Tema Niining Bulana: Paghangop sa Kamaya sa Paghinulsol

Minahal nga mga higala,

Dili gyod ko ganahan nga makahimo og mga sayop. Tingali tawgon ko ninyo og perpeksiyonista.

Ingon og sukwahi kini, kay ang akong trabaho isip usa ka tagsulat nagkinahanglan nga mosumiter ko og dili perpekto nga trabaho matag adlaw.

Ang bisan unsa nga artikulo nga akong gitrabaho moagi og daghang balik-balik nga mga pag-edit hangtod mahimo kining labing maayo nga bersiyon nga mahimo niini. Ug kahibalo ba kamo? Imbes masagmuyo kon ang akong mga sayop makit-an, ganahan ko magtan-aw nga matarong kini hangtod nga ang kataposan nga artikulo mas maayo na kaysa akong mahimo nga ako ra.

Alang nako, nagpakita kini sa tinipik lamang nga kamaya nga moabot gikan sa paghinulsol.

Ang abilidad sa paghinulsol mao ang mga sukaranan sa ebanghelyo ni Jesukristo, apan alang sa daghang tawo, ang paghunahuna sa paghinulsol nagdala og mas dako nga kahadlok o kahasol sa sala kaysa kamaya. Kon nagkinahanglan ka nga maghinulsol, tingali mobati ka nga ang imong mga sala nakapahimo nimong dili maayo nga tawo.

Apan kini ang tinuod: Ang panginahanglan og usa ka tig-edit wala magpasabot nga dili ko maayo nga tagsulat. Ni ang panginahanglan sa paghinulsol nagpasabot nga dili ko maayo nga tawo.

Ang paghinulsol dili usa ka backup nga plano o timailhan sa kapakyasan. Ang paghinulsol mao ang plano! Ang Langitnong Amahan nasayod nga kita magkinahanglan sa tabang sa Manluluwas aron makabalik ngadto Kaniya. Ug si Jesukristo wala magpanagana sa pagtabang nato—gusto Niya nga kita makagamit sa Iyang gahom.

Samtang magbasa kamo sa mga istorya niining bulana gikan sa mga young adult nga nakadiskobre sa kamaya sa paghinulsol, nanghinaot ko nga madasig kamo nga mobati nianang pasalamat, pagsalig, ug kalinaw. Ania ang pipila lamang sa mga artikulo nga inyong makita niining bulana:

• Usa ka young adult gikan sa Pilipinas nga mibuntog sa iyang kahadlok sa pagpakig-istorya sa iyang bishop

• Usa ka sister gikan sa South Africa nga nakadiskobre nga dili kinahanglan nga perpekto siya aron mahimong bililhon

• Unsa ang ipasabot sa paghinulsol matag adlaw

• Ang akong artikulo mahitungod sa kon sa unsang paagi nga ang paghinulsol makatabang nato sa pagdangop ngadto ni Jesukristo

May mga istorya usab kami nga kabahin sa atong nagpadayon nga mga serye:

• Gikan sa Natad sa Misyon: Unsaon sa pagsalig sa Ginoo kon ang mga tawag sa misyon—ug mga pinulongan—dili mao ang imong gidahoman

• Paggamit sa Daang Tugon nganha sa Imong Kinabuhi: Dali, Sunod Kanako nga suporta sa ngano, asa, ug unsa ang pagkahimong usa ka tinugyanan sa mga linalang sa Dios

• Ako Nagtuo:Unsaon pagtan-aw sa ebanghelyo inubanan sa bag-ong mga panglantaw, bisan kon dugay na kaayo ka nga miyembro

• Alang sa mga Inahan sa Gagmayng mga Bata: Unsa ang gibuhat sa usa ka bag-ong inahan aronmakasabot kon unsaon nga ang pagka-inahan mahimong talagsaon—bisan kon daw dili kini ingon niini pamation

Kon adunay usa ka butang nga gusto nakong inyong makuha gikan niini nga isyu, mao nga kamo, gihigugma gayod sa hilabihan. Sa mga kawani sa YA Matag Semana, apan labing importante, sa inyong Langitnong Amahan ug sa inyong Manunubos. Palihog paminaw sa Ilang mensahe niini nga isyu: nga sa kanunay adunay paagi aron makabalik ngadto Kanila. Ug buhaton Nila ang tanan kutob sa mahimo aron matabangan ka nga makapauli.

Inubanan sa gugma,

Madelyn Maxfield, Alang sa Kalig-on sa mga Kabatan-onan Editoryal nga Intern