ng mortal na buhay sa mundo at nagwakas—nagwakas—mga 2,500 taon na ang nakararaan.

Maaaring mapaisip ka kung paano nagkaroon ng kaugnayan ang gayong sinaunang aklat sa kasalukuyang panahon, lalo na sa mga young adult. Maraming mahahalagang tao sa Lumang Tipan ang nagsakatuparan ng mga pinakatanyag na gawain nila noong sila ay, sabihin na nating, matatanda na. At kahit mayroon ding ilang kabataan na nagbibigay-inspirasyon, lahat ng kuwento tungkol sa kanila ay sinauna.

Pero nangangahulugan lamang iyan na ang mga salaysay na ito tungkol sa mga pakikipag-ugnayan ng mga tao sa Diyos ay nananatili sa buong kasaysayan nito. Ang mga kuwento mismo ay nagbibigay-inspirasyon—at ang katotohanang nakapagbigay-inspirayon ang mga ito sa mga tao sa loob ng ilang milenyo ay talagang nakapagbibigay-inspirasyon.

Kung nais mong malaman kung paano iaangkop sa iyong buhay ang pag-aaral mo ng Lumang Tipan ngayong taon, narito ang ilang bagay na dapat hanapin sa iyong pagbabasa:

Maghanap ng Katulad na mga Isyu

Tulad ng mga tao sa Lumang Tipan, hinihintay natin ang matagal nang ipinangakong Tagapagligtas. Tulad nila, nais nating mangyari ito ngayon, kung hindi man kahapon. Tulad nila, kailangan nating hintayin ang itinakdang oras ng Diyos—pero wala tayong duda kahit sandali na iyan ay mangyayari.

Hinihintay natin ang Ikalawang Pagparito ng Tagapagligtas. Hinihintay noon ng ating mga ninuno ang Kanyang unang pagparito. Ang ating pananampalataya ay pinalalakas ng kaalaman na nabuhay na Siya at naisakatuparan na Niya ang Pagbabayad-sala. Ang ating mga ninuno ay kinailangang manampalataya sa Tagapagligtas bago Siya isinilang sa mundo o nagsagawa ng Kanyang Pagbabayad-sala!

Ang pagsasaisip sa magkakatulad na hamong ito ay maaari pang gawing mas nagbibigay-inspirasyon ang mga kuwento ng pananampalataya at katapatan sa Lumang Tipan.

Hanapin ang Tagapagligtas

Ito ang isang mahalagang kaalaman tungkol sa doktrina: Ang banal na personaheng tinutukoy na “Diyos” at “ang Panginoon” (o “ang Panginoon”) sa Lumang Tipan ay karaniwang ang Tagapagligtas na si Jesucristo. Siya ay tinatawag noon na Jehova. Pinangasiwaan Niya ang mga gawain sa mundo sa ilalim ng patnubay ng Kanyang (at ating) Ama sa Langit.

Nang kausapin ng Diyos si Moises, iyon ay sa pamamagitan ni Jesucristo.

Nang tumakas si Jonas sa misyon na iniatas sa kanya ng Panginoon, si Jesucristo ang tinakasan niya.

Nang kausapin ng Diyos sina Ezekiel, Jeremias, Isaias, at ang lahat ng iba pang mga propeta, ginawa Niya ito sa pamamagitan ng Nilalang na kalaunan ay magbabayad-sala para sa kanilang (at ating) mga kasalanan.

Ang pangalang “Jesucristo” ay hindi lumitaw sa Lumang Tipan. Ngunit kapag natanto mo kung sino Siya, matatagpuan mo Siya sa halos lahat ng pahina.

Tumingin sa Hinaharap

Sinabi namin kanina na ang Lumang Tipan ay nagwakas 2,500 taon na ang nakararaan. Ang katagang Lumang Tipan ay tumutukoy sa pinakaunang mga propesiya, pero higit pa riyan ang mga propesiyang naroon. Marami ang angkop sa ating panahon at sa hinaharap.

Alam na ng Ama sa Langit at ni Jesucristo sa simula pa lamang kung ano ang mangyayari sa mundong nilikha Nila. Ang mga banal na kasulatan, pati na ang Lumang Tipan, ay narito upang ituro sa atin kung ano ang natutuhan—o hindi natutuhan ng ating mga ninuno: na ang pananampalataya sa Diyos at sa Kanyang Anak ang pinakamahalagang bagay na maaari nating matamo sa ating buhay. Ngayong taon, may pagkakataon tayong lahat na makahanap ng bagong inspirasyon sa isang napakalumang aklat.

Karagdagang mga Tulong sa Pag-aaral para sa Lumang Tipan

Para sa marami sa atin, ang Lumang Tipan ang pinakamahirap unawaing aklat ng banal na kasulatan, at ito marahil ang aklat na binago nang husto mula sa orihinal na pagkasulat dito. Tulad ng natutuhan natin sa Bible Dictionary: “Pinagpipitaganan at iginagalang ng Simbahan ang Biblia pero kinikilala na hindi ito kumpleto ni lubos na tumpak na talaan. Ipinahahayag din nito na ang Panginoon ay nagbigay ng karagdagang paghahayag sa pamamagitan ng Kanyang mga propeta sa mga huling araw na nagpapatibay, sumusuporta, at nagpapatunay sa mga salaysay sa Biblia tungkol sa mga pakikipag-ugnayan ng Diyos sa sangkatauhan.”

Habang nasa isip iyan, narito ang ilang ideya para sa masigasig na pag-aaral ng Lumang Tipan:

Maging Pamilyar sa mga Resource ng Simbahan

Ang Gospel Library at ang website ng Simbahan ay puno ng mga tulong sa pag-aaral, at laging dinaragdagan ng bagong content. Tutulungan ka ng iskedyul ng mga babasahin sa Pumarito Ka, Sumunod Ka sa Akin na unahin ang mga bahagi ng Lumang Tipan na mahalaga sa atin ngayon. Ang Aklat ni Mormon ay katuwang ng Lumang Tipan, at ang mga turo nito ay makapagbibigay-kalinawan sa mga bahagi ng Lumang Tipan na maaaring mahirap maunawaan.

Para sa komentaryo ng propeta tungkol sa Lumang Tipan, bisitahin ang Scripture Citation Index—makikita mo kung aling mga talata sa banal na kasulatan ang nabanggit sa pangkalahatang kumperensya.

Alamin ang Konteksto ng Kasaysayan

Siyempre, ang mga tulong sa pag-aaral ng mga banal na kasulatan ay pangalawa sa tuwirang matututuhan natin mula sa mga banal na kasulatan at sa mga salita ng mga propeta sa mga huling araw. Pero kung naghahanap ka ng konteksto ng kasaysayan o iba pang impormasyon na katulad ng nasa encyclopedia, maaari ding makatulong ang mga komentaryo ng mga scholar. Ang Lumang Tipan ay posibleng naging paksa ng mas maraming komentaryo, pagsusuri, pag-aaral, at pagsisiyasat kaysa anupamang ibang aklat ng banal na kasulatan.

Tingnan ang Iba pang mga Pagsasalin

Sa Ingles, ang opisyal na ginagamit ng Simbahan ay ang King James Version ng Biblia at tinagubilinan ang mga miyembro nito na gawin ito. Pero napansin mo ba na nagbabanggit ang mga Apostol at iba pang mga General Authority ng iba pang mga pagsasalin sa kanilang mga mensahe sa pangkalahatang kumperensya? Sumangguni sa Aklat ni Mormon at sa makabagong mga banal na kasulatan kung makakakita ka ng pagkakaiba ng doktrina sa pagitan ng mga pagsasalin, pero ang makita lamang kung minsan ang isang bagay na nakasulat sa ibang salita at paraan ay maaaring makagawa ng kaibhan sa iyong pagkaunawa.