Alang sa mga Inahan sa Gagmayng mga Bata
Kon ang Pagkahimong Mama Dili Kaayo “Talagsaon” Pamation
Ang pagkainahan mahimong usa ka nagsagol nga kamaya ug mga hagit.
Isip unang higayon nga inahan nga adunay gamayng bata, gikapoy kaayo ko. Tibuok gabii ko nga nag-atiman sa akong bag-ong natawo nga anak, ug naglisod sa pag-adto sa simbahan. Human sa miting, usa ka buotan nga edaran nga babaye mikupot sa akong kamot ug miingon, “Di ba talagsaon kaayo nga mahimong mama?”
Mibati ko nga hilabihan nga nasagmuyo aron motubag. Gusto ko nga mahimong mama sa tibuok nakong kinabuhi, ug bisan og moangkon ko nga adunay daghan kaayong talagsaon nga mga aspeto sa pagkainahan, nianang higayona, wala gyod nako batia kanang tanang “talagsaon” alang nako.
Misugod ko sa pagbati og kahasol samtang ang postpartum nga mga hunahuna ug mga kabalaka misantop sa akong hunahuna. Unsa kaha kon dili gyod ko ganahan mahimong mama? Sa mga hagit nga adunay bag-ong natawo, wala nako gibati kining kanunay nga “katalagsaon” nga gipahayag sa ubang mga inahan. Naluoy usab ko sa mga babaye nga nangandoy nga mahimong inahan, ug mibati nga ako hakog kay wala mohigugma sa matag minuto sa pagkahimong mama.
Kana ba nakapahimo nakong dili maayo nga mama? Ako lang ba ang mibati niini?
Pagpangita sa Talagsaon
Giteksan nako ang pipila sa akong mga higala nga bag-ohay lang usab nga adunay gagmayng mga bata. Nahupay ko nga makapaminaw nga sila usab adunay lisod nga mga adlaw (ug mga gabii). Ang pagpakig-istorya nila midala nako ngadto sa makapahingangha nga pagkaamgo:
Tingali naggamit kita og pulong nga talagsaon sa paghulagway sa pagkainahan tungod kay lisod kini ug talagsaon sa samang higayon.
Mibati ko og kasagmuyo nga kita naggamit sa pulong nga talagsaon sa paghulagway sa pagkahimong usa ka inahan, imbes sa mga pulong sama sa mahagiton, dili hinakog, labihan ka makahasol, mga pulong nga tinuod gayod nako kay ang akong gamayng bata nagsalig nako 24/7. Unta ang pangutana nianang babaye sa simbahan mao, “Lisod ba kaayo ang pagkahimong mama?”
Sa kalit lang ang mga pulong gikan sa himno nga “Ako Nagpabilin nga Natingala” misantop sa akong hunahuna:
“O, katalagsaon, niini nga gugma!”
Ang Pag-ula sa Manluluwas mahagiton, dili hinakog, ug labihan ka makahasol. Apan kita naghulagway niana nga kanta gamit ang pulong nga talagsaon.
Unsa ang Gitudlo ngari Kanako sa Pagkahimong usa ka Mama
Karon ang akong anak nga lalaki usa ka tuig na, ug kon maghunahuna ko og balik sa miaging tuig sukad nahimo kong mama, daghan kaayo ko og nakat-onan. Ug labing importante, mas napaduol ko ni Jesukristo.
Kanunay ko nga naghunahuna niini nga kinutlo gikan ni Presidente Jeffrey R. Holland, Akting nga Presidente sa Korum sa Napulog Duha ka Apostoles: “Walay gugma sa mortalidad nga mas susama kaduol sa tiunay nga gugma ni Jesukristo kay sa dili hinakog nga gugma sa usa ka mapahinungoron nga inahan alang sa iyang anak.”
Mas nasabtan nako ang Manluluwas samtang nagkat-on ko kon unsa ang pagkahimong usa ka inahan.
Mas milawom ang akong pagdayeg sa akong buotan nga inahan ug sa dili maihap nga mga sakripisyo nga iyang gihimo alang nako sa atibuok nakong kinabuhi. Ang talagsaon usa ka pulong nga akong gamiton sa paghulagway niya.
Ang mga kasulatan kanunay nga nagkutlo sa mga inahan ug sa pagkainahan. Ang pagbasa niini isip usa ka mama nakahatag nako og bag-og panglantaw sa akong kinabuhi.
Pananglitan, ang pagbasa pag-usab sa Isaias 49:15 daw nahimong mas tinuod ngari nako karon nga akong nasabtan kon sama sa unsa ang kanunay nga pag-atiman sa usa ka gamayng bata: “Makalimot ba ang usa ka inahan sa iyang anak nga masuso? Dili ba niya mahalon ang iyang anak? Apan bisan pag malimot ang inahan sa iyang anak ako dili gayod malimot kanimo.”
Ang akong lawas sa pisikal nga paagi dili makalimot nga ako adunay anak nga nagsalig nako, apan—dili gihapon kini matandi ngadto sa hingpit, mahangtorong gugma sa Manluluwas alang nato.
Ang pag-atiman og usa ka anak nga lalaki nakatabang nako nga mas masabtan ang gisaad nga mga panalangin sa akong mga pakigsaad sa templo ug nakahatag nako og mas dakong katuyoan sa pagtinguha nga mosunod sa mga pagtulun-an sa akong Manluluwas.
Ang matag adlaw isip usa ka mama nagdala og nagsagol nga mga hagit ug kamaya, nga hingpit nga naghulagway kon ngano nga ang pagkahimong usa ka mama “talagsaon,” bisan kon dili kini ingon niana pamation.
Bisan kon wala ko mobati kanunay nga usa ka “talagsaon” nga mama, hinaot nga sa matag adlaw ako mahimong mas mahisama sa akong Manluluwas, si Jesukristo, ug motudlo sa akong anak nga lalaki kon unsaon pagsunod sa Iyang mga tunob.