Paggamit sa Daang Tugon nganha sa Imong Kinabuhi
Oo, Ikaw usa ka Tinugyanan sa Yuta—apan Ayaw Kahadlok!
Ang pag-atiman sa kalikopan usa ka mahinungdanong sugo, apan dili nato kini kinahanglang himoong komplikado.
Polusyon. Paghawan sa kalasangan. Mga dagat nga puno sa basura. Kausaban sa klima.
Kon makadungog ka niini nga mga pulong ug hugpong sa mga pulong, tingali mobati ka og kabalaka, kawalay paglaom, o kawalay pagtagad hinungdan sa daghan kaayong impormasyon.
Sa bag-ohay lang nga katuigan, ang social media nagdala sa mga kabalaka sa kalikopan ngadto sa atubangan sa atong tibuok kalibotan nga pagtagad, ug ang pagkakita sa gidak-on sa mga isyu importante. Apan usahay, ang pagbaton og ingon ka halapad nga panan-aw makapalisod sa pag-ila kon unsa ang imong personal nga responsibilidad—o gani kon nganong mosulay man gani ka.
Ang solusyon? Pagsabot sa imong balaanong tahas nga gitudlo isip usa ka tinugyanan sa mga linalang sa Dios.
Nganong Magpakabana man Ko?
Nahibalo ka ba nga ang Langitnong Amahan misugo natong tanan nga aktibong moapil sa pagpreserbar sa yuta?
Diha sa Doktrina ug mga Pakigsaad 104:13, ang Ginoo mipadangat niining lig-on nga imbitasyon: “Kay gikinahanglan nga ako, ang Ginoo, mohimo sa matag tawo nga manubag, isip tinugyanan sa yutan-ong mga panalangin, nga akong gihimo ug giandam alang sa akong mga linalang.”
Kon dili pa kana igo nga panawagan aron molihok, ang atong propeta, si Presidente Russell M. Nelson, namahayag: “Isip mga nakabenepisyo sa balaanong Paglalang, unsay atong buhaton? Kinahanglan nga atimanon nato ang yuta, magmaalamon nga mga tinugyanan niini, ug mopatunhay niini alang sa umaabot nga mga henerasyon.”
Ang usa ka tinugyanan mao ang usa ka tawo nga nagbantay sa usa ka butang nga gihatag nga ilang atimanon. Ang Ginoo mihatag sa yuta nga imong atimanon, ug ang imong trabaho mao ang pag-amping niini.
Sayon ra ang pagpasa sa responsibilidad sa kalikopan ngadto sa laing tawo o sa mas dakong entidad kaysa imong kaugalingon kon murag sama sa planeta ka dako ang problema nga dili nimo masugdan nga mag-inusara.
Ang pag-usab sa panglantaw sa usa ka tawo bahin sa tibuok kalibotan nga responsibilidad ngadto sa usa ka personal nga espirituwal nga responsibilidad mao ang usa ka yawe sa paglikay sa kabug-at. Hinumdomi: Ikaw sa talagsaong paagi kwalipikado sa imong posisyon isip usa ka tinugyanan sa yuta tungod sa imong balaanong pagkatawo isip anak sa Dios.
Asa man Ko Magsugod?
Basahon lang nimo ang deskripsiyon sa buluhaton. Karon unsa man? Panahon na nga himoon ang gibase sa pagtuo nga paagi sa pagpatunhay.
Ania ang 10 ka ideya aron makasugod ka:
-
Palonga ang tubig kon wala gigamit.
-
Pangita og makalingaw nga mga paagi sa paggamit pag-usab sa imong naguba na nga mga kabtangan.
-
Pangita og alternatibo nga mga pamaagi sa transportasyon kon mahimo.
-
Pagsugod og usa ka proyekto sa pagserbisyo diha sa imong komunidad.
-
Hunahunaa og maayo ang unsay imong paliton. Pangutana, “Magamit ba gayod nako kini nga aytem sa taas nga panahon?”
-
Gamita kutob sa mahimo ang kahayag sa kinaiyahan atol sa adlaw.
-
Kinahanglan mahibalo bahin sa lokal nga mga inisyatiba ug mga balaod bahin sa pagpatunhay [sustainability]. Ingon kini ka yano sama sa pagsunod sa imong lokal nga mga account sa social media sa gobyerno.
-
Panindota ang imong kalibotan. Hiposa ang basura, sulayi ang pagtanom og mga bulak o mga kahoy, ug magmahimong responsable kon maglingaw-lingaw sa gawas.
-
Tabangi ang imong silingan. Hunahunaa ang pagpananom, pagtanyag og transportasyon, o pagkuha sa ilang gi-recycle alang nila kon sila walay masakyan aron himoon kini.
-
Pag-ampo aron masayod kon unsaon nga magamit nimo ang imong mga talento ug espirituwal nga mga gasa aron mahimong mas maayong tinugyanan sa kalikopan.
Unsa man Kon Ako Walay Makita ang mga Resulta?
Gihimo nimo ang tanan nga anaa sa lista, ug ang dagat puno gihapon sa basura, ang polusyon problema gihapon, ug ang imong social media feed wala nahimo nga mas positibo.
Paghulat! Sa dili pa ka mohunong, hinumdomi ang imong “ngano.”
Sa bag-ohay nga debosyonal, ang Kinatibuk-ang Presidente sa Relief Society nga si Camille N. Johnson miingon: “Importante nga kita makaila sa koneksiyon tali sa pag-atiman alang sa yuta ug sa pag-atiman alang sa atong silingan. Sa pag-atiman alang sa yuta, pagpanindot sa atong lokal nga kalikopan, ug pagtabang sa atong mga komunidad nga mahimong mas makalahutay, naglihok kita isip maalamon nga mga tinugyanan sa yuta sa pagpanalangin sa mga kinabuhi sa atong mga silingan.”
Matag paningkamot, bisan unsa ka gamay, mao ang laing lakang sa pagsunod sa sugo sa Ginoo nga molihok isip usa ka tinugyanan sa yutan-ong mga panalangin.
Himoa nga ang Imong Kasingkasing nga Magmaya
Ang Ginoo mipasabot nga “ang tanang butang nga gikan sa yuta, sa panahon niana, gihimo alang sa kaayohan ug sa paggamit sa tawo, aron makapahimuot sa mata ug makapamaya sa kasingkasing” (Doktrina ug mga Pakigsaad 59:18).
Himoang prayoridad sa imong kinabuhi ang pagkatinugyanan sa kalikopan, apan ayaw tugoti nga ang kabalaka, kawalay paglaom, o kahadlok nga motabon sa kalipay nga moabot gikan sa pagpuyo niining matahom nga yuta.
Ang Presiding Bishop nga si Gérald Caussé mitudlo, “Kining talagsaong mga binuhat giandam alang sa atong kaayohan ug buhi nga paghimatuod sa gugma sa Tiglalang alang sa Iyang mga anak.”
Samtang naningkamot ka sa pagsunod niini nga sugo nga mahimong mas maayo nga mga tinugyanan sa yuta, makapalambo ka og mas lawom nga pasalamat alang sa mga linalang sa Dios ug mapalambo ang mga kinabuhi niadtong anaa sa imong palibot.