Nagatuo Ako
Gibaliwala ba Nimo ang Ebanghelyo?
Ang tagsulat nagpuyo sa Mallorca, Spain.
Kitang tanan adunay mga panahon sa atong kinabuhi diin atong naamgohan nga wala na kita magpasalamat sa ebanghelyo sa milagro niini.
Usa ka adlaw sa akong paglakaw paingon sa trabaho, ako naglagot sa komon nga babag: mga turista.
Naanad na ko sa mga turista dinhi sa Mallorca, apan niining piho nga adlaw, nagtan-aw ko sa nagkadaghang turista nga naghuot sa downtown, mohunong aron molitrato sa tanang butang nga ilang makita.
Nahinumdom ko nga nakamatikod og usa ka turista nga milili sa bintana ug mikuha og mga litrato ug naghunahuna ko, “Ngano man? Normal ra kini nga bintana. Nganong gilitratohan man nimo kini?”
Apan hinuon, murag ingon niana sab ang akong buhaton kon mobisita ko sa bag-ong mga lugar. Mao nga nakahukom ko nga usbon ang akong paagi.
Kon makakita ko og usa ka tawo nga nagpunting sa ilang kamera paingon sa ibabaw sa bilding, mohangad sab ko ug motan-aw kon makakita ba ko og bisan unsang bahandi nga gitutokan nila og maayo. Kon makamatikod ko og usa ka tawo nga nagtutok sa shop nga akong giagian matag adlaw, motan-aw sab ko niini ug pangitaon ang talagsaong butang nga ilang gihunahuna nga angayng litratohan.
Ug kahibalo ba kamo? Nakakaplag ko og pipila ka matahom nga mga butang niana nga paglakaw paingon sa trabaho. Sa dihang misulay ko sa pagtan-aw sa akong panimalay nga ingon og unang higayon ko pa kini nakita ug mihunong sa pagbaliwala niini, aduna koy bag-ong mga butang nga angayng pasalamatan.
Unya, nakahunahuna ko:
Unsa ka sagad nga akong gibaliwala ang ebanghelyo?
Pag-ila sa mga Panalangin nga Nadawat na Nato
Nakahinumdom ko og usa ka higayon sa akong misyon nga wala ko mobati og labihan nga kamaya. Nagsige ko og ampo mahitungod sa sama nga mga butang ug wala mobati nga nakadawat ko og mga tubag.
Nakig-istorya ko sa akong presidente sa misyon bahin sa akong gibati, ug gisultihan ko niya nga basin wala ko mosalig sa hingpit sa mga saad ni Kristo. Sa sinugdanan wala ko kahibalo sa iyang buot ipasabot, apan sa pagsige nako og hunahuna niini ug sa pagtuon kon unsay ipasabot sa hingpit nga pagsalig ngadto sa Ginoo, gibati nako nga naaghat nga mosugod sa pag-ila ug magmapasalamaton sa mga panalangin nga anaa na kanako. Nakatabang kini kanako nga makaamgo nga ang Langitnong Amahan mitubag na sa kadaghanan sa akong mga pag-ampo ug mipanalangin nako sa daghang paagi.
Si Elder Ulisses Soares sa Korum sa Napulog Duha ka Apostoles mitudlo: “Ang ingon nga kawalay pagpakabana gihulagway sa hinay-hinay nga pagkawala sa atong kahinam nga hingpit nga moapil sa ebanghelyo sa Ginoo. … Kini nga pagkakampante, sa lain pang pagkasulti, makaingon kanato nga ibaliwala ang mga gasa sa ebanghelyo, ug sukad niana, atong girisgo nga mapasagdan ang atong makanunayon nga pagbuhat sa labing importante nga mga butang sa ebanghelyo ni Jesukristo ug ang mga pakigsaad nga atong gihimo.”
Kon ako mobati nga murag akong gibaliwala ang ebanghelyo ni Kristo, usahay ang tubag mao ang pagbalik ngadto sa mga sukaranan ug paghinumdom sa unsay labing mahinungdanon.
Pagtan-aw sa Atong Tinuohan pinaagi sa Bag-ong Panglantaw
Kasagaran sa tibuok nakong kinabuhi, nakita nako ang akong kaugalingon sa mga sitwasyon diin ako ra ang miyembro sa Ang Simbahan ni Jesukristo sa mga Santos sa Ulahing mga Adlaw. Ang akong pamilya moadto sa simbahan, ug nindot ang akong branch, apan sa eskwelahan o kauban sa mga higala, nag-inusara ra ko sa akong tinuohan.
Sa higayon nga makahimamat ko og bag-ong mga tawo, ako ang ilang unang pasiuna ngadto sa ebanghelyo. Sa higayon nga ilang mahibaloan ang mga butang mahitungod nako ug ang paagi sa akong pagpakabuhi, sa tan-aw nila bag-o kini ug makapainteresado.
Pananglitan, pipila ka bulan ang milabay anaa ko sa party sa trabahoan diin ang tanan nag-inom og ilimnong makahubog. Sa dihang gipasabot nako ang akong kauban sa trabaho nga dili ko moinom, nagtuo sila nga dili ko moinom nianang gabhiona kay magdrayb ko unya. Sa dihang akong gipasabot nga ako dili gayod moinom, daghan kaayo sila og mga pangutana.
Sa higayon nga ako aduna niini nga mga kasinatian, akong mapasabot ang akong tinuohan ngadto sa mga tawo nga mao pay pagkadungog niini sa unang higayon (o nakadungog lang niini sa atong media sa Simbahan). Ug sa dihang akong makita nga mao pay pagkahibalo nila sa atong Simbahan, nakatabang kini nako sa pagtan-aw sa akong tinuohan pinaagi sa bag-ong panglantaw.
Pagbalik og Subay sa Dalan
Tingali kitang tanan adunay mga panahon sa atong kinabuhi diin atong naamgohan nga wala na kita magpasalamat sa ebanghelyo nga usa kini ka milagro. Apan adunay yano nga mga butang nga atong mahimo sa pagbalik og subay sa dalan, sama sa pag-ila sa tabang sa Ginoo sa atong kinabuhi ug pagpakigbahin sa atong mga pagpamatuod ngadto sa uban. Kita mahimong sama niadtong mga turista, nga nakakita sa mga milagro sa mga butang matag adlaw. Kita mahimong makakita ug mahigugma sa matahom nga mga bahin sa ebanghelyo nga nahimo na lang nga kaswal nato.
Ganahan ko sa Mga Panultihon 3:5–6, nga nag-ingon:
"Salig sa Ginoo sa bug-os mong kasingkasing. Ayaw gayod pagsalig sa imong kaalam.
“Hinumdomi siya sa tanan mong buhaton ug tultolan ka niya sa matarong nga dalan.”
Kon kita moila sa unsay gihimo sa Langitnong Amahan ug ni Jesukristo alang nato, Sila mopadayon sa paghatag nato og bag-ong direksyon ug inspirasyon.
Ug Sila motabang nato nga mopadayon sa pag-ila sa panalangin sa pagbaton sa ebanghelyo sa atong kinabuhi.