Kini Mao ang Imong Misyon; Makahimo Ka Niini!

Naghunahuna ko, “Basin nagkomedya ra sila. Basin nasayop ra.”

Sa pagkahibalo nga moserbisyo ko sa French og inistoryahan nga misyon sa Africa, mibati ko og kawalay kasegurohan ug pagduhaduha—mga pagbati nga akong giila nga nagagikan sa kaaway.

Nadiskobrehan usab nako nga wala pay usa gikan sa akong nasod ang nakaserbisyo sa Cote d’Ivoire sukad! Didto sa Ghana missionary training center, akong namatikdan nga walay usa didto ang makaistorya og Kinatsila. Lisod kaayo nga dili makaistorya sa akong lumad nga pinulongan.

Gusto kong moundang ug mopauli, apan ako dayong nahinumdoman nga si Nephi adunay susama nga kasinatian. Sa dihang misulod siya sa siyudad nga nangita sa balay ni Laban, siya miingon, “Ug gigiyahan ako sa Espiritu, kay wala ako masayod sa mga butang nga angay nakong buhaton.” (1 Nephi 4:6).

Mibati ko nga sama ni Nephi. Ug, human sa sinsero nga pag-ampo, mibati ko og kalinaw. Kon ang mga pagduhaduha motunga, ang hugpong sa mga pulong nga “Kini mao ang imong misyon, ug makahimo ka niini” mosantop sa akong hunahuna. Ug nasayod ko nga inubanan sa tabang sa Ginoo, ako makahimo.

Sa dihang miabot ko sa Cote d’Ivoire, naapektohan kaayo ko sa kabos nga mga panimalay ug grabe nga kainit. Ang unang mga bulan mahagiton, nga may limitado nga tubig ug kuryente. Nag-ampo ko alang sa kalig-on, ug ang samang hugpong sa mga pulong misantop nako: “Kini mao ang imong misyon, ug makahimo ka niini.”

Usa ka adlaw, napakli nako ang 3 Nephi 5:13: “Tan-awa, tinun-an ako ni Jesukristo, ang Anak sa Dios. Gitawag niya ako aron sa pagpahayag sa iyang pulong taliwala sa iyang katawhan, aron sila makabaton og walay kataposang kinabuhi.”

Nakapausab kini sa akong panglantaw. Nakat-on ko sa pag-usab sa dili maayong mga kasinatian ngadto sa makalingaw nga mga kasinatian ug nakita ang akong mga panalangin.

Wala na kaayo ko mabalaka sa unsay wala nako ug mas nabalaka sa unsay gikinahanglan sa uban. Salamat sa Ginoo sa pagpanalangin nako og gasa sa mga pinulongan, nakakat-on ko og French sulod sa pipila ka bulan ug nahimong batid sa Ininglis aron makasulti ko og tulo ka pinulongan! Ang akong mga pagduhaduha ug kahadlok napulihan og kamaya sa pagserbisyo sa Ginoo.

Sa kaulahian akong nadiskobrehan kon ngano nga ako gitawag sa pagserbisyo.

Si Elder David F. Evans sa Seventy mitudlo: “Gusto mong malipay? … Moalagad sa inyong isigkatawo isip misyonaryo sa Ginoo. … Mousab kini sa tanan. … Ang buhat lisod, pero dunay nindot nga katagbawan ug kalipay samtang kamo moserbisyo. Kon kamo magmatinud-anon atol sa inyong misyon ug human niana, maghandom kamo sa ibyong kinabuhi ug moingon uban ni Presidente [Gordon B.] Hinckley, ‘Ang tanang maayo nga nahitabo kanako sukad niana masubay niadtong desisyon nga moalagad sa misyon ug mohatag sa akong kinabuhi sa Ginoo.’”

Kon ikaw nabalaka kon unsay mahitabo sa imong pamilya, mga higala, pag-eskwela, trabaho, o romantiko nga mga interes, hinumdomi nga ang Ginoo nagsaad, “Dili ko kamo biyaan nga daw mga ilong tuwapos. Mobalik ako kaninyo” (Juan 14:18).

“Kalimti ang inyong kaugalingon,” sama sa giingon ni Presidente Hinckley, ug apil niining mahinungdanong kawsa. Ang Ginoo mopanalangin sa imong mga paningkamot, sa imong mga pamilya, ug sa imong kinabuhi, samtang imong ihatag ang tanan nimo ngadto Kaniya.

Kon gusto ka nga magmalipayon, sunda ang dalan sa ebanghelyo, ug kon ikaw adunay oportunidad, pagmisyon. Ang mga panalangin nga moabot niadtong nagserbisyo sa Ginoo makita usab human sa ilang mga misyon.

Ako usab modapit sa tanan nga makahimo sa pagpangandam ug sa pagserbisyo og misyon. Ang Ginoo nagdapit nato sa pagpangita sa Iyang mga anak nga nangita Kaniya. Ang mga pagsulay moabot, apan inubanan sa pagtuo diha ni Kristo ug sa positibo nga kausaban sa imong panglantaw, imong makita ang mga panalangin sa Dios samtang ikaw magserbisyo Kaniya.

Pinaagi sa pagtutok sa akong hunahuna ug kasingkasing nganha sa Ginoo, ang akong panghunahuna nausab. Nahimo kong mas positibo, ang akong mga kahadlok ug mga pagduhaduha nawala, ug akong nasinati ang maluntarong kamaya sa pagsunod sa ebanghelyo ni Jesukristo.

Nasayod ko nga ang Dios nahigugma ug personal nga nakaila nato, ug tungod niini Iyang gipadala ang Iyang Bugtong nga Anak, “aron ang tanan nga motuo kaniya dili malaglag kondili makabaton hinuon sa kinabuhing dayon (Juan 3:16).

Siya nasayod kon asa kita kinahanglan nga moserbisyo. Sa dili madugay ako adunay oportunidad nga makita pag-usab ang akong pamilya ug mopamatuod nga si Jesus mao ang Kristo, nga bisan asa man kita tawagon ang Ginoo nagkinahanglan nato, nga ang Iyang ebanghelyo parehas ra sa tanang pinulongan, ug nga sa pagkatinuod: kini mao ang akong misyon, ug ako nakahimo niini.

Mahimo usab ninyo!