Diin ang Sala Maoy Hinungdan sa Kagubot, si Kristo Nagdala og Kalinaw

Atol sa Paglalang—ang sinugdanan sa tanan nga atong nahibaloan—ang uniberso gihulagway nga anaa sa kagubot, wala maorganisar nga kahimtang: “Ang kalibotan haw-ang ug walay hitsura, ang kangitngit ug ang Espiritu sa Dios naglihok ibabaw sa katubigan” (Genesis 1:2). Kini nga kagubot ug walay paglaom nga kangitngit mao ang makapahinumdom kon sa unsa nga paagi ang kaaway makapahimo nato nga mobati kon kita makasala o mohimo og mga pagpili nga batok sa atong mga mithi. Malingaw siya nga mohimo nato nga mobati nga wala nay kagawsan ug sa kasagaran moawhag nato sa pagtago.

Apan si Sister Tamara W. Runia, Unang Magtatambag sa Kinatibuk-ang Kapangulohan sa Young Women, mitudlo: “Si Jesukristo naghatag og kahayag niadtong kinsa anaa sa kangitngit. Mao nga, sa mga adlaw nga gibati ninyo kana nga tingog nga nagsulti kaninyo sa pagtago, nga kinahanglan ka magtago sa usa ka mangitngit nga kwarto nga mag-inusara, ako nagdapit kaninyo nga magmaisogon ug motuo ni Kristo! Padayon sa unahan ug pasigaa ang Kahayag—atong Hingpit nga Kahayag sa Paglaom.”

Ubos sa direksiyon sa Dios, atol sa paglalang ang unang butang nga gihimo ni Jesukristo sa pagpapahawa sa kangitngit sa kagubot mao ang pagdala og kahayag (tan-awa sa Genesis 1:3; Moises 2:2–5). Gikan didto, misugod Siya aron sa pag-organisar sa matag nagkayamukat nga bahin sa butang, gikan sa halapad nga mga kalangitan ngadto sa labing gamay nga tanom nga bag-ong mitubo.

Kon Siya makapahusay sa uniberso, hunahunaa unsay mahitabo kon kamo moduol ngadto sa Iyang Anak alang sa pagkaayo ug sa matubsanong gahom matag adlaw. Kon kamo mobati nga kamo nagsagubang sa inyong mga pakigbisog ug sa kangitngit sa kalibotan, ang pagkab-ot sa kahayag ni Kristo mao ang unang lakang ngadto sa kalinaw ug balaan nga organisasyon.

Human maorganisar ang kalangitan ug ang yuta ug gipanindot, ang Langitnong Amahan miandam og paagi alang sa Iyang espiritu nga mga anak nga moanhi sa yuta ug modawat og pisikal nga mga lawas. Apan atol sa atong panahon sa yuta, ang kaaway naningkamot pag-ayo sa paghimo nato nga makalimot kon kinsa kita.

Makita nato ang iyang mga paningkamot sa pagpalayo nato gikan sa atong balaanon nga pagkatawo sa gutlo sa dihang ang Dios nakigsulti ngadto ni propeta Moises ug mipakigbahin og kahibalo ngadto kaniya. Sa Moises 1, ang Dios namulong ngadto ni Moises pinaagi sa ngalan ug balik-balik mitawag kaniya nga Iyang anak.

Apan sa pagbiya sa Dios, si Satanas nagpakita ug nagtawag ni Moises nga usa ka “anak sa tawo” (Moises 1:12), nagtintal kaniya sa pagkalimot kon si kinsa gayod siya.

Si Satanas gusto nga kita makalimot kon si kinsa gayod kita. Nagsilsil siya og pagduhaduha sa atong abilidad nga mag-usab. Gusto siya nga motuo nga kita natural, dili mausabon nga mga lalaki ug mga babaye ug kanunayng ingon niana na lang gayod.

Apan si Elder Patrick Kearon sa Korum sa Napulog Duha ka apostoles nagpahinumdom nato: “Kamo makaduol ngadto ni Kristo uban sa kamasaligon sa Iyang mahigugmaong kaayo ug modawat sa tanan Niyang mga gasa sa kalipay, kalinaw, paglaom, kahayag, kamatuoran, pagpadayag, kahibalo, ug kaalam. … Kamo mga hinigugmang anak nga babaye sa Dios, kamo gimahal nga anak nga lalaki sa Dios, ug Siya migasa kaninyo sa Iyang hingpit, balaan nga Anak sa pagtubos kaninyo, paghatag og kaangayan kaninyo, ug pagbalaan kaninyo.”

Ang katubsanan mao ang butang nga dili gayod maangkon ni Satanas. Ug kon kita mosalig sa atong espirituwal nga pagkatawo, kita makaingon, sama sa gisulti ni Moises:

“Kinsa ikaw? Kay tan-awa, ako mao ang anak nga lalaki [o babaye] sa Dios, nga adunay pagkasama sa iyang Bugtong Anak. …

“Pahawa, Satanas; ayaw ko linglaha; kay ang Dios nagsulti kanako: Ikaw adunay pagkasusama sa akong Bugtong Anak.” (Moises 1:13, 16).

Kon ang kinabuhi medyo gubot, hunong. Hinumdomi ang inyong balaan nga pagkatawo. Himoa kana nga kamatuoran, nga kamo minahal nga anak sa Dios, mobira ninyo padulong sa langit. Duol ngadto ni Jesukristo aron Siya makatabang ninyo nga mapahiuli ang kahusay sa inyong kalag.

Sa dihang si Adan ug si Eva mibiya sa Tanaman sa Eden, ang kayano sa ilang nahibaloan kanunay didto napulihan sa mamingaw ug awaaw nga kalibotan. Apan ang Langitnong Amahan misaad nga sila makabaton og kalinaw tungod kay Siya nag-andam og usa ka Manluluwas sa pagtubos kanila gikan sa ilang mga sala ug mga kasubo (tan-awa sa Moises 5:7–10).

Kon kamo mobati nga nabug-atan sa pagkamortal, hinumdomi kini nga kamatuoran: Ang Langitnong Amahan nasayod nga kita mag-atubang og mga tintasyon, makahimo og mga sayop, ug makasala sa tibuok niining panaw pauli ngadto Kaniya—kana mao ang tanang bahin sa plano.

Sa Hebreo, adunay usa ka balaan nga pulong, shalom, nga sa kasagaran gigamit isip usa ka pagtimbaya ug panamilit. Daghan tawo sa Israel mosulti gihapon niini ngadto sa usag usa.

Sa karaan nga Hebreo, ang shalom sa kasagarang mamugna sa upat ka letra nga ang matag usa makarepresentar og lahi nga kahulogan:

• Ang baka (usahay adunay kalabotan sa “lider”)

• Ang sungkod sa magbalantay sa karnero (usahay gihubad isip “awtoridad”)

• Ang balod (usahay gihubad isip “kagubot”)

• Ang ngipon (usahay nagkahulogan og “kalaglagan”)

Tiponon, kini nga simbolo nagpasabot og “kalinaw.” Apan ang akong personal nga interpretasyon niini nga mga letra mao nga ang shalom makatudlo nato ngadto sa kamatuoran nga ang Dios adunay awtoridad sa pagguba sa kagubot.

Sa laing pagkasulti, pinaagi ni Jesukristo, ang Langitnong Amahan makatabang nato kanunay sa pag-abog sa mga gahom sa kangitngit sa kinabuhi ug pulihan kini sa kahayag. Bisan kapila pa kita masayop, tungod sa atong Manluluwas, kita makapuli sa kagubot og kalinaw diha sa atong mga kalag kon kita maghinulsol.

Si Presidente Russell M. Nelson mipamatuod:

“Si [Jesukristo] molig-on kaninyo. Siya mopanalangin kaninyo og kalinaw, bisan taliwala sa kagubot. …

“Gidala ni Jesukristo diha sa Iyang Kaugalingon ang inyong mga sala, inyong mga kasakit, inyong mga kaguol, ug inyong mga kahuyang. Dili kinahanglan nga kamo mag-inusara sa pagpas-an niini! Siya mopasaylo kaninyo kon kamo maghinulsol. Siya mopanalangin kaninyo sa unsay inyong gikinahanglan. Siya moayo sa inyong nasamdan nga kalag.

Bisan unsa pa ang inyong mga pakigbisog, kon kamo moduol ngadto sa Langitnong Amahan ug ni Jesukristo alang sa panabang, Sila makapahiuli kanunay unsay anaa sa kagubot, mopalingkawas kaninyo gikan sa mga kagubot sa mga sala ug sa mga tintasyon, ug mopaanindot sa inyong kinabuhi.

Gibalik-balik na Nila kini sa paghimo.