5 ka Kamatuoran nga Molig-on Nimo Batok sa Paggamit sa Pornograpiya

Usa ka butang nga nakatabang nako mao ang pagkat-on nga ang sekswalidad nindot ug sagrado, dili ikaulaw. Ang atong hinatag sa Dios nga sekswal nga mga pagbati ug mga tinguha makatabang nato sa paglalang og mga anak ug sa pagbaton og kamaya, gugma, ug panaghiusa ngadto sa atong mga kapikas kon kita minyo na. Ang Dios nagmando nato sa paggamit sa atong sekswal nga kapasidad sulod lamang sa kaminyoon aron kita makasinati sa hingpit nga kaayohan niini nga gahom.

Si Elder David A. Bednar sa Korum sa Napulog Duha ka Apostoles mitudlo nga ang sekswal nga mga relasyon “dili pagahimoon tungod lang sa kakuryuso nga buot diskobrehon, gana nga buot tagbawon, o matang sa paglingaw-lingaw nga hinakog nga buhaton” apan “usa sa dakong pagpahayag sa atong balaanong kinaiya ug potensyal ug paagi sa paglig-on sa emosyonal ug espiritwal nga kasuod sa bana ug asawa.”

Ang atong mga pangandoy sa pagpahayag sa gugma sulod sa kaminyoon kay matarong nga mga tinguha. Ug ang "pagsinati og sekswal nga mga pagbati ug sekswal nga pagpukaw normal" sa mga babaye ug mga lalaki. Apan si Satanas naningkamot sa paggamit sa atong mga tinguha aron sa pagmanipula nato. Siya motental nato nga itumong ang atong sekswal nga kapasidad paingon sa makadaot nga mga pamatasan imbes sa balaanong mga katuyoan.

Ang mga panan-aw sa kalibotan nangangkon nga ang masturbasyon ug pagtan-aw sa pornograpiya dili makadaot o gani makahimsog nga mga pamatasan. Usahay misulay ko sa paggamit niini nga mga ideya aron ipangatarongan ug ipakamatarong ang akong mga binuhatan. Moingon ko sa akong kaugalingon, “Dili kini makaapekto sa laing tawo, mao nga dili kini makahimo og bisan unsa nga kadaot.”

Apan, nakita nako nga ang pagpangatarongan sa akong pamatasan wala magdala nako og kalinaw. Kondili, mibati ko og kahaw-ang, walay kalipay, ug nalaang sa akong mga pamatasan. Misugod ko sa pagkaamgo nga ang akong pamatasan—diin nahibalo na ko nga sukwahi sa mga sugo sa Dios—ang nakapugong nako sa pagkonektar ngadto sa Dios ug sa pagkaplag og tinuod nga kalipay.

Bisan kon gusto nakong usbon ang akong mga pamatasan, usahay murag imposible kini. Apan akong nakaplagan ang paglaom pinaagi sa pagdangop ngadto ni Jesukristo.

Akong nahibaloan nga Siya adunay kaluoy sa tanan kinsa huyang, nasakitan, o nabug-atan. Iyang gipalig-on ang akong tinguha sa paghinulsol ug mahimong gawasnon ug mihatag nako og kalig-on sa pagpili og mas maayo nga mga pamatasan. Bisan kon nadagma ko sa daghang higayon, Siya mitabang nako sa hinayhinay sa “pagwakli sa mga kadena” nga naghatag nako og kabug-at (2 Nephi 1:23).

Misugod ko nga gipulihan ang akong makadaot nga mga pamatasan og mga kalihokan nga naghatag nako og tinuod nga katumanan, sama sa paggahin og panahon kauban sa mga minahal, pagpalambo sa akong mga talento, ug pagtuon sa ebanghelyo. Nakakaplag usab ko og kalig-on pinaagi sa pakigtambag sa akong bishop ug sa ubang matinabangon nga mga tawo.

Bisan kon nakahimo ko og kalamboan, usahay mobati gihapon ko og kawalay kadasig o kaulaw, apan naningkamot ko nga mosalig ni Jesukristo ug sa Iyang Pag-ula. Kinahanglan kong mapakita og pagtuo nga bisan sa akong kahuyang, ang Iyang grasya igo alang nako (tan-awa sa Ether 12:27).

Si Elder J. Devn Cornish, emeritus General Authority Seventy mitudlo, “Kon kamo tinud-anay nga maningkamot ug dili mangatarongan o mosukol—kanunay nga maghinulsol ug mangamuyo alang sa grasya, o sa tabang ni Kristo—positibo nga mahimo kamong “igo nga kamaayo,” buot ipasabot, madawat sa atubangan sa Ginoo.”

Si propeta Alma mitudlo, “Pugngi ang] tanan nimong mainit nga mga pagbati, nga mapuno ka sa paghigugma;” (Alma 38:12). Ang pagpugong mahimong nagpasabot sa pagdumala, pagkontrolar, o pagsugpo.

Akong nakita nga kon ako molihok sa akong sekswal nga mga pagbati sa walay pagpugong o sa dili matarong nga mga paagi, nasinati nako ang pagbati og kahaw-ang. Apan sa dihang akong gipugngan ug gidumala ang akong sekswal nga mga pagbati paingon sa matarong nga mga katuyoan, ako napuno sa paghigugma.

Samtang dili pa ko minyo, nakakaplag ko og kalig-on pinaagi sa pagtutok sa akong matarong nga tinguha nga sa umaabot mapahayag ang akong sekswalidad sulod sa mahangtorong kaminyoon. Sa higayon nga mag-atubang ko og tentasyon, maningkamot ko sa paghinumdom nga unsay gusto gayod nako mao ang malungtarong gugma, dili temporaryo nga katagbawan. Nakaplagan usab nako ang pagkaayo ug kalipay pinaagi sa pagkonektar ngadto sa uban ug sa pagpalig-on sa akong mga relasyon ngadto sa Langitnong Amahan, ni Jesukristo, sa akong pamilya, ug sa akong mga higala.

Kadugayan, nahimamat nako ang usa ka tawo nga sa kaulahian akong giminyoan. Manag-uban, naningkamot kami sa pagsunod sa balaod sa kaputli ug sa pagpangandam alang sa kaminyoon sa templo. Nadasig kami sa gugma alang sa Ginoo, sa among gugma alang sa usag usa, ug sa among tinguha nga makabaton og malipayon, nindot nga mahangtorong relasyon.

Karon, samtang nagtahod kami sa among pakigsaad sa kaminyoon, among natagamtam ang hingpit nga mga panalangin sa among hinatag sa Dios nga sekswalidad. Ang among pasalig ngadto sa usag usa ug ngadto ni Jesukristo nakahimo niining posible alang namo nga masinati ang katumanan, pagkahiusa, ug kamaya.

Lisod ang pagtuman sa balaod sa kaputli ug ang paglikay sa makadaot nga mga pamatasan, labi na kon ikaw mibati og kaguol o naghulat sa oportunidad nga maminyo.

Apan ang Manluluwas adunay gahom sa pagtabang nato nga mabuntog ang tentasyon ug makaplagan ang pagkaayo. Si Presidente Russell M. Nelson bag-ohay lang mipamatuod: “Gidala ni Jesukristo diha sa Iyang Kaugalingon ang inyong mga sala, inyong mga kasakit, inyong mga kaguol, ug inyong mga kahuyang. Dili kinahanglan nga kamo mag-inusara sa pagpas-an niini! Siya mopasaylo kaninyo kon kamo maghinulsol. Siya mopanalangin kaninyo sa unsay inyong gikinahanglan. Siya moayo sa inyong nasamdan nga kalag.”

Gusto sa Dios nga masinati nimo ang sekswal nga katumanan ug kalipay sumala sa Iyang katuyoan. Siya motabang nimo sa pagnabigar sa dalan sa pakigsaad. Siya puno sa kaluoy ug makatabang nimo nga mabuntog ang imong mga panlimbasog ug madawat ang imong matarong nga mga tinguha.