Gikan sa YA Matag Semana
Mga Young Adult, Daang Tugon: Pagsugod Niining Karaang Basahon
Unsa ang anaa niining karaang basahon alang kanato?
Ang Daang Tugon kay, siyempre, daan. Nagsugod kini sa sinugdanan sa yuta ug natapos—natapos—mga 2,500 ka tuig na ang milabay.
Tingali maghunahuna ka kon mahinungdanon ba kanang karaan nga basahon sa panahon karon, labi na sa mga young adult. Daghang mahinungdanong mga tawo sa Daang Tugon ang nakahimo sa ilang labing nailhan nga mga buhat sa dihang sila, ingnon ta, pinabali sa batan-on. Ug samtang adunay pipila ka makapadasig nga batan-ong mga tawo usab, tanang mga istorya mahitungod nila karaan na.
Apan nagpasabot lamang kana nga kini nga mga asoy sa mga pakighinabi sa mga tawo ngadto sa Dios nagpabilin sa dugayng panahon. Ang mga istorya mismo makapadasig—ug ang kamatuoran nga kini nakapadasig sa mga tawo sulod sa liboan ka tuig, mismo, daw makadasig.
Kon gusto ka nga mahibalo kon unsaon nga magamit ang imong pagtuon sa Daang Tugon nganha sa imong kinabuhi niining tuiga, ania ang pipila ka butang nga pangitaon diha sa imong nga pagbasa:
Pangita og Susama nga mga Isyu
Sama sa mga tawo sa Daang Tugon, naghulat kita sa dugay nang gisaad nga Manluluwas. Sama nila, nanghinaot kita nga mahitabo kini karon, kon dili kagahapon. Sama nila, kinahanglang maghulat kita sa gitakda nga panahon sa Dios—apan wala kita magduhaduha sulod sa usa ka gutlo nga kini mahitabo gayod.
Naghulat kita sa Ikaduhang Pag-anhi sa Manluluwas. Ang atong mga katigulangan naghulat sa Iyang unang pag-anhi. Ang atong pagtuo nalig-on sa kahibalo nga Siya nabuhi na ug nakatuman sa Pag-ula. Ang atong mga katigulangan kinahanglan nga magbaton og pagtuo diha sa Manluluwas sa wala pa Siya ipanganak dinhi sa yuta o mohimo sa Iyang Pag-ula!
Ang paghunahuna niining pagkasusama nga mga hagit makahimo sa mga istorya sa pagtuo ug debosyon sa Daang Tugon nga mas makapadasig.
Pangitaa ang Manluluwas
Usa ka mahinungdanon kaayo nga panglantaw sa doktrina mao kini: Ang balaan nga personahe nga gipasabot isip “Dios ug “Ginoo” (o “ang Ginoo”) diha sa Daang Tugon kasagaran mao ang Manluluwas nga si Jesukristo. Gitawag Siya kaniadto og Jehova. Siya ang nagdumala sa mga kalihokan sa kalibotan ubos sa mando sa Iyang (ug atong) Langitnong Amahan.
Sa dihang ang Dios nakig-istorya ngadto ni Moises, pinaagi kadto ni Jesukristo.
Sa dihang si Jonas miikyas gikan sa gihatag nga misyon sa Ginoo, si Jesukristo kadto ang iyang giikyasan.
Sa dihang ang Dios nakig-istorya ni Ezequiel, Jeremias, Isaias, ug sa tanang uban pang mga propeta, Siya mihimo pinaagi sa Binuhat nga sa kaulahian moula alang sa ilang (ug atong) mga sala.
Ang ngalan nga “Jesukristo” dili makita sa Daang Tugon. Apan kon ikaw makaamgo kon kinsa Siya, makita nimo Siya hapit sa matag pahina.
Tan-aw ngadto sa Umaabot
Miingon kita bag-ohay lang nga ang Daang Tugon natapos 2,500 ka tuig na ang milabay. Tinuod kana kon maghisgot kita bahin sa kasaysayan sa mga tawo nga gilangkoban niini, apan ang mga panagna nga anaa niini milungtad og mas dugay kaysa niana. Daghan ang magamit sa atong panahon ug lapas pa.
Ang Langitnong Amahan ug si Jesukristo nahibalo na gikan sa sinugdanan kon unsay mahitabo sa kalibotan nga Ilang gilalang. Ang mga kasulatan, lakip na ang Daang Tugon, ania agig kabahin aron sa pagtudlo nato sa unsay nakat-onan sa atong mga katigulangan—o napakyas nga kat-onan: nga ang pagtuo diha sa Dios ug diha sa Iyang Anak mao ang labing importante nga butang nga atong mapalambo sa atong kinabuhi. Niining tuiga, kitang tanan adunay kahigayonan sa pagpangita og bag-ong inspirasyon diha sa daan na kaayo nga basahon.